Þetta gildir bara fyrir suma, það þurfa ekki allir að ganga í takt.

Skv. fjárlögum á að hækka talsvert útgjöld til embættis forseta Íslands. Í það embætti á að eyða miklu meira fé en í að rannsaka "hrunið" og endurheimta fé úr því. Og það þótt ljóst sé að embættið hafi verið duglegt að leggja lóð á vogarskálar ógæfunnar. Og ekki verður séð að heldur eigi að hækka skatt á forsetann, hann þarf ekki að ganga í takti við þjóðina í neinu tilliti núna, enda hefur það víst ekki verið hans vani hingað til.

Mikil hækkun skatta í pípunum

Hneykslun vegna KSÍ stripphneykslisins er hneyksli.

Ég er hálf hneykslaður á því hvað fólk er upprifið yfir þessu KSÍ máli, þar sem nokkrar milljónir slysuðust óvart út af kreditkortum á einhverjum strippstað í útlöndum, eftir því sem fréttir herma. Mér skilst að meira að segja hafi náðst að endurheimta peningana að mestu eða öllu leyti þannig að eftir stendur bara skömmustulegur náungi og fullt af hneyksluðum gagnrýnendum sem ekki mega vamm sitt vita né annarra samlanda sinna.

Það sem hneykslar mig sérstaklega í þessu efni er að menn skuli ekki vera jafn hneykslaðir út af þeim lánum sem ríkisstjórnin er að taka og öðrum skuldbindingum sem hún er að ábyrgjast út af m.a. fjölmörgum sambærilegum málum. Eða hvað skyldu nú margar krónur hafa farið í fyllerí og slark og skylda hluti eða verri og vera hluti af því tapi og þeirri bólu sem menntamálaráðherra og aðrir ríkisstjórnar með limir ætlast til að þjóðin borgi á næstu áratugum. Ég get alveg fullyrt að ríkisstjórnin ætlar að láta þjóðina punga út meira en 3-4. milljónir út af því fylleríi og slarki sem hún ætlar að greiða fyrir. Og þarna tekst örugglega ekki að endurheimta svo mikið af peningum að slarkið fáist að fullu greitt og ekkert verði eftir nema skömmustulegheitin. Ég minni á að í svallveislum á góðæristíma útrásarinnar sem nú á að láta þjóðina greiða fyrir beint eða óbeint voru keyptir heimsfrægir tónlistarmenn eins og Tom Jones og Elton John, maturinn var kryddaður með ekta gulli, eðalvagnar voru fluttir yfir Atlantshafið til að snatta innanbæjar í Reykjavík eina kvöldstund, flugvélar voru fylltar með fyrirmönnum til að liðka fyrir velvilja þeirra við þjóðarránið og þeim flogið út í heim í spilavíti og á lúxushótel eða kappakstursmót og snekkjusiglingar, auk þess sem það var daglegt brauð hjá hópi manni að fljúga hver í kapp við annan á sem flestum einkaþotum vestur og austur um Atlantshaf. Ég er ekki frá því að Gróa á Leiti hafi sagt að Elvis heitinn Presley og Bob Marley hafi verið keyptir úr himnavist sinni eina kvöldstund til að halda veglega tónleika á hátindi útrásarinnar fyrir valda viðskiptavini og ýmsa eðalhöfðingja á sama tíma og samdar voru auglýsingar fyrir útrásarbanka sem sýna áttu fram á að bankarnir ættu skammt eftir í að opna útibú á fjarlægustu stjörnum sólkerfisins og myndu gera það um leið og samgöngur þangað yrðu reglulegar.

Kæru samlandar og bloggarar, reynið nú frekar að hneykslast svolítið á þessu víðáttumikla sukki sem ríkisstjórnin ætlar að láta okkur borga fyrir án þess að gera neitt í að ná neinu til baka. Það er mun þarfara en að leggja einn mann í einelti út af gömlu smámáli sem búið er að kippa í lag og bitnar ekki á neinum nema þeim eina sem hlut átti að máli. Það er ekki stórmannlegt að taka sig saman hver um annan þveran til að níðast á einum þó eflaust sé hægt að hafa hann undir ef allir leggjast á eitt. Mér finnst þetta bara hneykslanlegt því að á meðan sitja hinir stóru gangsterar heima sem ríkið ætlar að borga sukkreikninga fyrir og hlægja að íslensku smásálunum sem fá útrás á KSÍ manninum.

Bikíniganga - Keflavíkurganga.

Það væri gaman og athyglisvert ef Keflavíkurgöngur litu svona vel út eins og þessi bikiniganga í Ástralíu. Það er ekki það að bæði málefnin voru góð, en bikinigangan er greinilega miklu fréttnæmari og áhrifameiri en Keflavíkurgangan. Það hlýtur að vera úr því að þessi bikiniganga er fréttaefni á Íslandi. Ég þori allavega að veðja um að Keflavíkurgangan þykir ekki fréttnæm í Ástralíu þó bikiniganga Ástrala þyki fréttnæm á Íslandi. Hvað skyldi nú valda þessum mun á fréttnæmi þessara sambærilegu viðburða? Kannski fjölmiðlamenn svari því.

Bíkiniganga í Suður-Afríku

Meira um herskyldu á Íslandi og hernaðarstefnu ESB, að gefnu tilefni.

Ég skrifaði fyrr í dag bloggfærslu um væntanlega þáttöku okkar Íslendinga í hernaði ESB í framtíðinni. Það kom mér á óvart að fá athugasemd frá lesanda sem fullyrti að ég væri í þessari bloggfærslu að ljúga að sjálfum mér og þá líklega öðrum um leið. Ég hélt að Íslendingar sem almennt eru nokkuð vel menntaðir og upplýstir um umheiminn samanborðið við ýmsa aðra, væru ekki svona einfaldir afneitunarsinnar þegar kemur að einhverju sem illt er að láta orða sig við.

Þess vegna ætla ég nú, ef vera skyldi að fleiri svona afneitunarsinnar hafi lesið hið fyrra blogg mitt um þetta án þess að gera samt athugasemdir, að birta hér ítarlegri upplýsingar máli mínu til stuðnings og þeim til fróðleiks og íhugunar.

Í stjórnarskrá ESB segir orðrétt: "The Union shall have competence to define and implement a common foreign and security policy, including the progressive framing of a common defence policy." (Article I-12, paragraph 4)
Í lauslegri þýðingu þá segir í þessari grein að ESB skuli geta ákveðið og framfylgt sameiginlegri stefnu í utanríkis- og öryggismálum, þ.m.t. varnarmálastefna.

Þetta er mjög víðtækt vald sem þarna er stefnt að hjá ESB. Ef orðalagið sem notað er, öryggis og varnarmál, er misskilið af einhverjum, þá eru þetta þau orð sem notuð eru í dag yfir hernaðarmálefni. Ég veit ekki til að nokkurt ríki noti lengur orð eins og "war policy" yfir hermálastefnu sína eða "minister of war" eða "secretary of war" yfir hermálaráðherra. Þetta er í dag allt flokkað undir öryggis- og varnarmál.

En fleira úr stjórnarskrá ESB. "The European Union shall conduct a common foreign and security policy, based on the development of mutual political solidarity among Member States, the identification of questions of
general interest and the achievement of an ever‑increasing degree of convergence of Member States'actions. Þetta er úr "article I-40 paragraph 2".

Þarna kemur skýrt fram að Evrópuráðið geti ákveðið sameiginlega öryggis- og utanríkismálastefnu.

Þetta þýðir bara það sem það segir, Evrópuráðið getur ákveðið sameiginlega varnarmálastefnu. Sem sagt þeir geta ákveðið að Íslendingar þurfi að skaffa mannskap í hernað og blóðpeninga með. Eins og við vitum vel sem erum ekki í afneitun, þá eru varnir með ýmsum hætti í dag. T.d. hafa Bandaríkjamenn og Bretar ákveðið að verjast hryðjuverkamönnum með því að fara í stríð við þá og drepa sem flesta þeirra á þeirra heimavelli áður en þeir fremja hryðjuverk. Og þá skiptir engu þó margfalt fleiri, kannski þúsundfalt fleiri saklausir séu drepnir í leiðinni. Þess vegna er nútíma öryggis- og varnarmálastefna vestrænna ríkja ekkert annað en blóðugur hernaður. Og það er þetta sem Íslendingar munu þurfa að taka þátt í eftir inngöngu í ESB.

Jæja, best að koma með fleira úr stjórnarskránni okkar tilvonandi.
Þetta er tekið úr "Article I-41 paragraph 3."
Member States shall make civilian and military capabilities available to the Union for the implementation of the common security and defence policy, to contribute to the objectives defined by the Council. Those Member States which together establish multinational forces may also make them available to the common security and defence policy.

Þarna segir að aðildarríkin skuli leggja fram hernaðarmátt. Athygli vekur að þarna er ekki talað um varnargetu eða öryggisviðbúnað, heldur "military capabilities" eða hernaðarmátt og svo er talað um fjölþjóðaher (multinational forces).
Þá ætti það ekki lengur að fara á milli mála sem ég var að ræða í hinu fyrra bloggi að við Íslendingar þurfum að vera tilbúnir til að taka þátt í hernaðarbrölti ESB, bæði með mannskap og blóðpeninga.

Og það er fullt af fleiri greinum í þessari stjórnarskrá ESB sem undirstrika þessa stefnu enn betur. En ég nenni nú ekki að tyggja þetta allt hér oní fólk en bendi mönnum bara á að skoða þetta sjálfir á heimasíðu ESB.

Og eftir stendur spurningin, hvernig ætla Íslendingar að uppfylla herskyldu sína í ESB þegar þar að kemur?

Hér er tenging á stjórnarskrá ESB.
http://eur-lex.europa.eu/LexUriServ/LexUriServ.do?uri=OJ:C:2004:310:0011:0040:EN:PDF

Er Guð ekki svört múslimsk lesbía?

Mér er nú mikið til sama hvað Svíar gera í sínum trúmálum og hver sinnir hverju þar. En úr því þetta er fréttnæmt þá rifjast upp margvísleg umræða um Guð í gegn um tíðina. Þar hefur margt áhugavert komið fram.

T.d. telja svertingjar að guð sé svartur, enda styðja rannsóknir í mannfræði að fyrstu mennirnir séu upprunnir í Afríku og hafi verið svartir, en hvíti maðurinn sé seinni tíma gerð. Hafi þeir verið þannig af Guði gerðir er ekki ólíklegt að liturinn hafi verið valinn í samræmi við húðlit Guðs sjálfs.

Svo hafa margar áhrifakonur innan kirkjunnar (eða er það kallað kvennakirkja?) haldið því fram að Guð sé kona, ekki man ég nú sérstaklega rökin fyrir því, en eflaust eru þau góð.

Þá hafa samkynhneigðir talið það sjálfsagt að kirkjan þjóni þeim á allan hátt eins og öðrum og að Guð styðji það að fólk fjölgi sér með samkynhneigð rétt eins og öðrum aðferðum. Perraskapur ýmissa kirkjunnar þjóna vítt um heiminn í gegn um tíðina hefur líka bent til þess að ákveðins frjálsræðis megi gæta á þessum sviðum innan trúarinnar.

Múslimar og kristnir trúa líka á sama Guð. Og þar sem múslimarnir eru miklu fleiri en hinir kristnu er ekki óeðlilegt að álykta að Guð sé kannski meira múslimskur en hitt.

Þegar þetta er dregið saman er komin þessi ályktun að Guð er líklega svört múslimsk lesbía. En með þessu er auðvitað verið að persónugera Guð sem er kannski tóm vitleysa.

Lesbía vígð biskup

Ungt fólk athugið - Hvernig verður háttað herskyldu á Íslandi í ESB?

Þetta er spurning sem ég er spenntur fyrir að fá svör við áður en ég greiði atkvæði á móti inngöngu í ESB. Hvort sem kommúnistastjórnin tekur svo mark á atkvæðagreiðslunni eða ekki.

En eitt aðalsmerki ESB er sameiginleg utanríkisstefna. Með hverjum sáttmálanum eftir annan færist ESB nær þessu markmiði, og er raunar ansi stutt eftir í að það náist. En þegar að því kemur er gert ráð fyrir að stök ríki þurfi ekki að svara því hvert fyrir sig hvort þau ætla að taka þátt í hinu eða þessu stríðinu eða ekki. Það mun verða yfirstjórn ESB sem tekur ákvarðanir um slíkt fyrir hönd allra aðildarríkjanna. Og raunar er það eina sem er ekki alveg ljóst í þessu það hvort stofnaður verður sameiginlegur her ESB sem ESB þjóðirnar leggja sameiginlega til blóðpeninga og mannafla, eða hvort ríkin leggja sjálf til herdeildir og blóðpeninga frá sínum heimaherjum í hlutfalli við efnahag og íbúafjölda. Þetta er nokkuð sem Hitler hefði ekki getað gert betur, hvor leiðin sem verður valin. Þannig er nú Hitlerisminn í þessu.

En hvort sem verður þurfa íslensk stjórnvöld að fara að hugsa út í hvernig þau ætla að velja þá menn sem á að fórna í þessa blóðbaðsstarfsemi og hvar blóðpeningarnir verða teknir. Það er nauðsynlegt að þetta verði uppi á borðum þegar til atkvæðagreiðslu um inngöngu í þetta stórríki kemur.

Svo þarf auðvitað samhliða að huga að uppbyggingu landvarna Íslands. Því ekki er nú sjálfgefið að enginn nenni lengur að ráðast á okkur hér þegar við verðum orðin hluti af virku hernaðarbandalagi með því að leggja til bæði blóðpeninga og fórnarlömb í stríðsrekstur.

Einhverjir kunna að fyrtast og hugsa sem svo að þetta sé nú meira bullið í mér, en staðreyndin er sú að Bretar og Þjóðverjar og Frakkar og Ítalir og Pólverjar og Spánverjar eru löngu orðnir leiðir á að hernaðarbrölt Evrópu gegn múslimaríkjum og fleirum sé að mestu leyti á þeirra herðum, bæði varðandi mannfall og blóðpeninga. Þessi ríki vilja að þessi byrði leggist jafnt á allar ESB þjóðir. Ég fæ ekki séð að Ísland fái neina undanþágu frá þessu þó kannski séu til einhverjir draumórar um slíkt. Og hvergi hefur heyrst að ESB sé friðarbandalag þannig að ekki þarf að dreyma um að það dragi úr ófriði í heiminum fyrir tilstuðlan ESB.

Skynsamlegt mataræði á ögurstundu.

Ég rakst á frétt, eða upplýsingar, um mat sem fólki er ráðlagt að borða til að létta lundu og bæta andlegt geð í kreppunni. Kannski veitir ekki af öllum ráðum til þess, þannig að ég læt hér koma það helsta úr þessu.

Appelsínur, sítrónur og aðrir sítrusávextir. C vítamínið í þessu á að hjálpa fólki til að ráða betur við stress með því að draga úr stress hormónum.

Hnetur, efni í þeim hafa víst góð áhrif. Hneturnar auka ekki blóðsykurinn eða auka á skapsveiflur eins og sumt annað sem fólk borðar.

Blaðmikið grænmeti, t.d. kál og spínat, getur víst dregið úr þunglyndi og jafnvel aukið blóðstreymi til heilans sem er víst af hinu góða.

Feitur fiskur, eins og lax, makríll og sardínur hefur talsvert af Omega 3 fitusýrum sem eru til þess fallnar að draga úr þunglyndi og aldurstengdu minnisleysi. Á þessum tímum vil ég einmitt draga úr minnisleysi almennings gagnvart sviknum kosningaloforðum og annarri lygaþvælu sem hefur fallið eins og skriða á þjóðfélagið þannig að ég hvet alla til að borða vel af Omega 3 fæðu. Ef mig misminnir ekki er líka dálítið af Omega 3 í íslenskum eggjum frá fiskimjöli í hænsnafóðrinu þannig að þar er enn ein uppspretta af þessu góða efni.

Svo að lokum eru það þurrkuð kirsuber. Þau bæta líka minnið, draga úr heilaskemmdum og róa stressið.

Hér er svo tenging á upphaflegu fréttina.

http://health.yahoo.com/featured/57/the-best-get-happy-foods/

Húrra fyrir Berlusconi.

Síðan Berlusconi tók við embætti er búið að klófesta helling af mafíósum á Ítalíu. Það er annað en hér á landi, hér ganga allir lausir sem eru viðriðnir eitthvað sem getur talist meiriháttar spilling og þaðan af verra. Svo er alltaf verið að hlægja að Berlusconi fyrir talsmáta og kvennafar og auðvitað spillingu. En hann er sem sagt ekki verri en svo að eitthvað er nú tekið betur á málum á Ítalíu en Íslandi. Og þrátt fyrir að brandarakallinn Berlusconi sé við völd á Ítalíu hefur mafían ekki náð sömu tökum á efnahag þess lands og fáir menn hafa náð á efnahag Íslands. Spáiði í þetta Steingrímur og Jóhanna. Skyldi ekki vera tími til kominn að taka á spillingunni hér. Við þurfum kannski bara að sækja um aðild að Ítalíu til að eitthvað verði gert hér í þessu. Óþarfi að ganga í allt Evrópusambandið.

Mafíósaforingi handtekinn

Auðvitað þarf að halda minningu Hitlers á lofti, til þess eru vítin að varast þau.

Ég hef áhyggjur af fólki sem vill setja jarðýtu á allt sem Adolf Hitler kom nálægt á sinni tíð. Þvert á móti á að varðveita sem flest af þessu og hinni ljótu sögu Hitlers. Fólk sem vill bara eyða öllu sem minnir á Hitler er bara að fara fram á að saga Evrópu og heimsins sé ritskoðuð og fegruð.

Mér þykir það m.a. undarlegt að sjá hér á blogginu að því er haldið fram að Arnarhreiður Hitlers við Obersalzberg í Austurríki hafi verið afmáð. Þetta er vinsæll ferðamannastaður í dag og mikill ferðaiðnaður sem tengist bæði "Kehlsteinhaus", sem var tehús Hitlers þarna á fjallinu, sem og alls konar leynigöngum og öðru sem tengist Hitler. Ég hef skoðað þetta sjálfur og finnst bara sjálfsagt að sem flestir sem eiga leið þarna um geri það.

Í Berlín er að mig minnir gamalt leikhús sem var vel sótt á sinni tíð af nazistaforingum, ég veit ekki betur en Íslendingur nokkur hafi endurnýjað þetta leikhús að einhverju marki og hafið þar starfsemi að nýju fyrir nokkrum árum. Besta mál.

Kannski kemur það við kaunin á einhverjum í dag að Hitler var þrátt fyrir allt ekkert voða ólíkur sumum þjóðarleiðtogum hins vestræna heims í dag. Hann var tedrykkjumaður eins og Gordon Brown, drakk te á hverjum degi. Hann vildi leggja undir sig stóran hluta Evrópu og fór í stríð til þess. Nú er þetta að gerast, en bara ekki með stríði, heldur eru valdablokkir í Evrópu að leggja undir sig ríki álfunnar með ESB og evrópukommúnismanum. Tækið sem er notað núna er áróður og efnahagsþvinganir.

Hitler þoldi einhverra hluta vegna ekki gyðinga og vildi útrýma þeim. Nú beinast öll spjót vesturlanda að múslimum. Múslimi er nánast orðið samheiti yfir hryðjuverkamenn í huga margra íbúa vesturlanda vegna stöðugs áróðurs fyrir þessari skoðun. Og Evrópusambandið í félagi við Bandaríkjamenn stendur fyrir látlausum hernaði gegn múslimaþjóðum. Afghanistan, Írak, Palestína og kannski bráðum Íran.

Sem betur fer hefur tekist að útrýma nazisma að mestu leyti í heiminum. En Hitlerismi lifir góðu lífi í Evrópu ennþá, því miður. Þess vegna vil ég halda minningu Hitlers sem hæst á lofti til að reyna að forða því að saga hans endurtaki sig meira en orðið er.

Óttast hverjir kaupi heimili Hitlers

Bankasíslefandi þjóðarleiðtogar.

Það eru ótrúlegar þessar hugmyndir Gordons Brown, þar sem hann vill stofna sjóð til að bjarga bönkum í framtíðinni. Er ekki nóg komið af þessari dæmalausu vitleysu og síslefi þjóðarleiðtoga út af vonlausum bankamönnum? Af hverju mega þessir bankar ekki bara fara á hausinn þegar þeir hafa tapað öllu sem þeim er trúað fyrir? Af hverju fá bankar að braska með peninga? Af hverju eru engin takmörk á því hvað bankamenn geta greitt sér í laun og kaupauka? Af hverju er bankaleynd? Af hverju er ekki strangara lagaumhverfi fyrir bankarekstur? Af hverju er ekkert gagn að endurskoðendum og lögmönnum bankanna, fjármálaeftirliti og öðrum stofnunum? Af hverju eiga skattgreiðendur alltaf að borga tap bankanna? Af hverju geta greiningardeildir banka aldrei séð fram í tímann? Af hverju eru stjórnmálamenn alltaf eins og aumingjar þegar bankamenn væla?

Það ætti frekar að svara þessum spurningum og breyta til eftir niðurstöðum þeirra en að fara að stofna sjóði svo skattgreiðendur geti farið að borga tap bankanna fyrirfram. Hvernig ætli bankarekstur yrði í framtíðinni ef það eina sem kemur út úr þessari kreppu verða fyrirframgreiddir sjóðir til að mæta tapi í framtíðinni. Skyldi það nú veita mikið aðhald?

Meiri hálfvitinn þessi Gordon Brown. Hann er ekki betri en Ólafur Ragnar, útrásarvinurinn mikli.

Og þið þarna í ríkisstjórninni, Steingrímur, Jóhanna og Gylfi, þið ættuð að taka þetta til ykkar líka.

Brown vill samfélagssáttmála um bankana

Ísland án eiturlyfja 2000.

Þetta er nú gamalt slagorð úr stefnumálum ISG frá fyrri árum. Þetta koðnaði auðvitað niður eins og flest annað sem hún ætlaði að gera. Ég býst ekki við að þeir sem standa í mansalsstarfsemi verði neitt sérstaklega áhyggjufullir þó ISG fái embættið. Sjálfsagt er hún líka frekar að leita sér að vegtyllu til undirbúnings einhverra betri bitlinga þegar Ísland verður komið í ESB.

Ég held hins vegar að það hafi ekki góð áhrif á baráttu gegn mansali að afdankaður íslenskur pólitíkus fari að stýra slíkri baráttu, þó vissulega virðist ISG hafa umtalsverða reynslu af kynnum við glæpasamtök frá tíma sínum sem formaður Samfylkingar.

Ingibjörg Sólrún til Vínar?

Klaufalegt.

Þetta er óskaplega klaufalegt hjá honum Drury fyrrverandi sjúkraflugmanni, að halda að Bresk lögregla kokgleypi það að íslensk kona hafi verið á bílnum hans út af smásekt og punktum sem hann vildi ekki fá. Það hefði verið miklu trúverðugra fyrir hann að ljúga að hann hafi verið að flýta sér í bankann sinn að taka út peninga áður en íslensk kona setti hann í þrot. Þessu hefðu menn frekar trúað og sýnt honum samúð og skilning fyrir. Þá hefði sennilega ekki komist upp um kauða.

Laug umferðarlagabroti upp á íslenska konu

Geðlæknir, geðsjúklingur, hermaður guðs eða hryðjuverkamaður?

Fyrst þegar maður heyrði fréttir af þessu ljóta mála í USA var lögð áhersla á að maðurinn væri geðlæknir.

Ég hugsaði sem svo "hann hefur ekki verið geðlæknir, hann hefur verið geðsjúklingur"

Svo komu fleiri fréttir af málinu og fram kom að maðurinn hefði verið á geðlyfjum sem m.a. hafa þannig aukaáhrif að menn geta tekið hræðileg æðisköst.

Þá hugsaði ég; "Þeir eru alltaf jafn ótrúlega vitlausir þessir Bandaríkjamenn að láta geðsjúklinga ganga með skotvopn"

Svo koma nú fréttir af því að maðurinn hafi verið heittrúaður múslimi sem hafi verið mjög ósáttur við starfsemi vinnuveitanda síns í múslimaheiminum og hafi ákallað guð þegar hann hóf morðárásina.

Þá hugsaði ég; "Þeir hafa þá líklega bara haldið fram þessari geðveiki til að breiða yfir að það væru heittrúaðir múslimar í Bandaríska hernum".

Fleiri fréttir hafa ekki borist af málinu ennþá en ég er að hugsa;
"Líklega endar þessi fréttaflutningur með að því verði haldið fram að maðurinn hafi verið útsendari hryðjuverkasamtaka sem hafi laumað sér í raðir Bandaríkjahers."

Öfgaskrif vöktu athygli FBI

Óvænt skuldabréf finnast! The Untouchables og afkastalitla ljósritunarvélin.

Það er líklega nokkuð merkilegt að þegar menn fletta bókhaldinu í einum bankanum skuli allt í einu poppa upp skuldabréf upp á 139 milljarða! Er bókhald bankanna svo ógreinilegt að það þurfi að fara í gegn um skjalageymslur og bókhaldsgögn staf fyrir staf til að finna út rétta stöðu! Og ekki nóg með það heldur þarf líka að leita til sérfræðinga til að rekja slóð þessara skuldabréfa. Af hverju þarf að spreða í að ræsa út sérfræðingateymi til að finna út úr þessu. Þó starfsemi bankanna hafi verið ansi frjálsleg á köflum þá tel ég öruggt að æðstu stjórnendur bankans hljóti að hafa vitað af þessu. Upphæðin er slík.

Ég hefði nú haldið að það séu ekki nema í mesta lagi 3 menn sem þarf að spyrja um þetta, Jón Ásgeir Jóhannesson, Bjarni Ármannsson og Lárus Welding. Einhver þeirra hlýtur að vita eitthvað um þessi skuldabréf, þau eru nú 139 milljarðar! Og ekki ólíklegt að einhver þeirra viti ekki bara af þeim heldur eigi jafnvel einhverra beinna hagsmuna að gæta í sambandi við þessi bréf. Af hverju eru þessir menn ekki bara spurðir um þetta, má ekki tala við þá? Eru þeir ósnertanlegir? Jú, þeir njóta víst vinskapar Samfylkingarinnar, sænskættaðrar hlutleysisstefnu VG og þess að vera alveg sárasaklausir af aulahætti, klaufaskap, hálfvitahætti, spillingu, markaðsmisnotkun, krosseignatengslum, misnotkun, fjársvikum, bókhaldsóreiðu, bankarán o.s.frv. þar til sekt er sönnuð. Og af því að engin sekt hefur verið sönnuð þá má sjálfsagt ekki spyrja þá um eitt eða neitt. Það virðist helst ekki mega handtaka eða yfirheyra nokkurn mann hér fyrr en eftir að sekt hans hefur verið sönnuð. Þar með er auðvitað aldrei hægt að sanna eitt eða neitt. Þannig virkar nú hið lagaflækjulega krosstengingarhindrandisakleysistryggingarkerfi íslenska réttarkerfisins.

Þetta kerfi ásamt afkastalitlu ljósritunarvélinni hjá Ríkissaksóknara ætti að tryggja ágætlega frelsi útrásarvíkinga um ókomna tíð.

Óháðir sérfræðingar skoða tilvist skuldabréfa Glitnis

Hef áður birt vísu sem lýsir þessu ágætlega, hér kemur hún aftur.

Ég er svo heppinn að heyra oft vísur, misgóðar að vísu, um eitt og annað sem er í fréttunum á hverjum tíma. Ekki er langt síðan ég birti eina í tilefni af fréttaflutningi sama eðlis og hér er. Hún á því alveg jafnvel við um þessa frétt og er ágætis áminning um fleira sem eflaust á eftir að koma upp á yfirborðið.

Vísan er svona.

Ljúga, svíkja, pretta og stela,
víða eru sýkingar.
Ennþá hafa margt að fela,
bankamenn og víkingar.

Skulda milljarð út á jarðakaup