Ríkisstjórnin sveik Íslendinga!!

Nú er kominn nýr samningur á borðið um Icesave sem virðist líta voða vel út. Samt er margítrekað af Lee Bucheit að ekkert sé fullvíst um forsendur eða kostnað við þennan samning. Aðeins að hitt og þetta og raunar allt varðandi samninginn sé einingis líklegt! Hann telur t.d. að líklega taki fá ár að greiða þennan pakka, en hugsanlegt að það geti tekið 37 ár!! Þetta er eins og með stríðsskaðabætur Þjóðverja vegna fyrri heimsstyrjaldar. Það var talið líklegt að það yrði heilmikið mál fyrir þá að gera það dæmi upp, en engan óraði fyrir að það tæki 90 ár eins og raun varð á.

En varðandi Icesave, þá virðist sem verðmætaaukning þrotabús Landsbankans, sem aðallega felst í tvöföldun á verðmæti lána hans til almennings á Íslandi vegna gengisbreytinga og verðbólgu, sé að borga Icesave í raun að mestu. Það er sem sagt nú þegar búið að velta þessu yfir á skuldara og skattgreiðendur á Íslandi!!

Samt er ekki slegið slöku við. Það á að gera samning um síðustu milljarðatugina og demba þeim á ríkið.

Það er búið að plata okkur rækilega ef þetta gengur allt eftir. Ég legg til víðtæk mótmæli við þessu og þjóðaratkvæðagreiðslu um nýjan Icesave samning 6. mars n.k.

Ég vil ekki sjá krónu fara í þennan samning í viðbót og ég vil að tekið sé fram fyrir hendurnar á ríkisstjórninni sem er búin að ákveða að greiða þennan pakka að verulegu leyti í leyfisleysi og banni eftir þjóðaratkvæðagreiðslu 6. mars sl. með því að leyfa kröfuhöfum að ná þessu til baka frá saklausum almenningi á Íslandi með áhlaupi á eignir þeirra og fjárhag.

Ríkisstjórn Íslands hefur ekki fengið neitt leyfi til að greiða prívatskuldir óreiðumanna.

Kostnaður 50 milljarðar

Money heaven geymir peninginn segir aðaleigandinn.

Í ágætis heimildar- eða fræðslumynd í sjónvarpinu nýlega lýsti Björgólfur Thor því að peningarnir úr Landsbankanum hefðu eiginlega ekki horfið, heldur bara farið til Peninga Himna (Money heaven) hvað sem það nú er. Það var nú hans skýring!! Svo var hann voða upptekinn þegar hann var spurður út í aðrar skoðanir á hvarfi peninganna og mátti ekki vera að því að ræða þetta frekar.

Er þessi náungi ekki alvarlega klikkaður ef hann heldur að menn trúi þessu bulli og láti gott heita? Hvað yrði gert við mig ef ég færi inn í einhvern bankann og krefðist þess að fá að fara með peningana í bankanum til Peninga Himna? Hvort yrði löggan beðin um að setja mig í steininn eða inn á Klepp? Ég er næstum því viss um að það yrði Kleppur og eitthvað róandi með.

En bisnissmaður sem heldur þessu bulli fram er bara boðinn velkominn á útsölu hjá ríkinu. Skattar á útsölu og helst orka á útsölu er það sem hann fær fyrir gagnaverið sitt og vina sinna svo hann geti grætt meira á því úr því að búið er að hirða af honum bankann sem hann keypti en borgaði aldrei að fullu. Hann þurfti að stela svo miklu úr honum að hann skildi ekki einu sinni eftir skiptimynt til að klára að borga kaupverðið. Hann virðist líka hafa náð að sannfæra endurskoðendur bankans um að Money Heaven væri traustur staður fyrir peninga bankans. Endurskoðendurnir skrifuðu upp á ársreikninga sem sýndu allt annað en rétta stöðu bankans, sjálfsagt í óbilandi trú á að Money Heaven geymdi það sem á vantaði.

Hvað er að hjá yfirvöldum, ríkisstjórn og sérstökum saksóknara. Af hverju eru ekki sett neyðarlög til að koma þessum ruglukolli í örugga vörslu og sækja peningana í Money Heaven? Af hverju gengur Björgólfur ennþá laus eins og Jón Ásgeir? Hvað þarf margar skýrslur og útskýringar fyrir sérstakan saksóknara til að nægjanlega rökstuddur grunur um misferli vakni til að stinga þessum glæpamönnum í steininn?  

Er spilling kannski skýringin?  

Segja að Landsbankinn hafi staðið mun verr en bókhald sagði

Ég skammast mín fyrir sérstakan saksóknara og ríkisstjórnina.

Bókhald Glitnis var skáldsaga í mörg ár. Það er í stuttu máli niðurstaða franskrar rannsóknar á því. Eigendur og stjórnendur bankans voru glæpamenn, endurskoðendurnir annaðhvort aular eða glæpamenn. Bankinn fór í raun á hausinn 2007. Starfsemin snérist að stórum hluta um fjársvik eigenda og stjórnenda bankans og að fela þau árum saman. Að þessu stóðu allir sem eitthvað höfðu um málin að segja. Hefðu menn staðið sig hefði bankinn verið lýstur gjaldþrota ári fyrr en raunin varð og tjónið af gjaldþroti hans orðið miklu minna en það varð. Þetta eru miklar fréttir, en þó ekkert nýtt í þeim nema dagsetningin á að Glitnir hafi verið gjaldþrota 2007 en ekki 2008. Hitt hefur allt legið fyrir frá október 2008!

Nú liggur þetta fyrir í enn einni skýrslunni, samt ganga allir málsaðilar lausir, glæpamennirnir, aularnir, þeir sem áttu að hafa eftirlit með þessu og aðrir sem þátt tóku. Ríkisstjórnin er alltaf með hausinn í sandinum og gerir ekki neitt nema koma öllu svindlinu yfir á almenning. Hann á að borga þetta og getur sjálfum sér um kennt fyrir að hafa tekið þátt í góðærinu segir ríkisstjórnin. Það hefur á allri valdatíð þessarar ríkisstjórnar ekki í eitt einasta skipti verið minnst af ráðherrum hennar á að sækja stolið fé úr bankanum eða hinum bönkunum. Að stinga Jóni Ásgeiri og félögum í steininn og láta þá dúsa þar á meðan málið er rannsakað og leitað að þýfinu. Og þó hefur aldrei fyrr í Íslandssögunni verið meira tilefni til slíkra aðgerða!

Það var stofnað embætti sérstaks saksóknara. Það er búið að birta rannsóknaskýrslu sem Alþingi lét gera um bankahrunið, það er komin þessi franska skýrsla, fullt af öðrum skýringum og skýrslum komið eða á leiðinni, það er búið að láta Evu Joly liggja yfir þessu. Fjölmiðlar eru búnir að rekja ótal viðskiptafléttur tengdar þessum banka og hinum bönkunum sem sýna ótvírætt hvernig fjársvikin gengu fyrir sig. Það er margbúið að rekja hvernig bankastjórarnir frá Bjarna Ármannssyni og til falls bankanna allra mökuðu krókinn í svindlinu.
Samt er ekkert gert. Það ganga allir lausir.

Er sérstakur saksóknari ekki í lagi? Af hverju ertu ekki farinn að taka á þessum mönnum? Þú ert að kafna í sönnunargögnum, nærð varla andanum fyrir skjalaflóðinu sem fylgir þessum hundraða milljarða fjársvikum. Af hverju tekurðu ekki á málinu maður? Ertu ekki enn farinn að átta þig á að það geti í þessu öllu saman verið rökstuddur grunur um misferli? Svo mikill grunur að það sé nauðsynlgt og sjálfsagt að þeir grunuðu fari bak við lás og slá á meðan málin eru rannsökuð til enda? Hvers konar andskotans vinnubrögð eru þetta?

Meira að segja RÚV, sem oft er nú seint til er búið að átta sig á þessu. Það eru fluttar endalausar fréttir og fréttaskýringar af svindlinu og meira í vændum.

Ef bankaræningjunum verður ekki stungið inn á grundvelli rökstudds gruns um misferli í bankarekstri fyrir jólin þá eru það bara landráð. Ef þessir menn sem voru aðaleigendur og stjórnendur bankanna þriggja eiga að ganga lausir áfram þá gilda ekki um þá sömu lög og um almenning á Íslandi. Og slík mismunun í þessu tilviki er landráð og stjórnarskrárbrot.

Þá er sérstakur saksóknari og hans yfirvöld, ríkisstjórnin sem ákvað að stofna þetta embætti, landráðamenn. Það er ekki til neitt annað hugtak sem útlistar þetta betur. Ef allir þessir aðilar ætla að loka augunum fyrir einhverjum umfangsmestu fjársvikum í heimi til þessa þá eru það landráð.

Takið nú hendur úr vösum og farið út með handjárnin að sækja glæpona. Það er öll virðing almennings fyrir spilltum og ónýtum yfirvöldum á Íslandi rokin út í veður og vind, enda eru svona yfirvöld skammarleg en ekki virðingarverð.
Þið rífið niður þjóðfélagið með aumingjaskap ykkar. Nú er þörf á smá röggsemi, það þarf að byggja upp, það þarf að gera rétt. Það þarf ekki meiri aumingjaskap og spillingu, það þarf að taka á málunum, það þarf að slíta á tengslin við glæpamafíurnar og taka á þeim með réttum hætti. Það þarf að byggja Ísland upp aftur eftir efnahagshrun. Númer eitt í því er að við rekum af okkur slyðruorðið, að við hættum að vera spilltasta land í heimi. Það er alveg drepleiðinlegt og mannskemmandi að þurfa í hvert sinn sem maður hittir útlendinga að þurfa að hlusta á spurningar um það af hverju það sé ekkert tekið á glæpamönnum hér? Hvort Íslendingum sé alveg saman þó einhverjir ræni bankana hérna o.s.frv.

Segja að bókhald Glitnis hafi verið í molum

Sitthvað Hussein eða Hussein. Einn drepinn, annar gerður að forseta.

Það leið ekki svo óskaplega langt frá aftöku Saddams Hussein að undirlagi Bandaríkjamanna þar til þeir kusu sér sjálfir forseta með þessu nafni. Barack HUSSEIN Obama.

Er það ekki neyðarleg tilviljun að Bandaríkjamenn drepa forseta sem heitir Hussein og kjósa svo yfir sig forseta með sama nafni og sem hefur gert heimsbyggðinni enn meiri bölvun en sá sem drepinn var. Allt hefur gengið á afturfótunum frá því mönnum datt í hug að ráðast inn í Írak og drepa Saddam Hussein. Ef ég tryði á yfirnáttúrulega hluti væri ekki spurning að ég myndi trúa því að Saddam Hussein sé að hefna sín á Bandaríkjamönnum með því að láta þá kjósa nafna sinn sem forseta.

Góða nótt.

Orðaskipti við aftöku birt

Sænskar undirlægjur.

Sænski saksóknarinn er sannkölluð undirlægja. Ekki vegna þess að hún hafi lagst viljug undir Julian Assange eins og konurnar tvær sem tengjast meintum kynferðisbrotum. Þær hafa báðar lýst því yfir að þær hafi viljugar lagst undir hann, en búist við að hann myndi tefla fram smokkuðu tóli gegn undirlægjuhætti þeirra. Þar sem hann gerði það víst ekki er búið að gera úr þessu sakamálarannsókn.

Nei, sænski saksóknarinn er undirlægja vegna þess að hún hefur greinilega lagst flöt undan þrýstingi bandaríkjamanna um að hún skuli reyna að negla Julian Assange fyrir að sleppa því að draga fram smokkinn í hita leiksins. Málið snýst í raun ekki á nokkurn hátt um kynferðisbrot eða nauðgun, heldur aðeins um notkun eða notkunarleysi á smokk. Og þó virðist hlutverk hans (smokksins) ekki hafa orðið að ágreiningsefni fyrr en eftir partíið. Ekki hefur komið fram hvort litur eða gerð þessa smokks sem ekki stóð milli Assange og kvennanna skiptir máli í rannsókninni.

Auðvitað veit maður ekki öll málsatvik. En málið er í mínum huga einstaklega hálfvitaleg aðferð til að reyna að taka óþægilega sannsögulan mann úr umferð. Svona er mikil undirlægja sænska réttarkerfisins og saksóknarans gagnvart prívatfrekju bandaríkjanna.

Rannsóknin ekki pólitísk

Aular og undirlægjur.

Bandaríkjamenn álíta íslenska stjórnmálaforingja greinilega vera aula og undirlægjur. Sennilega er það rétt mat.

Feluleikurinn um fangaflugið styður þetta. Sömuleiðis fréttir af þægð þeirra vegna skattlagningar á álfyrirtækin, sem höfðu áhyggjur af að þurfa að borga smá skatt ofan á pínulítið orkuverð til álframleiðslu. Þau klöguðu bara í sendiráðið sem sagði undirlægjunum að lækka pínulitla skattinn sem leggja átti á álverin. Niðurstaðan var að aulalegu undirlægjurnar hættu við að leggja á 88% af pínulitla skattinum sem þau ætluðu að leggja á álfyrirtækin ofan á pínulitla raforkuverðið sem er forsenda þess að álfyrirtækin mala gull.

Kannski það sé ráð fyrir íslenskan almenning að klaga ríkisstjórnina til sendiherra Bandaríkjanna á Íslandi fyrir skattagleði. Þannig má kannski berja niður skattaokur norrænu velferðarstjórnarinnar.

Hótanir Jóhönnu um að leysa upp ríkisstjórnina styðja það líka að í henni sitji bara aular og undirlægjur. Auðvitað reyndu Bandaríkjamenn að liðka til svo að ríkisstjórnin héldi. Það er þeim í hag að hér séu aular og undirlægjur við völd.

Mér sýnist ég geta haldið lengi áfram á sömu braut. WikiLeaks er hin nýja biblía stjórnmálanna. Kannski kem ég með fleiri svona biblíutúlkanir á næstunni, en ég nenni ekki meiru núna. Góða nótt.

Rannsókn fangaflugs pólitísk

Steingrímur barnalegur en eldrauður kapítalisti!

Það er helst að lesa úr mati Bandaríkjamanna á Steingrími að hann sé þeim geðfelldari og þægari ljár í þúfu en þeir bjuggust fyrirfram við. Steingrímur er sagður miklu hallari undir sjónarmið og hagsmuni Bandaríkjamanna en þeir áttu von á. Hins vegar er hann sagður barnalega bjartsýnn varðandi endurgreiðslur á Icesave.

Í stuttu máli er Steingrími lýst sem afbragðs "puppet on a string" strengjabrúðu Bandaríkjamanna. Og það kemur þeim á óvart! Mér líka.

Bjó hjá foreldrum Steingríms

Sannleikurinn má ekki verða opinber.

Það er nú bæði grátlegt og hlægilegt hvað nú er hart ráðist að vefsíðunni Wikileaks vegna birtingar á ýmsum skjölum sem afhjúpa raunverulega stjórnarhætti í helstu löndum heimsins.

Það er beitt öllum brögðum til að fela sannleikann. Síðunni er úthýst af vefþjónum með hótunum um aðgerðir gegn fyrirtækjum sem eigi samstarf við Wikileaks. Forsvarsmaður síðunnar er hundeltur af yfirvöldum sem vilja koma honum í fangelsi og glæpamönnum úr innsta vinahópi spilltra stjórnvalda sem vilja ráða hann af dögum.

Áhrifamenn í bandarískum stjórnmálum vilja skilgreina síðuna og aðstandendur hennar sem hryðjuverkasamtök fyrir að birta þeirra eigin gögn um sitt skítlega eðli.

Og nú á að loka fyrir peningastreymið til síðunnar. Eflaust er það aðferð sem getur virkað vel því allt kostar peninga í þessum heimi, líka að opinbera sannleikann.

Hver er svo ástæðan fyrir öllum þessum látum út af þessari vefsíðu?
Eina ástæðan er sú einfalda staðreynd að síðan segir sannleikann um stjórnvöld með því að birta þeirra eigin skjöl. Það er allt og sumt!!

Stjórnmál í dag (og um langt skeið) hafa verið þannig að þau þola illa dagsljós. Stjórnvöld hagræða hlutum eða ljúga að almenningi kinnroðalaust alla daga um nánast allt sem þau gera. Það er talinn sjálfsagður hlutur. Þess vegna kannski er heimurinn eins og hann er. Þess vegna hrynur efnahagskerfið yfir nótt. Þess vegna er almenningur látinn taka ábyrgð á því sem stjórnvöld klúðra. Þess vegna vilja stjórnvöld ekki breytingar á hinu pólitíska kerfi. Þess vegna voru kosningar til stjórnlagaþings á Íslandi talaðar niður og hálf eyðilagðar. Það er nefnilega ekki í anda spilltra stjórnmála að færa valdið til fólksins og fara að vinna fyrir opnum tjöldum.
Heitið á þessu kerfi er LÝÐRÆÐI!!! Hugsið ykkur bara hvað stjórnmál eru sjúk.

Svo eru það blessaðir fjölmiðlarnir sem allir lepja upp lygi stjórnvalda og breiða hana út eins og guðs orð í miðlum sínum og fegra hana kannski um leið sér og sínum uppáhalds hagsmunaöflum í hag.

Allir nema WikiLeaks, þessi eini alvöru fjölmiðill í heiminum sem fjallar um málin með því einfaldlega að birta gögn stjórnvalda og annarra sem véla bak við tjöldin í umboði almennings. Þetta er eini miðillinn sem einbeitir sér að því að segja bara satt. Allir aðrir miðlar sem á annað borð fjalla um stjórnmál eru ýmist áróðursmaskínur stjórnvalda og hagsmunaafla eða tilgangslausir sorphaugar slúðurs og óhróðurs eins og dæmi eru um.

En nú er sem sagt í gangi samstillt átak stjórnvalda í mörgum löndum til að loka fyrir þennan leka. Tryggja að enginn fjölmiðill segi satt. Tryggja að almenningur verði áfram mataður á lýðræðislegri lygi eins og hingað til. Öllum brögðum er beitt til að koma í veg fyrir að pólitískur sannleikur verði birtur í fjölmiðlum.

Stöðva greiðslur til WikiLeaks

5039 atkvæði komu manni á þingið en 8975 dugðu öðrum manni ekki til að komast.

Það eru fáir sem botna almennilega í þessu kosningakerfi og mörgum finnst þeir hafa verið plataðir, því enginn gat gert sér grein fyrir hvernig best var að raða sínum mönnum á atkvæðaseðilinn til að þeir ættu möguleika á kjöri í samræmi við atkvæðamagn.

Ég er búinn að skoða þessar tölur um atkvæðamagn sem landskjörstjórn birti í kvöld. Það er vissulega dáldið skrýtið að síðasti fulltrúi sem nær kosningu skuli komast inn með 5039 atkvæði en að 29 frambjóðendur sem fengu fleiri atkvæði komust ekki inn, sá sem flest atkvæði hlaut af þessum 29 fékk nærri 9000 atkvæði. Þetta hlýtur að vera ný gerð af mismunandi atkvæðavægi sem ræður þessu. En þar sem almennur vilji var meðal frambjóðenda og þjóðarinnar, skv. skoðanakönnunum, um að jafna atkvæðavægi í kosningum býst ég ekki við að þessi aðferð verði aftur notuð við opinberar kosningar í landinu.

Hin einfalda og eðlilega aðferð í kosningum sem þessum hlýtur að vera að þeir komist inn sem hafa flest atkvæði samanlagt. Svo þegar um kosningu er að ræða þar sem röð skiptir máli hlýtur að vera réttast og endurspeglar best vilja kjósenda að sá sé efstur sem fær flest atkvæði í 1. sæti, næstur verði sá sem er samanlegt með flest atkv. í 1-2 sæti o.s.frv. Ég get ekki skilið að það sé eðlileg niðurstaða að aðrir komist á svona þing eða önnur, en þeir sem flestir kjósendur greiða atkvæði sitt.

En ekki ætla ég að gera mál úr þessu varðandi þessa kosningu, get hvort eð er ekki reiknað mig inn á þetta þing með neinni skynsamlegri stærðfræði, nema þá helst með því að teygja þetta vitlausa talningarkerfi enn lengra út í vitleysuna sem það skilar frá sér. Að auka enn frekar misvægi atkvæðanna í þessu kerfi, það gæti kannski skilað mér alla leið á þingið!!

Ég óska kjörnum fulltrúum til hamingju með kjörið og minni þá á að vinna á stjórnlagaþinginu að hagsmunum þjóðarinnar, heildarinnar, en ekki eiginhagsmunum og sérhagsmunum.

Og gera greinarmun á því sem þarf að standa í stjórnarskrá og hinu sem rétt er að afgreiða með því að leyfa þjóðinni að greiða atkvæði um, eins og t.d. samspili ríkis og kirkju. Ekki eyða tímanum í að þræta um það sem þjóðin er fær um að ákveða.

Og ekki halda að þið séuð kosin á stjórnlagaþing til að breyta litlu eða engu, það er ekki verið að fjárfesta 500 milljónir í nýrri stjórnarskrá til að hún sé lítið eða ekkert breytt frá þeirri gömlu, það kostar ekki 500 milljónir að ákveða að breyta engu.

Og misnotið ekki kjör ykkar til að þoka landinu nær ESB með nýrri stjórnarskrá. Ef við förum í ESB þurfum við enga nýja stjórnarskrá, ESB hefur stjórnarskrá sem aðildarlöndin þurfa hvort eða er að laga sig að. Með því að ákveða að gera nýja stjórnarskrá fyrir Ísland er um leið verið að ákveða að halda landinu frá ESB. Munið það! Góðar stundir.

 

Hér er pdf skjal þar sem búið er að flokka frambjóðendur eftir heildaratkvæðamagni.  Grænlitaðir eru þeir sem náðu kjöri. 

Ekki nóg að koma oftast fyrir

Skrár tengdar þessari bloggfærslu:

• Greidd atkvæði.

#6791 Kynlíf frambjóðanda til stjórnlagaþings - er svona framboð í lagi?

Allar mest lesnu fréttir netmiðlanna þegar ég gáði áðan snúast um kynlíf, brjóst, áreitni, kynferðislega misnotkun, framhjáhald, vændiskonur og ásakanir þessu tengdar. Á morgun eru kosningar til stjórnlagaþings og augljóst að þær ná ekki sömu athygli, selja ekki eins vel, og kynlíf. Af 25 mest lesnu fréttunum á fretta.gattin.is núna áðan voru 4 fréttir sem voru ekki um kynferðismál, þær tengdust allar pólitískum tengslum og/eða spillingu eins og það er oft kallað. Engin af mest lesnu fréttunum tengist stjórnlagaþings kosningum á morgun.

Ég er í framboði til stjórnlagaþings og er í nokkrum greinum á DV, Svipunni, Vísi, facebook, blog.is o.fl. miðlum búinn að kynna mínar hugmyndir um nýja stjórnarskrá. Ég er meira að segja búinn að setja stefnu mína fram í bundnu máli, sennilega einn frambjóðenda. En ég er ekki að fá þá athygli sem ég vil og sýnist að nú séu önnur mál sem fólk er meira upptekið af en kosningar til stjórnlagaþings. Sem sé kynferðismál af ýmsum toga. Þess vegna geri ég nú kynferðismálin að lokapunkti kosningaundirbúnings hjá mér. Ég viðurkenni að mér finnst það sjálfum skringilegt að vera að skrifa svona í kosningabaráttu, en ég fer að vilja þjóðarinnar og reyni að tengja skrif mín við það sem hún vill lesa um og hefur greinilega mestan áhuga á. Auðvitað er ég um leið að plata ykkur með fyrirsögn sem er miklu meira spennandi en innihald greinarinnar.

Ég hef verið í fríi undanfarnar vikur og farið dálítið út að skemmta mér á kvöldin en ekki gert neitt sérstakt af mér sem hefur ratað í fréttirnar. Hef hitt nokkrar austur evrópskar gleðikonur þar sem ég hef verið að skemmta mér en ekki átt nein viðskipti við þær og ekki náðst neinar myndir af mér með þeim. Þannig að ég hef svo sem engar krassandi sögur að segja ykkur eða myndir að sýna og bara engar fréttir af kynlífi mínu. Það er spurning hvort svona bragðdauft framboð er í lagi, ég vona að svo sé.

Ég er ekki að gera lítið úr þeim kynferðistengdu málum sem eru svo vinsælt umfjöllunarefni í fjölmiðlum og heldur ekki úr þjóðinni þó ég reyni að nota þetta til að vekja á mér athygli vegna stjórnlagaþingskosninganna. Þvert á móti vil ég nota þetta til að vekja athygli á að "fjórða valdið" fjölmiðlarnir, nota kynlíf og kynferðismál af ýmsum toga til að afla sér fjár og vinsælda. Og lesendur miðlanna eru líka mjög áhugasamir um þessi mál. Það er misjafnt hve þessar fréttir eru trúverðugar en ljóst að þær geta haft óafturkallanleg áhrif á þá sem um er fjallað og því mikilvægt að þær séu sannar og vel unnar svo enginn sé að ósekju tekinn af lífi í fjölmiðlum. Þess vegna vil ég að í stjórnarskrá verði skýrar reglur um bæði tjáningarfrelsi í fjölmiðlum og líka um viðurlög við því að breiða út óhróður sem ekki er á rökum reistur. Ég hef kallað þetta frelsi til að segja satt og bann við lygum. Ég tel það mjög mikilvægt að um þessa hluti verði settar grunnreglur í stjórnarskrá til að tryggja bæði eðlilegt tjáningarfrelsi og eðlilega persónuvernd.

En það er líka annar flötur á þessu sem er líka rétt að hafa í huga við gerð nýrrar stjórnarskrár. Það er að bæta réttarumhverfi og málsmeðferð vegna kynferðisbrota svo þolendur þori og geti komið fram og fengið réttláta, fordómalausa og hlutlausa málsmeðferð vegna þeirra brota sem þeir hafa mátt þola. Allt of oft virðist tekið rangt á slíkum málum, gert lítið úr þeim og jafnvel þolandanum, málin þögguð niður og jafnvel eitthvað enn verra. Þetta þurfum við að reyna að laga í nýrri stjórnarskrá. Ég vil beita mér fyrir því og tel það alveg jafn nauðsynlegt að tryggja fórnarlömbum réttlæti gagnvart raunverulegum brotum eins og að vernda saklaust fólk fyrir óhróðri.

Ég hvet kjósendur til að mæta á kjörstað á morgun.

Að lokum er hér stefnuskrá mín í bundnu máli. – Góða helgi!!
Jón P. Líndal, #6791

Jón Pétur Líndal á Stjórnlagaþing

Ég er alltaf sæll og glaður,
stundum jafnvel gæfumaður.
Í gleði minni nú ég syng,
sjálfan mig á stjórnlagaþing.

Ef þér líkar þetta vel,
þú þarft ekki að muna neinn,
nema sex – sjö – níu – einn

Ég vil núna gera gagn,
meira en bara bölv og ragn.
Að fara á þingið er mín þrá,
að gera nýja stjórnarskrá.

Ef þér líkar þetta vel,
þú þarft ekki að muna neinn,
nema sex – sjö – níu – einn

Lýðræðisumbætur, eignarréttur,
svo að þú sér betur settur.
Fólk en ekki flokka á þing,
það er best fyrir almenning.

Ef þér líkar þetta vel,
þú þarft ekki að muna neinn,
nema sex – sjö – níu – einn

Mannréttindi og velferð allra,
á minnimáttar má ei halla.
Verum góð og höldum friðinn,
og pössum upp á fiskimiðin.

Ef þér líkar þetta vel,
þú þarft ekki að muna neinn,
nema sex – sjö – níu – einn

Með auðlindirnar má ei braska,
og náttúrunni lítið raska.
Bankakerfið standi sig
en ræni ekki þig og mig.

Ef þér líkar þetta vel,
þú þarft ekki að muna neinn,
nema sex – sjö – níu – einn

Viltu gefa frá þér valdið?
Finnst þér betra sleppt en haldið?
Ég vil leggja á þjóðarsál,
atkvæðagreiðslur um helstu mál.

Ef þér líkar þetta vel,
þú þarft ekki að muna neinn,
nema sex – sjö – níu – einn

Ef taka á mark á stjórnarskrá,
refsiákvæði vil ég sjá,
svo að dóm sinn muni fá,
þeir sem henni brjóta á.

Ef þér líkar þetta vel,
þú þarft ekki að muna neinn,
nema sex – sjö – níu – einn

Þetta er það sem ég vil gera,
svona finnst mér hún eigi að vera,
okkar nýja stjórnarskrá,
sem við byggjum framtíð á.

Ef þér líkar þetta vel,
þú þarft ekki að muna neinn,
nema sex – sjö – níu – einn

www.facebook.com/stjornarskra

Rúmlega 10 þúsund kusu