DV fjallar um Ólaf Ragnar og útrásartengsl hans.

Aldrei þessu vant ætla ég að auglýsa hér frétt af vef DV þó ég verði nú að viðurkenna að DV er ansi lélegt vörumerki. En í fréttinni er fullyrt að Ólafur Ragnar sé búinn að vera. Fréttin á að birtast í fullri lengd í næsta blaði.

Um þetta efni DV heyrði ég nokkrar vísur áðan sem ég ætla að birta hér í tilefni af þessu væntanlega greinarkorni DV.

Ólafur er búinn,
þreyttur og lúinn.
Lagði allt undir,
nú koma rannsóknarnefndarfundir.

Hangir eins og hundur á roði,
á Bessastöðum.
Ólafur villutrúargoði.
með útrásarvinum.

Auðmannaþjónusta er ekki grín,
smeðjuglottin dýr og fín.
Dorrit gamla glepur sýn,
felur þó ekki bréfin þín.

Bónus, Hagar, Gaumur, glens,
Bakkavör og fleira skrens.
Exista, Samson, Kaupthing, Glitnir,
ofjarla þína loksins hittir.

http://www.dv.is/frettir/2009/11/6/olafur-er-buinn/

B. Hussein Obama er velviljaður kjáni - Kína ræður för.

Á sama tíma og B. Hussein Obama forseti Bandaríkjanna hefur verið að reyna að kjafta landið út úr kreppunni sýna tölurnar svo ekki verður um villst að þessi kjaftaleið út úr kreppunni er kjaftæði. Betra væri að halda kjafti og gera eitthvað gagnlegt í stað þess að halda þessu kjaftæði áfram. En svona er Obama kallinn, hann er kjaftagleiður og stundum hafa kjaftasnjallir Bandaríkjaforsetar náð árangri, t.d. John F. Kennedy, sem er frægastur slíkra í seinni tíð.

En tölurnar sem ég vitnaði í áðan eru t.d. þessar atvinnuleysistölur, 10,2% sem er mesta atvinnuleysi í 26,5 ár í USA.
Þá eru það vanskil af húsnæðislánum sem enn fara vaxandi skv. fréttum frá í gær, og voru það þó þau sem komu kreppunni af stað, grófu undan Lehmann bankanum sem féll og sem markaði um leið þau tímamót að stjórnvöld og markaðurinn misstu alveg tökin á ástandinu.

Svo er enn verið að nudda í Kínverjum að breyta skráningu kínverska gjaldmiðilsins gagnvart dollarnum svo Kínverskur iðnaður grafi ekki meira en orðið er undan efnahag USA og fleiri ríkja.

Á fundi 20 helstu iðnríkja heimsins (G20) í Skotlandi núna hefur eitt aðalfundarefnið verið fastgengisstefna Kínverja og gráta menn þar utan í Kínverjum að breyta þessu kerfi eða breyta genginu. Þá hafa menn rætt um að stofna sérstakan sjóð til að berjast við Kína á þessum vígvelli.
Þetta er sem sagt aðalmálið á þessum fundi í Skotlandi, og þó er þetta málefni ekki einu sinni á dagskrá fundarins. Það sýnir kannski best hve efnahagskreppan er alvarleg og langt frá því að vera að leysast.
Það sýnir líka hve kjaftagangurinn hingað til hefur verið mikið kjaftæði.

Á hinn bóginn eru engar fréttir af því að Kínverjar vilji hlýða þessum grátkór eða taka upp fljótandi gengi. Sennilega sýnist þeim það kerfi ekki þjóna sínum hagsmunum. Og af hverju ættu Kínverjar að beygja sig fyrir grátkór Bandaríkjanna og ESB? Samanlegt eru íbúar Bandaríkjanna og ESB landa ekki nema ca. helmingur af íbúafjölda Kína. Því skyldu Kínverjar hysja upp um svona smáþjóðir og gamaldags kommaklíkur sem ekki eru samkeppnishæfar í veröld 21. aldarinnar.

Obama ósáttur við atvinnuleysi

Efnahagur í USA enn á hraðri niðurleið.

Þessi frétt rennir stoðum undir það sem ég hef verið að halda fram í mínu bloggi undanfarið, að í USA eru menn bara að reyna að kjafta sig út úr kreppunni. Þar er allt á niðurleið ennþá. Eins og segir í fréttinni "Vanskil lántakenda fara stöðugt vaxandi..." Þetta segir allt sem segja þarf og er mjög traust vísbending um raunverulegt ástand. Vanskil færu jú ekki stöðugt vaxandi ef allt stæði í blóma eða uppsveifla væri hafin aftur. Þá myndu vanskil a.m.k. hætta að aukast, jafnvel þó það geti tekið tíma að greiða þau niður aftur.

Þetta rennir bara stoðum undir það að "efnahagsbatinn" í USA er bara "bubble recovery" og kjaftagangur sem stendur yfir á meðan Bandaríkjastjórn heldur áfram að ausa út skattfé. Þegar þeir hætta því fer hagkerfið algjörlega í rúst aftur og kreppan magnast sem aldrei fyrr.

Enn botnlaust tap hjá bandarískum fasteignalánasjóðum

Trassaskapur hjá Yfirdýralæknisembættinu?

Þegar maður heyrir fréttir af veikindum í svínum og loðdýrum undanfarið hvarflar að manni að hjá Yfirdýralækni sitji menn frekar yfir skýrslum og pappírsstússi en að sjá til þess að gerðar séu ráðstafanir til að koma í veg fyrir sjúkdóma eða að bregðast við þeim þegar þeir koma upp. Embættið virðist t.d. ekki geta tryggt að starfsfólk á svínabúum sé bólusett gegn svínaflensu þó full þörf sé á slíku og starfsmenn búanna hafi verið í forgangshópi varðandi bólusetningu. Þá herma fréttir að á loðdýrabúi í Skagafirði sé bústofninn að drepast hratt úr veikindum án þess að nokkur lyf berist til að bregðast við því.

Ég stóð um árabil í rekstri þar sem ég átti allt undir því að pappírstígrarnir hjá Yfirdýralæknisembættinu fengju að nota stimpla sína og vald eins og þeim þóknaðist þannig að ég veit að þarna elska menn að leysa hlutina á pappír. En það er að mínu mati bölvaður trassaskapur að embættið skuli reynast alveg gagnslaust þegar upp koma alvarleg vandamál í búrekstri sem ekki verða leyst með pappírsvinnu einni.

Ég vil því hvetja Halldór Runólfsson yfirdýralækni til að reka stórutána í sitt starfsfólk og reyna þannig að hvetja það til að leysa alvöru vandamál eða að öðrum kosti að láta stórutána fylgja því til dyra svo hægt sé að rýma til og manna embættið með hæfara fólki. Íslendingar hafa ekki efni á því núna að halda úti fokdýrum embættum sem ekki sinna hlutverki sínu almennilega.

Bæti hérna við þetta vísu sem ég heyrði þegar þetta var til umræðu áðan.

Svínaflensa og loðdýradauði,
leysist best með skýrslu á borði.
Segir pappírstígurinn ráðasnauði,
sem stuðlar þannig að kvikfjármorði.

Grunur um svínaflensu í svínabúi í Eyjafirði

Mikill stuðningur við ESB aðild. - Áfellisdómur fyrir íslensk stjórnvöld.

Ég er nú satt að segja alveg steinhissa á að það skuli nú samt vera 29% sem eru hlynnt inngöngu í ESB. Það er gríðarlega mikill stuðningur miðað við allan vinskapinn sem "vinir" okkar í Evrópu sýna okkur um þessar mundir og hafa gert frá því sumir þeirra settu á okkur hryðjuverkalög í fyrra. Ástæðan hlýtur að vera sú að það eru ca. 29% íslensku þjóðarinnar sem eru búin að fá þvílíkt ógeð á íslenskum stjórnvöldum að það skiptir fólkið meira máli að losna undan ofríkinu hér heima heldur en vandamálin sem fylgja inngöngu í ESB. Þegar svona margir vilja kyssa vöndinn með stuðningi við ESB aðild eftir hryðjuverkalög, Icesave nauðungina og alls kyns háðung og ofríki af hendi ESB þjóða undanfarið þá er eitthvað mikið að hér heima fyrir. Þessi 29% stuðningur við ESB er því að mínu mati mikill áfellisdómur fyrir íslensk stjórnvöld og stjórnsýslu.

29% vilja ganga í ESB

AGS leyfði seðlabankanum að henda smá mola í lýðinn - Hvað veldur?

Það var vitnað til AGS að þeir teldu hafa skapast smá svigrúm til vaxtalækkunar. Þeir semsagt leyfðu vaxtalækkun! Mikið er það nú gott að þeir skuli hafa leyft þetta, ég hélt satt að segja að þeir myndu aldrei leyfa neina vaxtalækkun hér. En líklega eru þeir að reyna að passa að krónan haldist veik framyfir að gjaldeyrishöftunum verður aflétt svo kröfuhafar Íslands geti greitt sér út gjaldfallin lán. Þá streymir gjaldeyrisvaraforðinn úr landi og í framhaldi af því verða stýrivextirnir örugglega hækkaðir aftur. Og sennilega um meira en 1%.
Ég ætla að spá því að þetta verði yfirstaðið fyrir áramót og að í ársbyrjun á næsta ári verði stýrivextir hér hærri en 12% og mikið gengið á gjaldeyrisvaraforðann.

Stýrivextir lækka í 11%

Alveg sama hvernig fer, Icesave samningur verður alltaf rándýr.

Það er því miður alveg sama hvernig fer með þrotabú Landsbankans og hversu mikið næst að greiða upp í Icesave. Þessi samningur Svavars Gestssonar og kommúnistastjórnarinnar verður alltaf rándýr. Þó svo að fyrir rest fáist jafnvel 100% upp í Icesave mun kostnaður vegna fjármögnunar á meðan beðið er innlausnar á eignum þrotabúsins í besta falli nema nokkur hundruð milljörðum en miklu líklegra er að heildarkostnaður vegna Icesave þegar upp verður staðið verði af stærðargráðunni 700-1200 milljarðar eftir því hvað reynist nýtilegt í þrotabúinu. Sem sagt, eins og ég hef áður sagt þá verður aldrei hægt að borga þetta. Og þess vegna á að fella þennan samning, til hvers að samþykkja eitthvað sem fyrirsjáanlega verður aldrei hægt að standa við?

Icesave-skuldabréf hækkað um 80 milljarða á hálfu ári

Ótrúlega heimskir hagfræðingar - leggjum við traust okkar á svona hagfræði?

Því er haldið fram í fjölmiðlum í Bandaríkjunum að nú þegar Warren Buffet hefur ákveðið að fjárfesta í járnbrautafyrirtæki telji aragrúi greinenda, hagfræðinga, sjóðsstjóra og annarra áhrifamanna í fjármálakerfi landsins að það sé vísbending um að botni kreppunnar sé náð þar í landi. Svo örugglega hljóti botninum að vera náð að nú sé óhætt að skála í kampavíni fyrir betri framtíð í fjármálageiranum.

Í fréttinni kemur fram að um 80% hagfræðinga í USA telja að nú sé það versta af þessari kreppu yfirstaðið, um leið er minnt á að nærri 100% þeirra sáu hana ekki fyrir.

Það eru ótrúleg áhrif sem Warren Buffet hefur í fjármálakerfi Bandaríkjanna og vissulega hefur hann reynst happasæll fjárfestir í gegn um tíðina. En þessi blinda trú á manninum er engu að síður bara múgsefjun og ótrúleg heimska, en á ekkert skylt við hagfræði og skynsemi.

Og Buffet hefur ekki verið óskeikull með fjárfestingar í flutningageiranum. Upp úr 1990 fjárfesti hann um 358 milljónir dollara í U.S. Airways flugfélaginu. Þessi fjárfesting varð fljótt að engu og þá skrifaði Buffet bréf til fjárfestanna sem hann hafði tapað peningum fyrir til að útskýra þessa lélegu fjárfestingu. Þar útskýrði hann líka í leiðinni hvernig maður verður milljónamæringur í USA. "Fyrst þarftu að verða milljarðamæringur, svo kaupirðu flugfélag."

Þessi ofangreinda fjárfesting Buffets segir allt sem segja þarf um hvað það er ótrúleg heimska þegar hagfræðingar og aðrir fjármálamenn ákveða að ein stök fjárfesting eins gamals manns sé svona merkilegur hagvísir. En úr því að hagfræðin virkar svona er best að leggjast á bæn og biðja um að þetta gangi eftir í þetta sinn og Buffet hafi farið fram varðandi fjárfestingar í flutningageiranum. Framhald kreppunnar ræðst að einhverju leiti af þessu.

Litlar breytingar eftir stýrivaxtaákvörðun

Vitum enn ekkert hvert stefnir.

Það er svo sem ekki skrýtið eða óviðbúið að þetta "fjármálakerfi" okkar fái falleinkunn. Það er enn ekki vitað um stærð bankanna nýju eða tap þeirra gömlu. Það er ekkert tekið á þeim sem voru við stjórnvölinn og það er lítið gert í að rekja slóðir peninganna. Það er úbreiddur misskilningur að botninum sé náð og að við förum bráðum að rétta úr kútnum. Hvernig getum við fullyrt slíkt þegar við vitum ekki einu sinni hvar "fjármálakerfið" stendur í dag eða hvers virði það er nú. Og við vitum heldur ekki hve mikið tjónið varð í hruninu.

Það hefur löngum verið staðhæft að það sé erfitt að spá, sérstaklega um framtíðina. Erfiðast hlýtur þó að vera að spá þegar ekki er einu sinni vitað hver staðan er eða út frá hvaða forsendum er verið að spá. Við erum svo róleg í þessu að við getum ekki einu sinni spáð um fortíðina. Svona er þetta nú hér á Íslandi.

Það versta er samt að þetta á almennt við um fjármálakerfi heimsins. Í þessu tilliti er Ísland ekki stakt tilvik. Fjármálakerfin mígleka öll peningum ennþá, það er sífellt verið að dæla skattfé í fjármálakerfin í þeirri von að þannig stoppi lekinn. Það er alls staðar verið að beita auðveldum skyndilausnum og reddingum, en lítið um rökhugsun og langtímaplön. Það er fátt gert annað en að ausa peningum í allar áttir og stundum segja menn "skamm" í leiðinni þegar um veruleg og augljós fjársvik og ósvífni er að ræða. Það er hins vegar lítið verið að huga að kerfisbreytingum eða áhættusækni eða bættu lagaumhverfi, gagnsæi og eftirliti. Vitleysisganginum hefur verið breytt heilmikið en hann hefur alls ekki verið stöðvaður. 2007 viðhorfin ráða enn ferðinni algjörlega, núna er bara verið að soga skattpeninga inn í svarthol fjármálakerfanna, því almenningur og fyrirtækin eru þurrausin. Þangað er ekki hægt að sækja meira með beinum hætti.

Ísland fær lægstu einkunn

Bandaríkjaforseti gæti lært af smáríkinu.

Þannig virðist þetta nú vera, Bandaríkjaforseti ræður ekki mjög miklu þó hann sé tvímælalaust valdamesti maður heims. Jafnvel Hussein Obama sem hafði afgerandi stuðning þjóðar sinnar í upphafi valdatíðarinnar ræður ekki við eigið þing, hann ræður heldur ekki við fjármálaöflin í eigin landi, sem siga á hann alls kyns hagsmunahópum eftir því sem þurfa þykir. Hann hefur tapað vinsældum þjóðarinnar. Hann hefur verið upptekinn af alls kyns varnarbaráttu og fjárútlátum vegna efnahagskreppunnar heima fyrir. Bandaríkjamönnum finnst hann slappur að ráða þá ekki því sem hann vill á erlendri grundu. En okkur hinum finnst það kannski ekki eins skrýtið. Þó er það svo að völd hans koma best í ljós þegar hann er í stríðsrekstri á erlendri grundu. Hann er yfirmaður öflugasta hers í heimi og allt að því vinur Össurar Skarphéðinssonar frá í fyrravetur. En á bak við stríðsbröltið og vinskap þeirra Össurar liggja nú samt líka hagsmunahópar, peningaöfl, í Bandaríkjunum.

Hussein Obama ætti að taka sér forseta Íslands til fyrirmyndar, hann er þaulsetinn á valdastóli, ræður því sem hann vill, segir bara já eða nei eins og honum sýnist þannig að íslenska þingið snýst í hringi eftir geðþótta forsetans. Neitunarvald hans er óyfirstíganlegt. Og hann er svo vinsæll meðal fólksins að enginn svo mikið sem dirfist nú orðið að fara í framboð á móti honum. Bandaríkjaforseti sem væri svona sterkur í embætti væri ekki bara valdamesti maður heims, hann væri einræðisherra heimsins.

Þverrandi vinsældir Bandaríkjaforseta

Merkilegar upplýsingar frá AGS.

Það er all merkilegt að AGS skuli nú setja fram upplýsingar og gögn sem sýna með augljósum hætti að mjög erfiðir tímar séu framundan á Íslandi. Stjórnvöld hér hafa þusað um það lengi að við afgreiðslu Icesave og stóra lánsins frá AGS fari bjartari tímar í hönd og hröð keyrsla upp úr kreppunni. Viðskiptaráðherrann hefur sagt að þessi efnahagskreppa sé mest tölur á blaði sem skipti litlu máli. Nú er komin skýrsla frá AGS sem styður nú ekki þessar fullyrðingar, heldur leyfa þeir okkur að heyra það að við séum í djúpum skít og ekkert á leið út úr því ástandi á næstunni. Eða eins og forsetinn blessaður sagði og oft hefur verið vitnað til, "You ain´t seen nothing yet."

En björgina á þá sjálfsagt að sækja til ESB. Við eigum svo marga vini þar núna.

Engin gleðitíðindi í skýrslu AGS

Alls staðar sama villimennskan.

Þetta er eflaust alveg rétt sem Lévi-Strauss fann út, að enginn grundvallarmunur væri á frumstæðum ættbálkum annars vegar og þróuðum samfélögum hins vegar. Alls staðar ríkir sama villimennskan. Í þróuðu samfélagi er hún bara í öðru formi og víðtækari, er það ekki þróun?
Mannlegt eðli er alls staðar keimlíkt, það eru bara aðstæður og möguleikar til að beita því sem eru mismunandi.

Gott dæmi um þetta eru íslenskir víkingar. Fyrir 1100-1000 árum síðan þá tóku þeir undir sig fjármuni með vopnavaldi, drápum og hernaði. Það var frumstæða útgáfan.
Nú undanfarið hafa þeir sölsað undir sig ómældu fé með flóknum fjármálagerningum, lagaflækjum, markaðssetningu og sauðshætti stjórnvalda. Það er þróaða útgáfan.

Á þessu sést skýrt að mannlegt eðli fer ekki eftir því hvort samfélagið er þróað eða ekki, eðlið þróast sem sagt ekki.

Þetta var Lévi-Strauss löngu búinn að finna út, betur að þróun samfélaga hefði tekið eitthvað mið af þessari vitneskju. Eða kannski er það einmitt þannig.

Lévi-Strauss látinn

Hámark hræsninnar hjá Jóhönnu og Steingrími.

Ég er alveg sammála Jóhönnu og Steingrími um að þetta er dapurlegt, að foreldrar hafi verið að taka kúlulán fyrir hlutabréfum út á börnin sín. Þannig settu foreldrarnir fjárhagslega framtíð barnanna nánast að veði.

En það er líka nýtt hámark hræsninnar hjá þessum forystumönnum að vanda um út af þessu. Þetta er nú akkúrat það sem þau eru sjálf að gera með Icesave skuldbindingum og fleiru sem ríkisstjórnin skrifar undir á færiböndum, nema ekki er um örfá börn að ræða í þeirra tilviki, heldur heilar kynslóðir heillar þjóðar sem þau ætla að drekkja í skuldum út af kúlulánum og hlutabréfum meðal annars. Ja, þessu liði ferst að vanda um fyrir öðrum, þau mættu þá um leið líta í eigin barm og hugsa aðeins lengra en bara um ráðherraeftirlaunin. Það geta ekki allir bjargað sér á þeim.

Dapurlegasta dæmið um græðgina

Meira af CIT Group bankanum og útliti kvenna í USA.

Ég hef aðeins verið að kíkja á erlendar fréttir af CIT Group bankanum og það er ýmislegt þar sem er fróðlegt að lesa.

T.d. það að nú þykir vera góð tímasetning fyrir þessa sérhæfðu greiðslustöðvun þeirra þar sem fjármálakerfið almennt í USA er svo hrumt að óttaslegnir viðskiptavinir CIT Group geta vart fært viðskipti sín annað! Það eru fáir aðrir kostir í boði! Þess vegna halda menn að CIT Group muni halda viðskiptavinum þvert á venju við þessar aðstæður, en venjulega treysta menn ekki banka sínum eins vel og áður þegar hann er kominn í þrot og fara annað með sín víðskipti.

Svo þykir það líka heppilegt að jólavörurnar eru komnar í búðir í USA, en CIT Group þjónar fyrst og fremst litlum og meðalstórum fyrirtækjum af öllu tagi, m.a. smásölum. En þar sem vörurnar eru almennt komnar inn á lager verslana eða út í verslunina reiða menn sig á að úr því sem komið er taki birgjar sjénsinn á að fá greitt tímanlega fyrir jólaverslunina frá verslunareigendum því ljóst sé að ekki verði treyst á viðskiptabankann í þeim efnum þessi jól. Birgjarnir eiga því að taka að sér hlutverk bankans þessi jólin. Hins vegar hafa menn samtímis áhyggjur af lélegri jólaverslun þetta árið.

Timothy Geithner seðlabankastjóri Bandaríkjanna hefur áhyggjur af að lítil og meðalstór fyrirtæki geti ekki tekið þátt í að koma USA út úr kreppunni þar sem lítið sem ekkert fjármagn er í boði fyrir þessi fyrirtæki nú, m.a. vegna erfiðleika CIT Group, á sama tíma og seðlarnir flæða sem aldrei fyrr út í stórfyrirtækin! En þetta er nú einmitt það sama og við sjáum hér á Íslandi, stórfyrirtækin ganga í endurnýjun lífdaga með endalausum afskriftum, endurfjármögnun og bankafóstri á meðan þeim litlu blæðir út einu eftir annað.

Svo eru fleiri skrítnir fletir á þessu máli. CIT Group hefur verið bakhjarl um 60% fyrirtækja í framleiðslu og sölu á tískufatnði í USA. Erfiðleikar bankans kunna því að valda aukinni einsleitni í klæðaburði og fátæklegra yfirbragði kvenna í USA, komi ekki nýir aðilar að fjármögnun þessara fyrirtækja.

CIT Group í greiðslustöðvun

Frétt fyrir iðnaðarmenn og efnahagslífið.

Nú eru Stanley Tools og Black & Decker að renna saman í eitt fyrirtæki eftir yfirtökutilboð Stanley Tools á Black & Decker. Black & Decker framleiðir m.a. undir vörumerkinu DeWalt sem hefur verið vinsælt meðal iðnaðarmanna á Íslandi. Hluthafar í Black & Decker munu eiga um 49% í sameinuðu fyrirtæki, en gert er ráð fyrir að þessi samruni gangi í gegn á 1. ársfjórðungi 2010. Gert er ráð fyrir að sameinað fyrirtæki muni spara um 350 milljónir dollara á næstu 3. árum með sparnaði í yfirstjórn og hagræðingu í dreifingu og smásölu á vörum fyrirtækjanna.

Hagræðingin felur m.a. í sér fækkun starfsmanna, en nú starfa alls um 40.300 manns hjá fyrirtækjunum báðum, og er þetta enn eitt dæmið um stórfyrirtæki sem bregst við kreppunni og samdrætti í viðskiptum með því að segja upp fólki sem aftur leiðir til enn meira atvinnuleysis í USA og því að kreppan dýpkar enn þar. Uppsagnir starfsfólks eru því miður eðlileg framvinda og óhjákvæmileg keðjuverkun í fyrirtækjum sem reyna að bregðast við langvarandi kreppu og samdrætti.

Þess vegna er svo mikilvægt að stjórnvöld, bæði erlend og hér heima bregðist við samdrætti með einhverju öðru en að fleygja bara peningum í fjármálakerfið og hækka skatta og skera niður. Allt þetta þrennt getur bara aukið á kreppu en ekki dregið úr henni, því þetta leiðir allt til aukins atvinnuleysis og minni neyslu og umsvifa í þjóðfélaginu.