Það þarf að tryggja með óyggjandi hætti að ríkið beri enga ábyrgð á innistæðum.

Það er nauðsynlegt nú þegar verið er að fjalla um ný lög um innistæðutryggingar að ríkissjóður sé örugglega ekki ábyrgur fyrir innistæðunum þegar illa fer næst.
Ein af ástæðunum fyrir glannaskapnum í fjármálaheiminum er að ríkissjóðir hlaupa alltaf undir bagga þegar vitleysingarnir eru búnir að stela úr bönkunum og setja þá á hausinn.

Banki verður aldrei vel rekinn ef hann nýtur ríkisábyrgðar. Þá hafa innistæðueigendur engar áhyggjur af rekstrinum og eigendurnir varla heldur því það er ríkið sem bætir tjónið í slíkum banka þegar illa fer. Eigi að gera bankana sjálfbæra verður því að breyta þessu þannig að þar þurfi menn að vinna skynsamlega ætli þeir að halda viðskiptavinum og standa í bankarekstri til langs tíma.

Ég vil því sjá það í þessum nýju lögum með afgerandi hætti að bankarnir verði ekki ríkisbankar eða ríkisábyrgðarbankar. Það þarf ekkert að skilja þetta atriði eftir í lausu lofti með því að minnast ekki á það í lögunum. Það þýðir bara að hugmyndin er að bankarnir verði ríkistryggðir. Ef ekkert er í lögnum sem beinlínis bannar ríkisábyrgð á innistæðum þá eru þær með ríkisábyrgð þegar illa fer. Það gengur ekki, ekki aftur og aftur. Það er nóg komið af svoleiðis vitleysu.

Hver ber ábyrgð á innstæðum?

Ég hélt hann hefði ætlað að ná í Ísbjörn?

Jæja, nýr borgarstjóri stendur í stórræðum á fyrstu dögum sínum í embætti. Nú er hann búinn að læra laxveiðar. Ég var nú reyndar að vona að hann myndi landa ísbirni. Ísbjörn var miklu ofar á loforðalistanum en lax. En kannski má til að byrja með setja lax í tjörn í húsdýragarðinum og leyfa börnunum að skoða hann. Það gæti nú verið heilmikið að dráttarafl fyrir húsdýragarðinn að auglýsa laxaskoðun og þá sérstaklega að hægt sé að skoða lax sem aðal átrúnaðargoðið, sjálfur Jón Gnarr, hefur veitt og fært húsdýragarðinum.

En þetta gekk allavega mjög vel hjá honum að opna Elliðaárnar og læra laxveiði. Nú er bara að vona að önnur embættisverk gangi jafn vel hjá honum þegar fram líða stundir.

Borgarstjóri veiddi lax

Vonandi upphafið að því að taka upp nýtt tungumál á Íslandi.

Mér líst vel á þessa tungumálamiðstöð, ef hægt er finna nóga peninga í að byggja þetta upp. Reyndar er kostnaðaráætlunin augljóslega í lægri mörkunum, kostnaður við hús af þessari stærð verður trúlega 1.200-1.500 milljónir.

Og það er brýnt verkefni sem býður þessarar tungumálamiðstöðvar. Það er að kanna kosti þess og galla á faglegan hátt að skipta íslenskunni út fyrir annað og skiljanlegra tungumál.

Í mínum huga er það engin spurning að Íslendingar verða á næstu árum að taka ákvörðun um hvaða tungumál þeir ætla að tala í framtíðinni og koma því svo í framkvæmd að innleiða það tungumál sem þeir velja sér. Það gengur ekkert til frambúðar að halda þjóðinni í átthagafjötrum íslenskunnar sem enginn talar lengur nema Íslendingar þó hún hafi eitt sinn verið alþjóðlegt tungumál. Þó okkur þyki þetta fallegt tungumál og að við getum mörg hver lesið fornrit af því tungumálið hefur svo lítið breyst á löngum tíma þá er staðreyndin sú að tími íslenskunnar er liðinn rétt eins og tími torfbæjanna sem þjóðin bjó í og hesta sem samgöngutækis og sóðaskaparins sem viðhélt sullaveiki í Íslendingum öldum saman. Íslenskan er bara hluti af þessari menningu. Nú höfum við steinhús og bíla og étum ekki lengur úr sama aski og heimilishundarnir. Og nú vantar okkur bara að klára þróun landsins yfir í nútímann með því að taka aftur upp alþjóðlegt tungumál.

Mér sýnist að efst á listanum yfir álitleg tungumál séu kínverska og enska, af þeirri augljósu ástæðu að þetta er málin sem flestir tala í heiminum í dag. Enskan er hins vegar álitlegri að því leitinu að fjölmargir Íslendingar tala nú þegar hrafl í henni og hún notar sama ritmál og við þekkjum í dag. Kínverskan hefur þá galla að sárafáir Íslendingar tala hana og þar að auki notast hún við gjörólikt ritmál, táknmál en ekki stafrófið sem við þekkjum og notum. Þá er enskan það tungumál sem breiðist hraðast út í heiminum, það er kostur fyrir þá sem vilja eiga kost á samskiptum við sem flesta aðra jarðarbúa.

En vonandi kemst þessi tungumálamiðstöð í gang sem fyrst. Það er gaman að stofnun Vigdísar Finnbogadóttur skuli standa fyrir þessu og það væri í góðum takti við áhuga Vigdísar á tungumálum og menningu annarra þjóða ef þessi stofnun tæki sér fyrir hendur það þarfa verkefni að undirbúa innleiðingu nýs tungumáls á Íslandi.

Reisa tungumálamiðstöð

Það vantar valkost við bílana. Byggjum yfirbyggða hjólastíga.

Göturnar verða fullar af bílum á meðan fólk býr í Reykjavík ef engir almennilegir valkostir eru í boði gegn bílunum til að koma fólki milli staða.

Mín tillaga í þessu er að lagðir verði yfirbyggðir hjólastígar um alla borg svo fólk geti hjólað sem mest og oftast og sparað sér bílaeign og bílaakstur. Þó það sé hægt á góðum sumardögum að hjóla eitthvað um Reykjavík, þá eru sárafáir sem nýta sér það. Það hefur sést vel undanfarið á þessu einstakalega veðurblíða sumri það sem af er. Hjólamennska er einfaldlega ekki raunhæfur valkostur við þægindi einkabílsins þegar aðstæður hjólafólks eru eins ömurlegar og þær eru mest allt árið. Í bíl er þægilegt loftslag, öryggi og góð vörn gegn veðrum. Á hjóli er þetta allt annað. Það er oftast skítkalt eða rennblautt, fólk er ekkert varið fyrir roki og hálku og snjó á vetrum auk þess sem hjólaumferð þarf að fara um eða yfir umferðargötur.

Ef alvöru áhugi er á vistvænum samgöngum á höfuðborgarsvæðinu þá er lang besta leiðin sú að leggja net af yfirbyggðum hjólastígum um allt svæðið. Nota á tækifærið til að leggja stígana líka í skurði og á brýr til að minnka brekkurnar.

Þetta er vissulega rándýrt og sumir hafa talið þetta tóma vitleysu í mér þegar ég hef bloggað um þetta áður, aðallega út af kostnaði. En það sem sparast á móti er fljótt að skila þessum kostnaði til baka. Það mætti t.d. draga verulega úr akstri tómra strætisvagna um alla borg með því að fækka ferðum þeirra og spara þannig milljarða á ári. Það sparast fullt af peningum í gatnaviðhaldi ef boðinn er valkostur sem virkilega fækkar bílum á götunum. Þá má nú sleppa því að mestu að ryðja snjó af hjólastígum og hálkuverja þá ef þeir eru yfirbyggðir. Einhverjir tugir milljóna geta sparast í þessu á hverju ári.

En auðvitað verður sparnaður borgarbúanna mestur ef þeir geta fækkað við sig einkabílum og sparað sér bílakaupin, bílareksturinn og eldsneytisbrunann sem mengar svo mikið. Og í kaupbæti við allan sparnaðinn fá menn betri heilsu sem kemur með hreyfingunni sem fylgir hjólreiðunum.

Án þess að ég hafi nennt að leggjast yfir útreikninga á þessu þá er ég þess fullviss að með því að byggja upp góðan valkost við einkabílinn með yfirbyggðum hjólastígum má spara borgarbúum 10-20 milljarða á ári.
2006 voru rúmlega 110 þús. bílar í Reykjavík. Skv. tölum FÍB kostar rekstur ódýrs einkabíls upp undir milljón á ári. Ef hægt er að fækka bílum um 10% má því spara um 10 milljarða á ári og ef hægt er að fækka þeim um 20% þá sparast um 20 milljarðar á ári. Þessi sparnaður er bara sparnaður bíleigendanna sjálfra af því að fækka einkabílum, gatnaviðhaldið og reksturinn og strætósparnaðurinn bætist svo þar við. Það eru kannski 1-3 milljarðar í viðbót árlega.

Hvernig líta göturnar út án bíla?

Íslands ógæfu verður allt að vopni.

Einhvern tíma hefur það nú verið sagt áður að "Íslands ógæfu verður allt að vopni". En sjaldan hefur það átt betur við.

Óheillakrákan Össur Skarphéðinsson er eitt skæðasta vopn Íslands ógæfu. Hann er einn landsins mesti ógæfu smiður. Nú er hann ánægður með verk sín þegar ESB hefur "leyft" honum að koma til viðræðna um aðild Íslands að ESB. Þar með er farið með þetta mál úr stöðu "umsóknar" í stöðu "aðildarviðræðna".

Þetta finnst íslands óheillakráku sniðugt og gott þó þjóðin sé næstum því einhuga á móti þessu plotti öllu saman. Hann telur sem svo að þjóðin sé bara örg og vitlaus í augnablikinu út af Icesave og muni fljótlega fara að skipta um skoðun og kjósa sér aðild að ESB þegar tímar koma. Hann heldur sem sagt að Íslendingar séu vitlausir núna en verði voða gáfaðir bráðum. Hann telur að gáfnafar Íslendinga og áhugi á ESB sé beintengt efnahagslegri stöðu landsins á hverjum tíma. Ennfremur telur hann að það versta sé nú afstaðið í efnahagsmálunum og bjartir tímar í nánd. Þessi óheillakráka er greinilega í allt öðrum heimi en flestir Íslendingar. Hann skilur ekki að það versta er enn ókomið. Fólk flýr land sem aldrei fyrr, 10 manns á dag að jafnaði, þar af flestir til Noregs sem er utan ESB. Ríkissjóður hleður á sig skuldum óreiðumanna og óheillakrákanna úr bönkunum. Það koma virkilega vondir tímar þegar vextir og afborganir af þessum óheillalánum falla í gjalddaga. Þá syrtir nú í álinn. Það á að fara að skera niður hjá ríkissjóði í haust. Þá fjölgar nú aftur á atvinnuleysisskránni og herðir á fólksflóttanum. Þá syrtir nú enn í álinn.

Það hefur engu verið breytt sem máli skiptir í bönkunum. Bara gamla draslið reist við, ennþá allt ríkistryggt og auk þess fjármagnað af ríkinu. Það er ótrúlegt að þetta nýja gamla bankakerfi lifi lengi. Þegar það hrynur aftur innan skamms þá syrtir enn í álinn. Og bankarnir ætla áður en þeir falla aftur að taka fjórðung, jafnvel þriðjung, heimila í landinu með sér í fallinu. Koma 100 þús. Íslendingum á kaldan klaka, á götuna eða sveitarfélögin eða svæla þá úr landi. Það syrtir nú enn í álinn þegar þessu vindur fram. Ekkert af þessu er vísbending um betri tíma í landinu.

Stjórnmálamenn eru iðnir við að þusa um að allt erfiðið og vandamálin hjá landsmönnum séu u.þ.b. að klárast og senn að baki. Almenningur sér hlutina ekki með þessum hætti og trúir þessu einfaldlega ekki. Staðreyndir segja okkur annað. Þessir stjórnmálamenn sem halda fram björtum tímum á næstunni eru flestir fyrir löngu orðnir landsfrægir trúðar og lygalaupar, eiginhagsmunapotarar sem aldrei hafa nálgast landsmenn á öðrum forsendum en þeim að ljúga þá fulla til að fá atkvæði þeirra. Fólk er nú farið að hika talsvert áður en það trúir nýjum lygum eða endurteknum lygum. Það er nokkurn veginn hætt að virka að tyggja sömu lygina nógu oft og telja fólki þannig trú um að hún sé sannleikur. Það er ört minnkandi hópur sem fellur fyrir slíku.

Ég sé því ekki hvernig óheillakrákan Össur getur séð það í spilunum að Íslendingar muni bráðum hafa það svo gott að þeir slái til með inngöngu í ESB. En þessi óheillakráka er engu að síður staðráðin í að nauðga ESB upp á þjóðina. Hann virðist halda að hann geti troðið þjóðinni í skjóðu og hent henni inn í ESB burtséð frá þjóðarviljanum. Óheillakrákan virðist halda að hann sé í svipuðum sporum og ekkjan forðum daga sem stóð við Gullna hliðið með Sálina hans Jóns í skjóðu og kom henni í gegn um hliðið fram hjá Pétri.

En óheillakrákan skilur ekki að Íslenskar sálir vilja ekki í ESB ríkið. Óheillakrákan skilur heldur ekki að ESB ríkið vill fá Íslenskar sálir í ESB ríkið. Óheillakrákan skilur ekki að hann er sá eini sem enn hefur látið plata sig og að nú er ESB ríkið að nota hann til að krækja í sálirnar. Ef ekki væru svona óheillakrákur eins og Össur væru aðeins færri vandamál að fást við á Íslandi í dag. Þess vegna eru menn eins og Össur óheillakrákur.

„Heilladagur fyrir Ísland“

Nokkuð til í þessu hjá Rompoy en samt ekki fullnægjandi skýring.

Það er alveg rétt að sterk Evra er veikleiki, rétt eins og að sterk króna var veikleiki á Íslandi. Þetta hef ég nokkrum sinnum bloggað um áður. En það er nú samt ekki alveg rétt hjá Rompoy að rekja megi vanda Evruríkjanna til þess hve sterk Evran var. Þetta er aðeins hluti vandans í Evrópu. Vandi Evruríkjanna er í raun fjórskiptur.

1. Það er sterk Evra.
2. Það eru of háir vextir.
3. Það er of mikil eyðsla ríkissjóðanna og lántökur þess vegna.
4. Og það er bankakerfi sem er ríkistryggt.

Þetta eru vandamálin í Evruríkjunum. Þetta er líka alveg sama prógrammið á Íslandi og annars staðar utan ESB.

Það er ekkert eitt þessara atriða sem um má kenna eingöngu um hve fjárhagslega staða þessara ríkja er orðin slæm.

Ef einhver einn samnefnari er til sem mætti kenna um, þá eru það spilltir og vitlausir og vanhæfir stjórnmálamenn. Það er nú þeir sem eiga að stjórna löndunum sem þeir eru fulltrúar fyrir með þeim hætti að þessir hlutir séu í lagi.

Var ekki Jóhanna forsætisráðherra að tala um það áðan að framtíðin væri björt fyrir Íslendinga, að okkur miði vel og að við skulum horfa björtum augum fram á veginn? Hún er gott dæmi um vitlausan og vanhæfan stjórnmálamann sem er í engum tengslum við raunveruleikann í landi sínu. Svona lið er um alla Evrópu að stjórna öllu til andskotans. Það er aðalvandinn.

Of sterk evra átti þátt í hruni hennar

Tökum nú niður styttuna af Jóni Sigurðssyni.

Á þessum þjóðhátíðardegi skulum við Íslendingar krjúpa í lotningu fyrir ESB og þakka fyrir að sambandið ætlar að leyfa okkur að hefja viðræður um aðild að Evrópusambandinu.

Við skulum á þessum merkilegasta þjóðhátíðardegi aldarinnar skilja leiðinlega fortíð eftir að baki okkar. Við skulum fyrirgefa bankaræningjum landsins og hjálpa þeim að komast aftur á lappirnar í rekstri sínum.

Við skulum hætta að ergja okkur á spilltum og vanhæfum stjórnmálamönnum. Þeir munu hvort eð er innan skamms engu ráða þegar hið algóða ESB tekur við völdum á Íslandi allri íslensku þjóðinni til ómetanlegra hagsbóta um alla framtíð.

Við skulum kyngja skuldum okkar og borga þær hvernig sem þær eru tilkomnar og hvort sem við eigum fyrir þeim eða ekki og hvort sem þær eru okkar skuldir eða ekki. Nú eru bjartir tímar framundan og allir vegir færir. Engar skuldir eru Íslandi eða íslenskum heimilum ofviða á svona tímamótum.

Við skulum henda styttunni af Jóni Sigurðssyni og nota stallinn undir fánastöng ESB. Jón Sigurðsson er hvort eð er gagnslaus núna og þar að auki ekki í tísku heldur. Og ef hann væri á lífi þá vildi hann örugglega ekki vera á þessum stalli og horfa upp á það sem er að gerast á Íslandi.

Á þessum tímamótum þegar algóður ESB ætlar að hleypa okkur vesælum Íslendingum inn í musteri sitt til að meðtaka þar hina miklu sælu og vegferð til betra lífs fyrir þjóðina skulum við muna að þetta bætist við önnur gæði sem við Íslendingar erum svo gæfuríkir að njóta í meira mæli en flestir aðrir miðað við höfðatölu. Við höfum hreina loftið og bláa sjóinn og eldfjöllin og hin fjöllin og fjallkonuna og menninguna og íslenskuna og hvort annað. Það breytist ekkert af þessu við inngöngu í ESB. Við munum því engu tapa en allt vinna við inngönguna.

Þökkum því fyrir þá miklu gæfu að ESB skuli í dag ákveða að vilja ræða við okkur um inngönguna. Hættum að velta okkur upp úr hversdagslegum vandamálum eins og atvinnuleysi og skuldum og horfum á björtu hliðna sem nú yfirgnæfir og leysir bráðum öll okkar vandamál.

Ísland, (ekki það lifi, heldur) það gangi í ESB, húrra, húrra, húrra.
Eða er það ekki málið?

Opinberar skuldir ofarlega á baugi

Þetta er bara til að fela raunveruleg plott gegn almenningi. - SKULDASKATTINN.

Það er oft klókt að gera mikið úr smámálum til að beina umræðunni þangað á meðan reynt er að gera einhverjar verulegar skammir af sér annar staðar.

Ég bloggaði í gær um hvort ríkisstjórnin væri kannski að velta fyrir sér að leggja á skuldaskatt til að safna fé fyrir AGS og aðra vildarvinu. Ég hafði ekki hugmynd um hversu nærri ég fór raunveruleikanum. En þetta er víst akkúrat það sem er verið að gera. Það er í undirbúningi að leggja sérstakan skatt á bankana sem hlýtur að fara beint út í verðlagið hjá þeim, leggst sem sagt á skuldara í formi hærri vaxta ef að líkum lætur. Rétt eins og þegar fjármagnstekjuskatturinn var lagður á fjármagnseigendur, þá bættist hann að einhverju leyti ofan á vextina sem fyrir voru. Nú stefnir sem sagt í að skuldarar þurfi í gegn um afborganir af skuldum sínum að borga bæði fjármagnstekjuskattinn fyrir þá sem fá vaxtatekjurnar og svo skuldaskatt að auki til að bæta fyrir tapið af Jóni Ásgeiri og félögum öllum í útrásinni sem ríkið ætlast til að íslenskur almenningur borgi, án þess að nokkuð sé gert til að landa þessum kostnaðarsömu stórlöxum í net sérstaks saksóknara og flaka þá og úrbeina til að gera úr þeim verðmæti.

SKULDASKATTUR ER NÆSTA RÁÐ RÍKISSTJÓRNARINNAR.

Sjá nánar fréttaumfjöllun um þetta hér:

http://www.visir.is/birna--haepid-ad-skattleggja-bankana-frekar-a-ovissutimum/article/2010505867518

og hér

http://www.visir.is/magnus-orri--umtalsverdar-fjarhaedir-med-bankaskatti/article/2010157917859

og að lokum hér.

http://www.visir.is/margeir--bankaskattur-a-tha-sem-ekki-fengu-fyrirgreidslu-fraleitur/article/2010299281916

Eru andvígir frumvarpi Jóhönnu

Heimskur utanríkisráðherra.

Hún talar einstaklega heimskulega hún Maxime Verhagen, utanríkisráðherra Hollands þegar hún segir það fáránlegt að tvær konur hafi verið handteknar í Suður Afríku vegna markaðsbrellu. Ég get með engu móti skilið hvað er fáránlegt við þessar handtökur.

Ef handtökurnar eru í samræmi við Suður Afrísk lög, þá er ekkert fáránlegt við þær. Þá er eini fáránleikinn sá að konurnar skuli ekki hafa haft vit á að kynna sér hvort markaðsbrella þeirra kynni að vera lögbrot og um leið að kanna hvaða viðurlög liggja við brotinu. Þá hefðu þær kannski hugsað sig betur um áður en þær ákváðu að auglýsa Bavaria á leiknum.

Það er alveg ótrúlega fáránlegur hugsanaháttur hjá sumum að halda að allt sem menn komast upp með í sínu heimalandi, sé líka í lagi alls staðar annars staðar.
Og þá er það ekki síður fáránlegt ef ráðherra í Hollandi heldur að hollensk lög gildi í Suður Afríku.

En kannski stafar þetta bara af tungumálaörðugleikum. Ef allir jarðarbúar töluðu og læsu sama tungumál þá hefðu þessar hollensku konur kannski átt auðveldara með að athuga út í hvað þær voru að fara. Auðvitað ættu allir jarðarbúar að tala sama tungumál. Þetta sannar það eina ferðina enn.

Tvær konur handteknar vegna markaðsbrellu

Verðtryggingin næst?

Það er nú rökrétt framhald af þessum dómum að verðtryggingin verði líka dæmd ólögmæt. Verðtryggingin er bara önnur aðferð við að koma gengisbreytingum inn í útreikninga bankanna. Og verðtryggðar lánakrónur eru allt aðrar krónur en óverðtryggðar launakrónur. Þannig að verðtryggingin hlýtur að verða dæmd ólögleg líka verði eftir því gengið fyrir dómstólum.

1. gr. laga nr. 22/1968 um gjaldmiðil Íslands er svohljóðandi: Gjaldmiðill Íslands nefnist króna, er skiptist í hundrað aura.

Þegar þessi lög eru lesin til enda er augljóst að ekki eru margar gerðir af krónum leyfðar, t.d. verðtryggðar og óverðtryggðar. Þannig að ef eitthvað er að marka þessi lög um gjaldmiðil Íslands, þá er ekkert til sem heitir verðtryggð króna og verðtryggingin því ólögleg.

Gaman væri að fá álit fleiri aðila á þessu úr því að ljóst er orðið að Hæstiréttur dæmir eftir lögum frekar en vilja ríkisvaldsins.

Gengistryggingin dæmd óheimil

Mín nöldrar aldrei í mér.

Ég var nú alveg hreint steinhissa á að breskar konu nöldri svona mikið í eiginmönnum sínum. Mín er að vísu íslensk en ekki bresk en hún hefur ekki nöldrað í mér í mörg ár samfleytt. En svo las ég áfram og sá að upp voru taldar helstu ástæður fyrir nöldrinu í kellingunum. Þá fór ég að skilja þetta betur. Karlar hafa náttúrulega alls konar leiðinlega siði sem eðlilegt er að nöldrað sé yfir, sérstaklega þegar konurnar þurfa að horfa upp á að kallinn þeirra gerir allt það sem er á þessum topp 10 lista yfir nöldurefni. Ég er sem betur fer laus við flest af þessu eins og ég geri betur grein fyrir hér á eftir.

Topp 10 algengustu nöldurefni kvenna:

1. Þrif heimilisins - Ég þríf aldrei heimilið þannig að það þarf ekki að nöldra yfir því.
2. Uppvaskið - Ég vaska heldur ekki upp, ekkert nöldur út af því.
3. Eyðsla peninga - Ég eyði of miklum peningum en hún nöldrar samt ekki yfir því.
4. Ekki nógu rómantískur - Ekkert nöldur þar, líklega nógu rómantískur.
5. Flokkar ekki þvottinn - Kem ekki nálægt þvottinum, fer samt úr fötunum sjálfur.
6. Horfir of mikið á íþróttir - Horfi helst aldrei á íþróttir.
7. Drekkur of mikið - Sjálfsagt átt við bjór og annað áfengi þarna, ég drekk ekki svoleiðis.
8. Býr ekki um rúmið - Hún gerir það alltaf, vill ekki að ég geri það.
9. Eyðir of miklum tíma í tómstundum - Mínar tómstundir eru flestar með henni.
10. Slær ekki grasið - Erum sem stendur í graslausu húsnæði, en slæ annars grasið eftir þörfum.

Konur nöldra í heila viku árlega

Fyrstu skilyrðin að koma fram.

Það er gaman að sjá hvaða skilyrði eru sett fyrir aðild Íslands að ESB.
Nú þegar eru komin nokkur eins og t.d. þessi ef ég man þetta allt rétt:

Borga Icesave.
Hætta hvalveiðum.
Opna fiskveiðlögsöguna.
Hætta framleiðslu landbúnaðarvara.
Afhenda orkuauðlindir.
Gott embætti í ESB fyrir Össur.

Margt fleira á eftir að bætast á þennan lista. Og hvað skyldi nú verða eftir af Íslandi fyrir þá sem nú byggja landið þegar samningurinn verður staðfestur? Það verður gaman að sjá hvað það verður.

Vilja að við hættum hvalveiðum

Fólk er að íhuga sjálfmorð við Alþingishúsið, ætti ekki frekar að ræða það?

Það er gott að þingmenn hafa nógan tíma til að liggja í ljósalömpum og ræða um hver notar þá mest. Þetta er gott því að þá hljóta þeir líka að hafa tíma til að tala um eitthvað sem máli skiptir fyrir landsmenn eins og t.d. það hve margir muni á næstunni fremja sjálfsmorð á tröppum Alþingishússins vegna ónýtrar efnahagsstjórnar sömu þingmanna. Hugleiðingar um þetta má lesa á Pressunni. Sjálfsmorð á tröppunum hjá ykkur geta verið mjög varasöm, því þið gætuð dottið um líkin og meitt ykkur. Þetta er því verulega brýnt mál að ræða.

Þingmenn mættu líka alveg lyfta skítugum, sólbrúnum og hrukkóttum rössum sínum af þingmálum varðandi órétt sem skuldarar í þessu landi eru beittir alla daga. Þessi mál hafa víst fengið að danka í eitt og hálft ár. Öll lán eru í raun gengistryggð í dag, þau eru allavega ekki í sama gjaldmiðli og launin í landinu, sem eru í óverðtryggðum og ógengistryggðum krónum. Og bankalán eru flest með breytilegum vöxtum sem gerir það að verkum að enginn getur fundið út fyrirfram hvað þarf að borga af þeim. Það fer bara eftir duttlungum og græðgi bankanna. Á Íslandi haga bankarnir sér eins og rándýr sem rífa viðskiptavini sína á hol. Frá hruni hefur 250-300 milljörðum verið bætt á skuldara í landinu, það eru aðgerðir þessarar ríkisstjórnar.

Nú þurfa Alþingismenn að taka smá próf um stjórnun landsins.

1. Alþingi á að stjórna landinu með hagsmuni íbúanna að leiðarljósi.
2. Alþingi á að stjórna landinu eftir tilskipunum AGS og bankanna.
3. Alþingi á að vera spillt og blint eins og það var fyrir hrun og hver þingmaður að hygla sjálfum sér og vinum sínum. Punktur.
4. Alþingi á að líta á landsmenn sem þræla til að búa til verðmæti sem fámennur hópur stingur í eigin vasa.

Takið nú prófið, þetta er ekki flókið. Það verður svo gaman að sjá hve margir krossa við hvern möguleika!

Hér má finna greinina sem ég vísaði til í upphafi.
http://www.pressan.is/Frettir/LesaFrett/orvilnun-skuldara-allt-fer-i-skuldir-thar-til-eg-dey--til-hvers-tha-ad-lifa

Á að búa til sérstakan skuldaskatt ofan á annað?

Það er engu að treysta hjá þessu Alþingi. Ég er nú ekki viss um að sér fundur um málefni skuldara sé eitthvað sem komi þeim vel. Það gæti alveg eins verið að menn ræði bara nýja skatta eða eitthvað í þeim dúr. Það er allavega hægt að sjá í meðfylgjandi frétt að í þeim efnum eru þingmenn ekki af baki dottnir. Búnir að nota drjúgan tíma í að undirbúa heimsfrumsýningu á nýjum skatti á bíleigendur sem verður væntanlega tekinn hér upp fljótlega með ærnum tilkostnaði. Það er víst mikill áhugi á að setja GPS tæki merkt ríkinu í hvern bíl í landinu, nema kannski bíla tignarmanna sem hingað koma frá Kína og AGS. Það er auðvitað ekki verið að þessi í öryggisskyni eða til að hjálpa bíleigendum að rata sína leið, enda vita þeir nú flestir hvert þeir eru að fara, nema kannski þeir sem þurfa einkabílstjóra. Nei, þetta tæki er víst nýr skattmælir fyrir AGS sem dyggasti starfsmaður þess sjóðs, Steingrímur J. Sigfússon, ætlar að nota til að safna fé fyrir Jón Ásgeir og Björgólf og vini þeirra frá almenningi á Íslandi til að bæta tapið af útrásar og bankaruglinu í þeim á undanförnum árum.

Sjá meira um þetta hér:
http://www.pressan.is/Frettir/LesaFrett/verdur-farid-ut-i-storfellda-gjaldtoku-a-helstu-thjodvegum-ossur-vill-skoda-moguleikann

En talandi um útrásarvíkinga. Hvað skyldi vera að frétta af ákærunum sem átti að byrja að gefa út á þá fyrir lok apríl 2010? Það er ekki neitt að frétta af þeim, allavega hef ég ekki heyrt þær fréttir. Svo virðist sem menn andi bara rólega gagnvart þessum glæponum og saksóknari og stjórnvöld voni að almenningur fari að gleyma þessu svo þeir geti farið að herja á þræla sína aftur. Raunar er Björgólfur aftur kominn óbeint á vaspeninga frá ríkinu. Samfylkingin með Vilhjálm Þorsteinsson í fararbroddi allt í kring um borðið er búin að ná í nokkur hundruð milljóna virði í styrkjum og afsláttum til nýjasta fyrirtækis Björgólfs, gagnaversins í Reykjanesbæ. Það lá víst meira á að hjálpa Björgólfi með nokkur hundruð milljónir en að huga að heimilunum á Íslandi. Enda styðja þau ekki öll Samfylkinguna eða VG.

Sérfundur um málefni skuldara

Hvaða rök eru fyrir þessari fullyrðingu? - þetta er bara þvæla.

Skv. öðrum fréttum þá eru vextir nú þegar hækkandi eða svo ég vitni orðrétt í aðra frétt í dag "The European sovereign debt crisis appears to be nowhere near over. The global credit environment is worsening. Cost of capital is going up and availability is going down." Ég veit ekki hverjum getur dottið í hug að þegar nánst öll ríki heims eru að verða gjaldþrota og framfleyta sér á lánsfé af því menn vilja ekki viðurkenna hvernig peningakerfið virkar, að þá geti vextir verið lágir. Vextir ráðast á fjármálamörkuðum í dag. Það eru ekki Seðlabankarnir sem ákveða þá, því þeir eru allir blankir, eiga enga peninga. Á meðan hinn frjálsi markaður ræður vöxtunum geta þeir ekkert annað en verið háir. Það eru þeir í dag og fara hækkandi. Græðgi markaðarins sogar til sín auðævi heimsins í gegn um háa vexti. En það eru þjóðir heims sem tryggja háa vexti umfram allt annað með endalausum hallarekstri og skuldasöfnun og þar með gríðarlegri eftirspurn eftir lánsfé. Þess vegna þarf að koma vitinu fyrir stjórnmálamenn. Þeir eru stærsta vandamálið í hagkerfi heimsins í dag, hvort sem er á Íslandi eða í öðrum löndum. Eina leiðin til að lækka vexti, sé til þess vilji, er með beinum og ákveðnum ríkisafskiptum. Þar er verðbólga besta leiðin. Auðvitað verður þessi leið farin að lokum. En það er ekki að gerast á næstunni og því munu áfram verða háir vextir og vaxandi kreppa um mestallan heiminn. Hér er slóð á fréttina sem ég vitnaði í í upphafi þessa bloggs.

Vextir hækka ekki fyrr en 2011