Keyrðu út í skurð á Mars, dráttarbíllinn á tunglinu.

Þetta er nú ljóta aksturslagið hjá NASA, að keyra út í skurð á Mars og komast ekki upp úr honum aftur. Var ökumaðurinn fullur, ég myndi athuga það. Þetta er alltof dýrt ökutæki til að skilja eftir oní skurði. Næsti dráttarbíll er víst á tunglinu, ekki veit ég hvort þeir hafa einhvers staðar spotta til að tengja á milli. Og af hverju er þessi skurður þarna, voru einhverjar geimverur í jarðabótavinnu og framræslu án þess að láta NASA vita. Þeir eru alltaf eins þessir bændur, á kafi í jarðrækt og alveg sama þó ríkir Ameríkanar á fleygiferð út um heima og geima keyri oní skurði. Það hefur ekki einu sinni verið skilinn eftir tjakkur til að redda malbiksbúunum.

Það verður að sekta NASA fyrir þetta aksturslag. 15 þúsund kall lágmark. Og setja betri reglur um jarðabótavinnu á Mars.

En kosturinn við þetta aksturslag er að nú þarf að senda dráttarbíl eða betur búið ökutæki til Mars. Það er gríðarlegur hagvöxtur að baki hverju ökutæki sem er keyrt út í skurð á Mars þannig að efnahagur Bandaríkjanna ætti að vænkast fyrr en ella út af þessu umferðaróhappi. Og svo verður auðvitað hægt að skála bráðum fyrir fyrsta einkafyrirtækinu á Mars, sem verður væntanlega bílakirkjugarður. Þannig að þetta er nú ekki alveg alslæmt.

Svo má kannski orða þetta einhvern veginn svona:

NASA á leiðinni út í geim,
sendi bíl að skoða heim.
Á Mars þeir þeyttust yfir urð
og misstu bílinn út í skurð.

Þessi ferð fór ekki vel,
bílstjórinn fullur að ég tel.
Umferðarreglur óvirtar,
þeir ættu að keyra varlegar.

Ökuferðin var æði dýr,
afraksturinn brotajárnshaugur nýr.
Þetta multimilljarða ferðalag,
tók um það bil hálfan dag.

NASA viðurkennir ósigur

Olían og Íraksstríðið. Búið að upplýsa um olíumagnið sem vannst í stríðinu.

Skv. nýrri frétt eru þrjár af 4 stærstu olíulindum heimsins í Írak. Ein olíulind í Saudi Arabíu er ennþá stærri. Nú er verið að semja við nokkur stór olíufélög sem fá nýtingarrétt að þessari olíu fyrir algjört slikk. Með heimsmarkaðsverð á olíu upp á ca. 70 dollara á fatið eru þessi félög að greiða um eða innan við 2 dollara fyrir nýtingarréttinn. Þar að auki er mjög auðvelt að ná olíunni upp þannig að vinnslukostnaður er í lágmarki og hellingur af olíu til staðar. Svona nýta menn annarra auðlindir og hirða hagnaðinn sjálfir. Ég er ekki hissa þó menn spyrni við fótum í þessum löndum. Og eins og oft hefur verið ýjað að er olíuforðinn í landinu eflaust meginástæða innrásarinnar og fjöldamorðanna þarna. Það er greinilegt á þessari frétt að peningalega er stórgróði af þessari olíu og skiptir litlu þó tugir eða hundruð þúsunda manna séu drepnir til að ná olíunni.

En hér er fréttin sem segir okkur nánar af olíubúskap framtíðarinnar.

http://finance.yahoo.com/family-home/article/108651/the-worlds-biggest-oil-reserves

Orðabókin tekur af öll tvímæli, þetta eru landráð. Það þarf ekkert að spara það orð.

Landráð eru útskýrð svona í Íslenskri orðabók Eddu:
Brot gegn öryggi eða sjálfstæði ríkis út á við eða inn á við.

Lýstar kröfur í bankana eru um 17.000 milljarðar. Heildarverðmæti Íslands er um 4.600 milljarðar skv. fasteignamati í ársbyrjum 2009.

Ljóst er að stórkostleg svik og fjöldi ólöglegra gerninga eru að baki hruninu og að það er ekki eintómt óviljaverk.

Afleiðingar hrunsins vega ótvírætt að sjálfstæði ríkisins bæði inn á við og út á við. Þegnarnir eru skattpíndir í drep inn á við til að borga eins og hægt er af skuldum útrásarinnar út á við. Öll starfsemi hins opinbera, öryggismál jafnt sem annað er skorin niður af krafti.

Þetta hrun uppfyllir allar kröfur til að hægt sé að tala um landráð, og gott betur.

Við skulum því bara kalla hlutina sínu rétta nafni, ég veit ekki til hvers þetta orð er eiginlega með í íslenskunni ef ekki má nota það núna. Það er líka hægt að nota orðið föðurlandssvik um þetta, það hefur sömu merkingu og landráð. Það er kannski betra, allavega skilja menn að það er ekki hægt að nota orðið föðurlandsást um aðgerðir sem hafa gert landið gjaldþrota. Það sem hefur gerst er varla í þeim dúr. En mér væri svo sem sama þó við leggðum af íslenskuna og tækjum t.d. upp ensku í staðinn. Þá myndum við nota orðið "treason" en ekki landráð ef einhverjum þykir það betra.

Annars er það farið að pirra mann hve mikið er reynt að tala vandann niður. Það er alls staðar verið að reyna að telja fólki trú um að gleyma þessu bara og láta eins og allt sé í lagi. Að það geri ekkert gagn að taka á einum eða neinum. Að svo margir sem tóku þátt í að koma öllu til andskotans séu svo góðir starfskraftar og mikilvægir fyrir þjóðina að það megi ekki refsa þeim o.s.frv. Enda eru þeir enn settir í lykilstöður í endurtekningunni, eða endurreisninni eins og sumir vilja kalla þær aðgerðir sem nú eru í gangi.

Nota á hugtakið landráð varlega

Eintóm sýndarmennska - Alltof fálmkenndar rannsóknir.

Það virkar auðvitað eins og eitthvað sé verið að taka á málum þegar fréttist af húsleitum í tengslum við viðskipti Exista og slíkra aðila.

En þetta er alltof seint í rassinn gripið. Og það er alltof lítið að gert. Húsleit er bara eitt atriði af fjölmörgum sem hefði þurft að gera fyrir löngu síðan.

Ég ætla bara að hamra hér á því sem ég hef oft nefnt áður undanfarið ár hér á blogginu.

Það á að stinga öllu útrásarliðinu í steininn. Ástæðan er grunur um alls kyns fjársvik, markaðsmisnotkun, málamyndagerninga og spillingu auk þess að staðfest er gríðarlegt tap banka og annarra fyrirtækja í eigu þessara manna og undir stjórn þeirra. Það eitt og sér vekur auðvitað nægar grunsemdir til að setja alla inn á meðan þau mál eru rannsökuð.

Það á að frysta allar finnanlegar eignir þessara aðila. Ástæðan er grunur um að þær séu illa fengnar og þær þurfi að nota til að greiða fyrir tap sem annars lendir á saklausum aðilum, innlendum og erlendum.

Það á að leita uppi allar faldar eignir þessara aðila á leynireikningum og í skattaskjólum. Og það á að rekja upp alla óeðlilega fjármálagerninga og útlán í bönkunum. Rifta þeim gerningum og ná peningum til baka.

Þetta sem ég tel upp hér að ofan eru allt hefðbundnar aðgerðir skv. íslenskum lögum og venjum þegar alvarleg mál hafa komið upp áður. Það er vissulega ekki oft, en ekkert af þessu er án fordæma. Það er alveg stórfurðulegt að nú megi ekki taka á málum með venjubundnum hætti.

Ein og ein húsleit er alveg gagnslaus í þessu ferli. Það er ljóst að spillingin í landinu er þvílík að það er ekki ætlunin að grípa til neinna sérstakra aðgerða út af þessu einu stærsta þjófnaðarmáli í viðskiptasögu heimsins, þegar heilt land hefur verið rænt öllu fé og öllu fémætu á örfáum árum af örfáum aðilum. Það er greinilegt að þeir hafa kunnað tökin á stjórnkerfinu vel miðað við hve algjörlega þeir sleppa við aðgerðir og óþægindi af hálfu yfirvalda.

Þetta lætur þjóðin ennþá bjóða sér, það er enn hægt að ljúga okkur full. Fréttir af húsleitum í dag ættu að þagga niður í okkur í nokkrar vikur eða mánuði. Meira þarf ekki til að við trúum flest að nú eigi að fara að taka á þessu.

Hlutafjáraukning rannsökuð

Lánaverðbólgan heldur samt áfram á fullri ferð.

Ef hratt lækkandi húsnæðisverð er að halda aftur af verðbólgunni þá væri nú eðlilegt að sjá eitthvert samræmi milli húsnæðisverðs og hreyfingar á húsnæðislánum. En þau halda áfram að hækka sem aldrei fyrr. Byggingarvísitalan hefur hækkað sáralítið á undanförnu ári. Það er heldur ekkert samræmi þar með hækkun á húsnæðislánum. Þetta kerfi getur ekki gengið svona, að verðlag hlutanna sé allt samtengt í alls konar vísitölum en þróist samt í sitt hvora áttina. Skattahækkanir á bensín og brennivín og margt fleira eru notaðar til að ákveða hvað á að borga mikið af húsnæðislánum. Launaþróun og atvinnuþáttaka er alls ekki tekin inn í þessar mælingar. Því síður breytingar á kaupmætti. Þetta vísitölukerfi virkar í raun þannig núna að ríkið ræður vísitölunum. Það eru fyrst og fremst ákvarðanir ríkisstjórnarinnar sem eru að hafa áhrif á lánavísitölur. Þær eru hins vegar í engu sambandi eða tengingu við þróun á helstu liðum hagkerfisins. Þannig er fjármagn verðlagt sérstaklega óháð réttri og raunverulegri hagþróun. Þetta er nú meira bullið. Getur ekki farið vel.

Vilhjálmur: Húsnæðisliðurinn skiptir miklu

Setjum apa í ríkisstjórnina og bankana líka.

Það er spurning hvað fulltrúar AGS og Breta myndu gera ef þeir hittu alls staðar fyrir simpansa í stjórnkerfinu og bönkunum hér þegar verið er að sækja peninga og undirskriftir til Íslands út af hruninu. Ég er fullviss um að þessum aðilum tækist síður að féfletta þjóðina ef simpansar væru fulltrúar okkur, en ekki Jóhanna og Steingrímur og Gylfi og Icesave samninganefndin hans Svavars.

Mér líður eiginlega eins og algjörum apa að hafa ekki áttað mig á þessu fyrr. Svo gætu aparnir tekið myndir af Bretum og AGS og við notað þær í áróðursstríði í Bretlandi. Ég er viss um að það myndi virka vel. Ég held að þjóðin ætti að hugleiða þetta.

Úr því að þjóðin vill ekki ráða neinu sjálf með beinu lýðræði og fáir eru ánægðir með ríkisstjórnina og það sem hún er að gera þá ættum við í alvöru að skoða að fara apaleiðina í efnahagsvandanum.

Fyrsta kvikmyndin gerð af öpum

Eðlileg lausn á vandanum.

Mér finnst þetta mjög eðlileg lausn á vanda Álftaness. Ríkið kaupir einfaldlega skuldirnar og leysir þannig vandann. Þetta er akkúrat það sama og ríkið er að gera með Icesave og helling af öðrum skuldum Jóns Ásgeirs Jóhannessonar og Björgólfs Thors og þeirra líka og samstarfsmanna. Því ekki að gera þetta líka fyrir fólkið í landinu. Það er ekki bara eðlilegt, heldur miklu eðlilegra að gera þetta fyrir landsmenn almennt heldur en að gera þetta bara fyrir örfáa útrásargemlinga svo þeir haldið haus og lifað í vellystingum praktuglega í London og víðar. Ríkið keypti af þessum mönnum fullt af skuldum vegna einkaþotna og lúxussnekkja og alls konar annars bruðls og óþarfa. Þetta er löngu búið að gera, var gert þegar ríkisbankarnir voru látnir kaupa ónýta pappíra í peningamarkaðssjóðum. Því skyldi nú ekki mega gera eitthvað sambærilegt fyrir almenning svo hann geti synt eða hlaupið úr sér hrollinn út af hruninu.

Ég er að meina þetta í alvöru og ætla rétt að vona að pöpullinn fari nú ekki að níða þessa hugmynd niður sem kemur honum sjálfum til góða þegar fjölmargir lofa í hástert þessa ríkisstjórn sem er búin að gera þetta nú þegar fyrir nokkra útvalda án þess að mikið sé fundið að því.

Ríkissjóður kaupi hlutabréf Álftaness í Fasteign

Þetta er allavegi efni í góða bíómynd!!

Niðurskurður hins opinbera bitnar á öllum utan skjaldborgarinnar frægu. Þar fyrir innan eru fáir útvaldir sem sleppa miklu betur en aðrir. En allir aðrir verða að róa á önnur mið núna. Ég hef fulla samúð með þeim fjölmörgu hópum sem missa spón úr aski sínum, jafnvel allan askinn, út af þessari ríkisstjórn sem hefur valið að borga fyrir útrásarvíkinga svo þeir geti lifað sem kóngar með hirð sinni í útlöndum. Það er ekkert skorið við nögl það sem er borgað fyrir þessa kónga og glæpamenn eins og Jón Ásgeir Jóhannesson og einhverja vogunarsjóði og háttsetta erlenda bankaræningja sem verða að fá sitt, hvað sem tautar og raular. Það er ekki virðingu fullvalda þjóðar samboðið að standa ekki við skuldbindar sínar, sem enginn virtist vita um fyrr en rukkunin kom, gagnvart alþjóðlegum seðlaprentsmiðjum og óprúttnum fjármálavafningafyrirtækjum. Samt komu peningarnir aldrei hingað. Nei, en af því að nokkrir Íslendingar voru sendlar og sölumenn í þessu ævintýri þá tapaði þjóðin allavega 17 000 000 000 000 000 krónum. Af þessu má víst afskrifa helling af matadorpeningum en samt þarf að nota öll verðmæti sem til eru í landinu og gott betur til að borga restina.

Er þetta ekki bara efni í helv. góða bíómynd?? Lítið á jákvæðu hliðarnar og gerið nú góða mynd um þetta. Það hlýtur að vera hægt þó hún verði kannski svoldið fátækleg að sumu leyti.

Fordæmislaus niðurskurður

Leyfðu okkur að gráta með þér.

Ég skil það vel að Tryggvi hafi verið gráti nær við gerð skýrslunnar þegar hann var að fara yfir göng sem nefndin hefur verið að skoða og melta. En það er engin ástæða til að gráta einn yfir þessu. Nefndin á að leyfa okkur að gráta með henni. Það á að birta skýrsluna strax þó hún sé kannski ófullgerð. Þetta er löngu orðið nógu spennandi og óþarfi að byggja upp meiri spennu ef það er ætlunin. Og þetta hefur örugglega engin áhrif sem máli skipta á Icesave kosninguna. Það tekst ekki að snúa þjóðinni í því máli með því að fela þessi óþægindi.

Ég skora því á nefndarmenn að koma nú fram með skýrsluna og leggja hana á borðið og leyfa okkur að gráta með ykkur yfir ósómanum. Þið verðið hvort eð er að leggja þetta fram fyrr eða síðar.

Gráti nær yfir efni skýrslunnar

Ríkissaksóknari byrði á ríkinu.

Ríkissaksóknari virðist vera vanhæfur í mörgum málum vegna tengsla. Færa hefur þurft mál undir sérstaka saksóknara svo þau ónýtist ekki vegna tengsla. Þarna virðist vera tilfellið að í starfinu sé maður sem hentar alls ekki í það vegna persónulegra tengsla. Í hagræðingarbylgjunni sem nú gengur yfir hjá ríkinu væri skynsamlegt að finna manninum eitthvað annað að gera og finnan annan ríkissaksóknara sem ekki er svona mikið tengdur þeim málum sem hann fær á sitt borð.

Eins og staðan er í dag, að ríkissaksóknari er svo oft óhæfur sem raun ber vitni þá er hann bara óþörf byrði, útgjöld, fyrir ríkið. Þetta gengur ekki núna, það tíðkaðist á árinu 2007 að hafa fullt af fólki á launaskrá án þess að mikils árangurs væri krafist af því í staðinn. Nú gengur það ekki, það þarf að nýta hvern mann og hverja krónu sem best. Lagið þetta.

Ákæra afturkölluð vegna tengsla

Er þetta nú ekki grunsamlegt, frestun eftir frestun??

Er ekki hægt að koma með bráðabirgðaskýrslu til að setja allavega fram það sem liggur orðið ljóst fyrir, þó eitthvað meira komi kannski seinna? Af hverju er verið að fresta þessu aftur? Hvaða sjónarspil er nú í gangi? Er einhver að stýra nefndinni utanfrá? Er það ríkisstjórnin sem ætlaði að hafa allt upp á borðum? Er þetta sjálfstæð nefnd eða ekki? Eftir allan þennan tíma hlýtur ýmislegt að liggja ljóst fyrir, af hverju má ekki setja það fram?

Svona frestanir vekja bara spurningar og vantrú. Er hvergi gat á spillingunni?

Skýrslan frestast enn lengur

Þegar krafa Tchenguiz verður samþykkt geta allir viðskiptavinir Kaupþings gert kröfur á sömu forsendu.

Eftir því sem fram hefur komið í öðrum fréttum af þessum kröfum Tchenguiz á þrotabú Kaupþings þá er forsendan fyrir skaðabótakröfunni fyrst og fremst sú að staða bankans þegar hann stundaði sín viðskipi við hann hafi verið önnur og verri en honum var gefið til kynna. Hann hafi verið blekktur með lygasögu um að þetta væri traustur og sterkur banki, þvert á það sem reyndist vera. Þetta er eflaust alveg rétt hjá honum, þó viðskiptin við þennan mann virðist síður en svo hafa verið til að bæta þessa stöðu. En ef þessi forsenda heldur þá á hún líka við um alla aðra viðskiptavini Kaupþings á sama tíma. Þannig að verði þessi krafa einhvern tíma samþykkt á þessari forsendu hlýtur að skapast sambærileg bótaábyrgð gagnvart öðrum viðskiptavinum Kaupþings á þessum tíma.

Þannig að það er skiljanlegt að slitastjórn bankans hafni kröfunni, en aðrar fréttir herma raunar að við því sé búist af Tchenguiz, og þetta sé aðeins forréttur að dómsmáli sem fylgi síðan í kjölfarið. Þar hlýtur Tchenguiz að telja sig eiga einhverja möguleika, annars væri varla verið að standa í þessu.
Og þá verður nú fróðlegt að sjá hvort aðrir viðskiptavinir fái sambærilegan bótarétt gagnvart þrotabúi bankans.

Skuldari vill skaðabætur

Heppni fyrir ESB að Bretland notar ekki evruna.

Það er mikil heppni nú fyrir ESB að Bretland skuli ekki hafa tekið upp evru. Opinberar skuldir Bretlands og erlendar skuldir sömuleiðis eru gríðarlegar, sennilega u.þ.b. svipaðar og skuldir Grikklands, Írlands og Spánar til samans. Það myndi því algjörlega gera út af við evruna í þessu ástandi ef þetta lang skuldugasta ríki ESB notaði evru sem gjaldmiðil. Hins vegar má svo sem búast við að fallandi gengi pundsins muni hafa áhrif á gengi evrunnar.

En í bili má reikna með að evran tóri í gegn um þessa fjármálakreppu þó hún eigi eftir að falla gríðarlega innan tíðar. Ég spái þó að evran fari ekki að falla að ráði fyrr en á næsta ári. Enn er hægt að mjólka fjölmarga ríkissjóði evrulanda á þessu ári til að halda gengi hennar stöðugu og það verður gert þar til allir ríkiskassar eru tómir. Svo fellur hún.

Óttast að evran hrynji

Hér er ekki lýðræði, heldur fáræði. Hér ræður ekki lýðurinn, heldur fáráðlingarnir.

Enn er fyrirhugað að þjóðaratkvæðagreiðslan fari fram. Það er gott. En um leið eru allir ráðamenn þjóðarinnar að hugsa um hvað þeir geta gert til að halda áfram með málið í andstöðu við vilja þjóðarinnar þegar atkvæði hafa fallið. Ekki virðist vera inni í myndinni að hlýta lýðræðislegri niðurstöðu möglunarlaust.

Ég hef verið að velta aðeins fyrir mér lýðræðinu og því hvað ráðamönnum þykir slæmt að lúta því. Þess vegna er lýðræðið alls staðar útfært á eins ólýðræðislegan hátt og hægt er í heiminum í dag.

Þessi ólýðræðislega útgáfa af lýðræðinu kemur fram í því að lýðurinn fær ekkert að skipta sér af afgreiðslu nokkurra mála, að frátöldum örfáum undantekningum í stöku löndum. Reglan er sú að lýðurinn fær bara að kjósa sér valdaræningja til nokkurra ára í senn og þó varla. Því það eru bara kosnir flokkar en ekki einstaklingar í flestum löndum. Það eru sem sagt kosnir þessir milliliðir, flokkar og fulltrúar þeirra. Þannig ríkir í raun fáræði, sem er náskylt einræði, en ekki lýðræði. Lýðurinn kýs fáa fulltrúa en hefur hins vegar engin bein áhrif á ákvarðanatöku þessara fulltrúa. Þeir gera það sem þeim sýnist að kosningabaráttu lokinni.

Í stuttu máli má draga þetta saman. Á frekar ólýðræðislegan hátt kemur lýðurinn sér saman um fáræði stjórnmálaflokka til fjögurra ára í senn. Fulltrúar stjórnmálaflokkanna, réttilega má kalla þá fáráðlinga í þessu samhengi, fara svo með völdin eins og einræðisherrar, að eigin geðþótta og án afskipta lýðsins þar til kjörtímabili lýkur.

Er að undra að þetta kerfi gefist yfirleitt misilla, en sjaldan eða aldrei vel?

Förum nú að breyta þessu. Tökum upp beint lýðræði, sem er hið eina raunverulega lýðræði.

Eðlilegt að undirbúa viðræður

Dýrt að halda úti íslenskri tungu.

Nú hefði verið gott að vera laus við íslenska tungu. Það er eitt af hinum dýru verkefnum RÚV að viðhalda tungumálinu. Nú er hálft hundrað manna rekið frá stofnuninni í sparnaðarskyni en samt þarf að halda úti þessu handónýta tungumáli. Hugsið ykkur bara hve mikið væri hægt að spara þjóðfélaginu með því að losa það við þetta vandamál sem þetta tungumál er. Það mætti t.d. auðveldlega leggja niður alla innlenda fjölmiðlun á erfiðum tímum nema kannski einhverjar fréttastofur ef ekki þyrfti flest allt sem heyrist í útvarpi og sjónvarpi að vera á íslensku. Ég fullyrði að það væri hægt að borga Icesave á fáum árum með hagræðinu sem hlytist af að leggja niður íslenskuna. Og kannski hefði aldrei orðið neitt Icesave ef við hefðum talað t.d. ensku en ekki íslensku undanfarin ár. Þá hefði það frá upphafi verið á hreinu hvað var að gerast í Landsbankanum. Ekki eins og raunin virðist hafa verið að enginn vissi neitt almennilega af því menn skildu engin alvöru tungumál. Og allavega hefðu kannski náðst betri samningar um klúðrið ef samningamennirnir hefðu talað alvöru tungumál og skilið viðsemjendurnar. Þetta tungumál sem enginn skilur er búið að vera okkur dýr þröskuldur á mörgum sviðum. Samt skal berja hausunum stöðugt við steininn og halda vitleysunni áfram.

Alls missa 50 manns vinnuna