Alls ekki stærstu mistök Íslandssögunnar, en stór mistök samt, sjá meðf. lista.

Þessi Icesave samningur er að sjálfsögðu mistök frá upphafi til enda. Í honum hafa stjórnvöld á Íslandi, í Bretlandi og Hollandi, öll sameinast um að gera samning sem stangast á við reglur ESB sem öll þessi ríki hafa skuldbundið sig til að fara eftir. Það er kannski smá vonarglæta fólgin í því að samningurinn er ólöglegur því sennilega verður alltaf hægt að krefjast ógildingar á honum kæmi fram meirihlutavilji þjóðarinnar um slíkt. Líklegt er að stjórnvöld yrðu við nákvæma athugun á þessum samningi úrskurðuð óhæf og samningurinn ógiltur. En auðvitað yrðum við að sýna þá skynsemi að losa okkur ekki bara undan þessum samningi, heldur að losa okkur líka við þessi arfavitlausu stjórnvöld sem ekki er treystandi fyrir hagsmunum þjóðarinnar upp á 5 aura eða meira.

En þessi samningur er örugglega ekki stærstu mistök Íslandssögunnar eins og Höskuldur Þórhallsson óttast að geti verið tilfellið. Þetta er örugglega rangt ályktað hjá Höskuldi þó hann geri sér réttilega grein fyrir að þessi samningur sé mikil mistök.

Ég hef verið að taka saman lista yfir stærstu mistök Íslandssögunnar og hef birt hluta af honum hér á bloggi mínu áður, en nú hef ég lítillega aukið við hann og kemur hér nýjasta útgáfan.

Nr. 1. á listanum yfir mistök Íslendinga að mínu mati var þegar við týndum Ameríku eftir að hafa fundið hana.
Nr. 2. á þessum lista er útrásin sem við erum að súpa seiðið af núna.
Nr. 3. á listanum er svo að við skulum þráast við að tala íslensku með öllum þeim ókostum og kostnaði sem því fylgir.
Nr. 4. á listanum var þegar við bökkuðum Jörund hundadagakonung ekki upp í að losa okkur undan einokun Dana, sem var erindi hans til Íslands á sínum tíma.
Nr. 5. á listanum er núverandi ríkisstjórn og þær byrðar sem hún ætlar að leggja á þjóðina vegna útrásarhrunsins, þ.m.t. Icesave.

Stærstu mistök Íslandssögunnar

Ástþór og Styrmir sammála.

Það var afar fróðlegt að hlusta á Styrmi Gunnarsson í Kastljósinu áðan. Hans pólitíska sannfæring er sú að það þurfi að færa valdið til fólksins og draga úr leynd í þjóðfélaginu, eða öllu heldur að hafa allt uppi á borðum.

Þetta eru akkúrat áherslur Ástþórs Magnússonar og Lýðræðishreyfingarinnar fyrir síðustu kosningar. Þá var þjóðin auðvitað of merkileg með sig til að hlusta á Ástþór en nú er spurning hvort þetta þykir gáfulegra þegar það er Styrmir Gunnarsson sem hefur þessa skoðun. Eða hvort hann fellur bara í ónáð hjá Íslendingum fyrir að hafa þá sannfæringu að þessara breytinga sé þörf.

En fyrir okkur í Lýðræðishreyfingunni er þetta ánægjulegur liðsauki við okkar málstað sem hingað til hefur ekki átt upp á pallborðið hjá nema rétt um 1000 Íslendingum.

Það var raunar fleira sem Styrmir var okkur sammála um. Hann fullyrðir að Íslendingar eigi ekki að borga Icesave sé farið eftir regluverki ESB sem við höfum löngu samþykkt að fara eftir. Þetta var nú annað sem við lögðum áherslu á í kosningabaráttunni. En niðurstaðan varð sú að þjóðin valdi sér leiðtoga sem vilja ekki fara eftir reglum ESB sem við höfum undirgengist. ESB vill reyndar ekki fara eftir þessum reglum heldur. Þessir aðilar eru allir sammála um að brjóta regluverkið svo kúga megi Íslendinga til að borga það sem þeim ber ekki að borga.

Og þá var fróðleg umræða Þóru og Styrmis um hvernig hann var í tengslum við fjölda áhrifamanna í þjóðfélaginu til að Mbl. gæti skrifað um þjóðmálin og ritstjórar blaðsins myndað sér skoðanir á þeim. Þóru þykja það greinilega undarleg vinnubrögð Styrmis að vera í miklu sambandi við þá sem hann er að fjalla um. En ef Styrmir og Mbl. voru eini fjölmiðillinn sem vann svona þá skýrir það auðvitað af hverju hinir fjölmiðlarnir meta oft léttvægt það sem er í gangi í hverju sinni. Hvernig er hægt að flytja fréttir ef það er almenn stefna fjölmiðla að vera ekki í sambandi við fólk í þjóðfélaginu? Þessi óvænta afhjúpun Þóru á verklagi fjölmiðlanna skýrir líklega að verulegu leyti af hverju útrásarvíkingar hafa alla tíð skautað létt með sín "einkamál" framhjá flestum fjölmiðlum. Enda virðast ýmsir fjölmiðlar hafa meiri áhuga á að dekra við sína vini á ýmsum sviðum en að kafa í þjóðfélagsmálin á gagnrýninn hátt.

Saga film, gefið þetta út og seljið í Bónus eða sýnið í sjónvarpi.

Það er nú margt bölvað ruslið sem selt er í Bónus meðfram matvöru og öðrum nauðsynjum. T.d. allskonar tónlist og myndir á DVD. Ég held að þetta You Tube myndskeið hafi nú verið það áhugavert að ef myndin öll væri gefin út þá myndi hún seljast vel í Bónus og jafnvel víðar. Þarna voru heimsfrægir skemmtikraftar, góð tónlist, flott umgjörð, gellur í stuði og kaldir kallar, svo James Bond og fláráðu konurnar hans blikna í samanburði. Því megum við ekki bara sjá þetta og hafa gaman af? Til hvers var verið að taka þetta partý upp á videó ef það má ekki sýna það? Hættið nú að sýna okkur einhverjar þurrar fræðslumyndir og leiðinlega undirfjármagnaða þætti af ýmsum toga. Leyfið þjóðinni nú að sjá þegar þið hafið loksins búið til almennilegt sjónvarpsefni. Hvers konar bisniss er það hjá ykkur að geyma allt besta efnið oní skúffu og leyfa engum að sjá??

Snýst um lítinn bút í Baugs myndbandinu

Heildarskuldir þá ca. 2667 milljarðar.

Skv. þeim upplýsingum sem fram koma í fréttinni eru heildarskuldir gamla Glitnis hátt í 2.700 milljarðar króna og fara hækkandi. Skyldu nú vera einhverjar eignir sem eitthvað munar um upp í þetta í þrotabúinu? Eða verður þetta tapið af Glitni? Það verður fróðlegt að fá nýjar tölur þegar kröfulýsingarfrestur er liðinn.
Þessu tapi stjórnuðu Jón Ásgeir, Bjarni Ármannsson og Lárus Welding. Snjallir menn þessir kappar. Skyldi einhver þeirra vera búsettur á Íslandi ennþá?

Veruleg skuldaaukning Glitnis

Óskiljanlegir viðskiptahættir símafyrirtækja.

Ég hef oft furðað mig á því hvað gjaldskrár símafyrirtækja eru flóknar og furðulegar. Viðskiptavinir geta t.d. hringt "frítt" í hina og þessa. En þessa þjónustu þarf að kaupa. Og hvað er þá "frítt" ef þú þarft fyrst að kaupa það.

Svo eru aðrar útgáfur af þjónustunni þannig að þú hringir á mismunandi taxta eftir því hvort það er virkur dagur eða helgi eða kvöld eða nótt eða hvort símafyrirtækinu dettur í hug að hafa þjónustuna fría einhvern daginn upp úr þurru.

Alkunna er einnig að það er mjög misdýrt að hringja í síma sem eru skráðir hjá öðru símafyrirtæki en því sem þú skiptir sjálfur við, ég tala nú ekki um ef það á að hringja milli mismunandi kerfa, t.d. fastlína og farsími eða ef hringt er milli mismunandi kerfa og fyrirtækja. Þá rjúka reikningar upp. Og ef menn nota nú símann í útlöndum þá er hægt að eyða mánaðarlaunum í símakostnað á nokkrum mínútum. Og enn versnar þetta ef verið er að nota símann til að vafra um netið eða senda myndir, þá hækkar flækjustig gjaldskránna enn. Samt er það alltaf þannig að þú færð aldrei viðvörun þegar þú velur eitthvað númer eða þjónustu, um að þetta kosti t.d. x krónur mínútan. Öll þessi þjónusta er þannig óverðmerkt, þó takmarkaðir verðlistar séu kannski einhver staðar á lítt áberandi stað á vefsíðu. Það eru engar upplýsingar um hjá hvaða símafyrirtæki númerin eru sem þú ert að hringja í og því getur þú aldrei vitað fyrirfram hvaða taxta þú þarft að borga fyrir símtalið. Þetta er fáránlegt.

Það þyrfti að skikka þessi fyrirtæki til að taka upp betri viðskiptahætti, einfalda gjaldskrár og verðmerkja þjónustuna þannig að fólk geti vitað fyrirfram hvað það kostar að hringja í tiltekið númer eða nota ákveðna þjónustu. Símafyrirtæki eru alveg aðhaldslaus fyrirbæri í dag. Verst er að markaðssetningin gengur mikið út á að plokka fé af börnum og unglingum sem fá smá útrás fyrir tækjadellu með því að eiga og nota flottan farsíma.

Alflottast væri auðvitað ef þessi fyrirtæki hefðu sjálf manndóm í sér til að stunda sanngjörn viðskipti með eðlilegum viðskiptaháttum. En þetta eru nú allt fyrirtæki tengd útrásinni, hlekkur í þeirri keðju sem skrapar botninn í sparibaukum barnanna og annarra landsmanna. Þannig að það er kannski bið á breytingum þarna.

Vefsíðum lokað vegna hringitónasvindls

Er jafnrétti alltaf til bóta?

Þegar maður les þessa grein vaknar þessi spurning, er jafnrétti alltaf til bóta? Það er nefnilega ljóst að þau norðurlönd sem fara verst í þessari kreppu sem nú gengur yfir eru Ísland og Finnland og það eru einmitt sömu löndin og hafa náð lengst í jafnrétti kvenna í stjórnmálum. Í þessum löndum einum er hlutur kvenna í ríksstjórn 50% eða meiri. Og það norðurlandanna sem sleppur best frá kreppunni er einmitt sama land og er styst komið varðandi jafnrétti í stjórnmálum, Noregur.

Og af þessum sökum veltir maður fyrir sér hvort þetta sé tilviljun eða hvort eitthvert samhengi sé þarna á milli.

Getur t.d. verið að konurnar í ríkisstjórnum forðist að taka á peningamálum en einbeiti sér frekar að velferðarmálum og menntamálum. Ef svo er þá eru einfaldlega færri sem eru að ráðskast með fjármálin og færri sjónarmið vegin í þeirri umræðu. Það væri eðlilegt að slíkt leiddi oftar til verri niðurstöðu.

Eða gæti verið að hin margumtalaða hagsýni kvenna sé fremur kreppukvetjandi en hitt og auki því fremur vandann en að leysa hann.

Eða gæti kannski verið að það að finna bara einhverjar konur til stjórnmálaþáttöku hafi leitt til þess að kvennakvótar hafi verið uppfylltir án þess að horft sé til gæða eða mannkosta viðkomandi einstaklinga og því séu kvenmargar ríkisstjórnir einfaldlega með of litla reynslu og of lága greindarvísitölu til að ráða vel við verkefnin.

Þetta eru kannski vangaveltur sem eiga ekki upp á pallborðið hjá mörgum þannig að ég ætla að stoppa hér. Geri ráð fyrir að eðlilegasta skýringin á þessu sé bara eintóm tilviljun. Tilviljanir geta verið svo skemmtilegar og undarlegar.

Atvinnulífið eftirbátur þegar kemur að jafnrétti

Rétt að kreista þá aðeins.

Þetta var þörf hugleiðing hjá Styrmi. Það myndi kannski aðeins vekja Samfylkingarliðið í ríkisstjórninni ef farið yrði að athuga þetta í alvöru. Þeirra ráðherrar væru þá sumir hverjir undir smásjánni og það vilja þeir örugglega ekki. Þetta gæti því orðið til þess að þeir færu að svíkja málstaðinn, þ.e. útrásarvinina í hendur saksóknara til að sleppa betur sjálfir. Eitthvað þarf að gera til að rjúfa skjaldborgina um útrásina.

Eins og staðan er núna er raunar ekki að sjá að neinir glæpir hafi verið framdir í viðskiptalífinu. Eftir rannsóknir og gauragang í þjóðfélaginu í heilt ár hefur enginn verið ákærður fyrir eitt eða neitt sem þessu útrásar- og bankahruni tengist. Einn lítill aðili hefur þó lent í kyrrsetningu eigna að því talið er vegna innherjaviðskipta. Ráðamenn verða auðvitað ekki dregnir fyrir Landsdóm nema ljóst sé að eitthvað ólöglegt og óeðlilegt hafi verið gert. Forsenda þess að álykta sem svo að glæpur hafi verið framinn er að einhver sé ákærður fyrir einhvern glæp. Þar sem það hefur ekki verið gert enn er örugglega langt í að Landsdómur verði vakinn til starfa.

Ráðherrar fyrir dóm?

Var þetta ekki í boði Bónuss?

Mér finnst það ætti nú að selja spóluna í fullri lengd í Bónus á 1990 kr. Þetta er hvort eð er greitt af viðskiptavinum þar og fleirum. Annars er skítt að kúnnunum skuli ekki boðið í svona partí. Þetta hefur verið virkilega flott og gaman. Ég var að velta fyrir mér því að það ætti í nýjum bókhaldsreglum að setja skýrt fram hverjum skuli boðið í stórveislur og sukkpartý í framtíðinni. Það gengur ekki að örfáir einstaklingar einoki þetta. Mér finnst nú að húsmæður og aðrir sem hafa vegasamað Baugsfeðga fyrir að vera þeir menn sem mest hafa gert fyrir alþýðu Íslands ættu að fá að fara í þessi partí líka.

En þessi umræða er kannski alltof seint á ferðinni, verða ekki bara eintómar jarðarfarir í boði þessara fyrirtækja á næstu árum? En þær geta að vísu verið skemmtilegar líka.

Stuð með Baugi í Mónakó

Loksins, þessu er búið að bíða eftir í rúmt ár.

Það var mikið að ástæða þótti til að gera eitthvað. Við erum ansi margir sem erum búnir að kalla á svona aðgerðir í rúmt ár. Loksins var einhver stoppaður. Það er verst að þessi maður er nú hálfgert peð í þessu öllu saman. Aðalmennirnir virðist nú enn fá að vera utan við lög og reglu í þessum efnum, kannski breytist það, kannski ekki. Það verður hins vegar fróðlegt að sjá þegar þessar eignafrystingar verða skoðaðar betur, að sjá hvað mikið hefur tapast á þessu ári sem ekkert hefur verið gert til að verja almannahag. Það er hætt við að það séu stórar fjárhæðir sem búið er að koma undan á þessum rúma tíma sem mönnum hefur verið gefinn til þess.

Staðfestir kyrrsetningu

Aumingjaskapur.

Þessi fjárlaganefnd er nú meiri eymdin. Málið er að það skilja það allir ágætlega nema kannski fjárlaganefnd og ríkisstjórnin að ríkissjóður stefnir hraðbyri í greiðsluþrot. En þá ákveður þetta lið að tala um að þjóðarbúið stefni ekki í greiðsluþrot. Hvaða fyrirtæki er þetta fjandans þjóðarbú. Ég vil að menn tali um eitthvað sem er allavega til á pappír. Þjóðarbú er eitthvað sem hefur ekki kennitölu og er ekki sjálfstæður lögaðili. Taliði um eitthvað sem er til.

Og málið er að það er ekki bara ríkissjóður sem er í dauðateygjunum, heldur á að niðurskera og skattleggja allt og alla þannig að ekkert verði eftir með lífsmarki þegar þessari vitleysu lýkur. En þetta breytist víst ekki þó allir sjái hvert stefnir. Þjóðin kaus og ákvað að treysta á þetta lið og AGS. Við hinir sem vildum annað erum svo dregnir með í þennan óþarfa efnahagsdauða, þannig er lýðræðið.

Ekki hætta á greiðsluþroti

Ríflega verðmæti Íslands, 5.300 milljarðar tapast sem sagt alveg.

Ég þarf víst að uppfæra hjá mér tölur yfir tapið af útrásinni. Það er greinilega miklu meira en áður hefur verið gefið upp. Tap vegna Landsbankans skv. þessum tölum er ríflega fasteignamat alls Íslands, eins og það leggur sig. Matið var 4.247 milljarðar um síðustu áramót. Það má því segja að Landsbankinn hafi tapað Íslandi og vel rúmlega það svo maður setji tölurnar nú í samhengi við eitthvað sem menn þekkja og skilja. Þá þarf að hafa í huga að það sem fæst upp í þrotið er ekki fast í hendi, þar er um að ræða einhver verðmæti sem eru áætluð og vonir standa til að takist að breyta í peninga á næstu árum. Miðað við efnahagsþróun í heiminum um þessar mundir og það að ekki hefur tekist að auka atvinnu í USA og Evrópu, þá eru líkur til að þegar upp verður staðið verði efnahagsþróunin óhagstæð þrotabúi Landsbankans. Það þýðir einfaldlega að þessir vonar um eignir upp í forgangskröfur eru byggðar á mikilli bjartsýni og líklega að svona mikið fáist aldrei upp í kröfurnar. En það verður gaman að sjá hvernig þetta þróast. Vonandi lifir maður að sjá hvernig þetta fer að lokum.

6500 milljarða kröfur

Svar Kínverja við kvörtunum Bandaríkjamanna vegna lágs gengis gjaldmiðils Kína.

Það að biðja Bandaríkjamenn um að hverfa frá verndarstefnu sinni á ýmsum sviðum viðskipta er greinilega svar Kínverja við mörgum beiðnum Bandaríkjamanna þess efnis að Kínverjar breyti gengisskráningu á gjaldmiðli sínum. Kínverjar hafa notað gengisstýringu til að halda gengi gjaldmiðils síns svo lágu að þeir eru alltaf samkeppnisfærir við nánast allar aðrar þjóðir á sviði hvers kyns framleiðslu og iðnaðar. Þetta hefur pirrað Bandaríkjamenn mikið því ýmiss þarlendur iðnaður hefur dregist mikið saman og fyrirtæki flutt starfsemi sína til Kína vegna hagstæðs verðlags. Þó er þessi pirringur í og með þeirra einkamál því það er nú bara þeirra eigið val að versla við Kína en ekki sína heimabyggð. Það er allavega ljóst að það er létt efnahags- og viðskiptastríð í gangi milli þessara þjóða.

Kínverjar skora á Bandaríkjamenn að hverfa frá verndarstefnu

Lifi verðbólgan og vísitöluhækkanir og ráð AGS!!

Ég held því miður að það sé rétt sem fram kemur í fréttinni að menn hafa haldið aftur af sér með verðhækkanir í þeirri von að gengið færi að styrkjast aftur. En gengið fer ekki að styrkjast svo neinu máli skipti þó það sé hætt að falla og því á heilmikil óinnleyst verðbólga eftir að koma fram þegar menn geta ekki lengur komist hjá að selja vörur á því verði sem þær raunverulega þurfa að kosta miðað við innflutningsverð.

Háir stýrivextir og skattahækkanir vega einnig þungt í beinum verðbólguáhrifum. Háir vextir leiða til mikils fjármögnunarkostnaðar sem þarf að setja út í verðlagið og skattahækkanir eru bara viðbótarkostnaður sem þarf að bæta við vöruverð. Hvort tveggja viðheldur mikilli verðbólgu og vísitöluhækkunum á lánum landsmanna.

Svo eru óbein áhrif hárra stýrivaxta að auki þau að gjaldeyrir flæðir úr landi langt umfram það sem þyrfti að vera í formi hárra vaxtagreiðslna af erlendum skuldum og þannig þrýsta þessir háu stýrivextir gengi króunnar niður og halda því þar ásamt því að tryggja hér verðbólgu og stöðug vandræði í fjármálakerfinu.

Svona erum við nú stödd undir leiðsögn Alþjóða gjaldeyrissjóðsins. Þetta er það sem við höfum fengið eftir dugnað ríkisstjórnarinnar við að þjónkast þessum sjóði. Hins vegar bólar ekkert á lánunum stóru sem öllu áttu að bjarga. Ég get sennilega farið að skrifa bráðum framhald sögunnar af asnanum og gulrótinni sem birtist hér á bloggi mínu fyrir nokkrum vikum. En sú saga skýrir ágætlega samskipti ríkisstjórnar Jó Steins við AGS og það sjálfskaparvíti sem ríkisstjórnin er að skapa þjóðinni með vitlausum aðgerðum sínum.

Beðið færis til þess að hækka vöruverðið

Vel að verðlaunum kominn, en..

Þorsteinn frá Hamri er alls góðs verður. En ég vil nota tækifærið og minna á að íslenskan er ekki bara sérkenni sem þjóðin ber sameiginlega og hefur tengingu eins langt aftur og elstu handrit okkar ná. Þau eru flestum enn skiljanleg sem tala íslensku.

Íslenskan er líka sérviska og fjötur um fót eins og ég hef fjallað hér um áður. Það er kostnaðarsamt að halda úti sérstöku tungumáli fyrir örfáar hræður. Tungumáli sem nánast enginn maður í heiminum utan Íslands skilur. Íslenskan er tungumál sem einangrar okkur gagnvart umheiminum. Tungumál sem kemur í veg fyrir að ráðamenn okkar geti rökrætt af viti við annarra þjóða ráðamenn.

Hvað íslenskuna varðar og það tjón sem hún veldur okkur og þá fjármuni sem hún kostar okkur, þá eru við enn á steinaldarstigi í samskiptum vegna þess að við berjum hausnum við steininn og viljum ekki tala sama mál og annað fólk. Þetta sérkenni okkar og sérviska er sennilega þriðja dýrasta vitleysa þjóðarinnar eða mistök frá upphafi Íslandsbyggðar.

Nr. 1. á listanum yfir mistök Íslendinga að mínu mati var þegar við týndum Ameríku eftir að hafa fundið hana.
Nr. 2. á þessum lista er útrásin sem við erum að súpa seiðið af núna.
Nr. 3. á listanum er svo að við skulum þráast við að tala íslensku með öllum þeim ókostum og kostnaði sem því fylgir.

Allt það sem menn halda fram sem rökum fyrir varðveislu tungunnar, kostir hennar, eins og menningararfurinn og að tungumálið sameini okkur er auðleyst með öðru tungumáli. Menningararfinn má þýða á önnur mál, og alltaf munu örfáir sérvitringar læra íslensku. Þá þarf ekki að óttast þó tungumálið hætti að sameina okkur sem sameiginlegt sérkenni. Landamæri Íslands, kölluð Atlantshaf, og veðurfarið munu um ókomna tíð sameina okkur og merkja þessu landi, líka þó við færum að tala tungumál sem aðrir skilja.

Ég vil hvetja fólk til að hugleiða þessi orð, þetta er sett fram í fullri alvöru.

Þorsteinn frá Hamri fær Jónasarverðlaunin

Ískyggilegra en mann grunaði.

Ég bloggaði dálítið um þessa flensu í síðustu viku í gagnrýnistóni vegna þess að það er verið að bjóða þetta frítt nú þegar flensan er að yfirgefa okkur sjálfviljug. Það komu nú dálítið misjöfn sjónarmið fram í athugasemdum lesenda eins og eðlilegt er. En nú eru sem sagt að koma fram mikilvægar upplýsingar sem kunna að skýra af hverju svona mikil áhersla er lögð á að bólusetja alla. Það er sem sagt peninganna vegna fyrst og fremst. Og frí bólusetning heilbrigðisráðherra er sem sagt fyrst og fremst gjöf ríkisins til lyfjafyrirtækjanna sýnist mér. Hvort sem þetta er nú óafvitandi eða ekki hjá henni.

Svínaflensa stórgróðafyrirtæki