Skítalykt af þessu.

Ég hélt að maðurinn væri bara grunaður um að ætla að draga fram í dagsljósið 15000 leyniskjöl frá Bandaríkjaher og birta þau á Wikileaks. Enda hefur hann sagt að hann ætli að gera það. Það þykir nú víða góð ástæða til að koma honum bak við lás og slá að ætla að upplýsa um starfshætti stjórnvalda sem greinilega þolir ekki dagsljósið. En það er kannski hluti af starfsháttum sumra ríkisstjórna og stjórnarstofnana að klína á menn nauðgunum til að koma þeim í steininn þegar birting óþægilegra upplýsinga er í farvatninu.

Þetta er nú ljóti heimurinn sem við búum í. Verstu glæpamennirnir eru ekki þeir sem nauðga og drepa stöku sinnum heldur þeir sem stýra ríkjum sem bera ábyrgð á nauðgunum og drápum í þúsunda og tugþúsundavís.

Ekki lengur eftirlýstur

Mikill tími sem fer forgörðum.

Miklu af þeim tíma sem er varið í sjónvarpsgláp og síma og tölvunotkun er illa varið. Mér þykja það heldur slæmar fréttir að tæknin sé búin að ná þvílíkum tökum á fólki að nærri helmingur þess tíma sem það er vakandi fari í að handfjatla og horfa á þetta dót sem er kallað samskiptabúnaður. Og með öllum þessum samskiptabúnaði verða samskiptin samt ópersónulegri og á margan hátt rýrari en áður.

Og þetta er ótrúlegur tími sem er varið í þessa gerð samskipta. Ef við gerum ráð fyrir að menn sofi að jafnaði 8 tíma þá eru eftir 16 tímar af sólarhringnum. Af þessum 16 fara þá um 7 tímar og 12 mínútur í þessa nýju samskiptatækni. Þá eru það tímarnir sem eftir eru 8 tímar og 48 mínútur sem fólk hefur til að vinna, borða, fara á fætur, í bað, hátta sig, lesa, og stunda gamaldags samskipti eins og t.d. að tala við annað fólk maður á mann.

Það er orðið ansi mikið að nota rúma 7 tíma í sjónvarp, tölvu og síma á dag pr. einstakling finnst mér. Ef þessi þróun heldur áfram mun tæknin að lokum leiða til afturfarar og draga úr hagvexti.

Eyða helmingi vökustunda í samskiptabúnað

Fjölmiðlar Jóns Ásgeirs eru allir ríkisreknir en ritstýrt af Jóni.

Ég skil nú ekki að það sé verið að búa til fréttir um fullyrðingar Páls Magnússonar um peningamál Jóns Ásgeirs varðandi fjölmiðla hans. Þetta sem Páll heldur fram hélt ég að allir hefðu vitað lengi. Sem er í meginatriðum að þessir fjölmiðlar eru allir ríkisreknir með reglulegum gjaldþrotum þar sem skuldir eru afskrifaðar og færðar almenningi í landinu til greiðslu. En Jón að sjálfsögðu ritstýrir fjölmiðlum sínum, ýmist beint eða með strengjabrúðum sínum, þó rekstrarkostnaðurinn sé reglulega færður yfir á almenning. Þá virðist það skína í gegn um þetta rekstrarmódel að Jóni sé fjandans sama um eignarhaldið á þessum fjölmiðlum í sjálfu sér, enda aldrei nein eign í neinu af þessu. Það sem hann sækist eftir er bara ritstjórnarvaldið, að ráða því hvernig þessi áróðursmaskína er notuð í hans þágu til að fegra stríðsrekstur hans gegn efnahag almennings á Íslandi.

Þetta er í fáum orðum það sem fjölmiðlarekstur JÁJ snýst um og er altalað í landinu.

Óska Páli velfarnaðar

Ég hélt í augnablik að hann hefði reynt að gera gagn á síðustu stundu.

En það var ekki svo ef mark á að taka á honum sjálfum. Þegar maður las eftir því sem Björgólfur segir, að Ólafur hefði hringt í hann og sagt honum að koma heim til að reyna að redda málum, þá hélt ég að Ólafur hefði ákveðið að hjálpa til. Reynt að gera smá gagn eftir öll partíin og bréfaskriftirnar, með því að segja Bjögga að koma heim og reyna að laga til í bankanum og hjálpa til við að bjarga honum.

Ólafur segir hins vegar að ekkert sé til sem styðji þær fullyrðingar að hann hafi átt þetta símtal við Bjögga. Þannig að svo virðist sem Ólafur hafi ekki séð tilefni til að ýta við honum að redda málunum. Þar með virðist Ólafur ekki hafa reynt að gera þetta litla gagn sem etv. var í þessu símtali sem hann telur Bjögga vera að ljúga upp á sig.

Það vekur reyndar eftirtekt við lestur svars Ólafs að hann orðar svarið á þá leið að engin gögn finnist sem staðfesti það að hann hafi hringt í Bjögga á hrundögunum. Þetta virðist hafa verið svo ómerkilegt mál, það sem var að gerast í bönkunum, að hann man ekki hvort hann hringdi í einhvern eða ekki út af þessu og þarf að leita í gögnum til að svara því hvort Bjöggi er að segja rétt frá eða ekki.

Einhver annar þjóðarleiðtogi hefði nú kannski munað það án þess að fletta upp í skjalasafni sínu hvort hann aðhafðist eitthvað eða ekki dagana sem þjóð hans setti heimsmet í bankahruni m.v. höfðatölu. Dagana sem mörkuðu upphaf stórfellds atvinnuleysis í landinu og fólksflótta frá því. Dagana sem Íslendingar, vopnlausa friðelskandi þjóðin, var með beitingu laga í Bretlandi lýst hryðjuverkaríki.

Nei, forsetinn man ekkert hvað hann var að gera þessa daga og þarf að fletta því upp. Ég sé ágætlega fyrir mér aulasvipinn á honum núna.

Hringdi ekki til Björgólfs

Þessi Wessman er nú sjálfur rugludallur.

Þessi Róbert Wessman er nú meiri rugludallurinn sjálfur. Ég held að hann viti sjaldnast hvort hann er að meina það sem hann segir eða ekki.

Fyrir nokkrum árum skreytti hann sig með því loforði að gefa Háskólanum í Reykjavík einn milljarð sem átti m.a. að nota í að reisa nýja háskólabyggingu út undir Nauthólsvík. Nú fyrir nokkrum vikum tilkynnti hann að hann væri hættur við að gefa 500 milljónir af þessum milljarði. Ekki veit ég hvort hann var búinn að greiða út hinn helminginn af loforðinu eða ekki. Hann ákvað allavega að taka ekki mikið mark á sjálfum sér varðandi þetta loforð um milljarðinn.

Á sumum fréttamiðlum er haft eftir Wessman að hann hafi hætt skv. samkomulagi við Bjögga til að einbeita sér að rekstri Salt Investment. Það er eitthvað félag sem hann notaði við fjárfestingar og þá aðallega fjárfestingar í Actavis. Þannig að þegar hann var rekinn frá Actavis hafði hann það mikla trú á Bjögga að hann ákvað að einbeita sér að því að fjárfesti í stærsta fyrirtæki hans. Auðvitað er þetta Salt Investment handónýtt félag í dag. En engu að síður sýnir þetta vel hvað Róbert Wessmann er mikill rugludallur. Eða hvað segir það um hann sjálfan að þegar hann er rekinn frá Actavis þá ákveður hann að einbeita sér að því að fjárfesta í þeim sem rak hann þó hann segi nú að sá maður sé rugludallur sem ekkert er að marka.

Nú er ég ekkert að verja Björgólf. Auðvitað reynir að fegra eigin gerðir eins og mest hann má á sinni bloggsíðu. Það er mjög skiljanlegt og nauðsynlegt fyrir hann að fá syndaaflausn hjá þjóðinni sem fyrst því hann stendur í ríkisstyrktum stórfjárfestingum í félagi við innstu koppa í búri Samfylkingarinnar. Auðvitað verður að láta þetta allt líta sem best út eftir á sem aflaga fór í viðskiptum Björgólfs. Og hann verður auðvitað að berja það inn í hausinn á okkur vitleysingunum sem gagnrýnum hann að hann sé alsaklaus af Icesave og öllu sem aflaga fór í Landsbankanum. Það var ekkert honum að kenna, hann átti bankann bara á pappírnum, borgaði aldrei kaupverðið að fullu og því ekkert hægt að kenna honum um eitt eða neitt, eða hvað?

En þessi gagnrýni frá Wessman, og skiptir þá engu máli hvort hún er rættmæt eða ekki, er svo vitlaus og kjánaleg að hún vekur upp spurninguna um hvort þessir viðskiptamógúlar þurfa ekki að ná allavega 80 stigum á greindarprófi áður en bankarnir lána þeim milljarða og tugmilljarða til að nota í viðskiptum við menn sem þeir halda fram að ekkert mark sé takandi á?

Eða hvernig fór Wessman að því að ná í fjármagn til að fjárfesta í Actavis eftir brottreksturinn fyrst honum þykir Bjöggi svona vitlaus eins og hann segir.

Kannski labbaði hann inn í einhvern banka og viðtalið var á þessa leið.

Wessman: - "Hæ, ég var rekinn frá Actavis í gær og Bjöggi sagði að ég hefði klúðrar rekstraráætluninni. Allavega þarf ég að finna mér eitthvað annað til að græða á fyrst hann var með þessa stæla við mig.

Bankamaður: - Æ, varstu rekinn, það var leiðinlegt. Ertu með einhverja sniðuga hugmynd til að fjárfesta í?

Wessman: - Ég er eiginlega að hugsa um að fjárfesta bara í Actavis. Ég var að vísu rekinn þaðan og það er svosem ekkert að marka Bjögga aðaleiganda. Hann segir eitt í dag og annað á morgun og kennir mér um allt sem fer illa. En ég er samt viss um að Actavis á eftir að stórgræða á næstu árum. Bjöggi segir það allavega. Ég er alveg viss um að þetta er besta fyrirtæki í heimi.

Bankamaður: - Já, við verðum nú að taka mark á Bjögga. Hann hefur líka ekkert meint með því þegar hann var að reka þig og skamma þig fyrir eitthvað klúður. Hann hefur bara misstigið sig þegar hann fór á fætur í gær. Já, þetta er líklega bara bráðsniðugt hjá þér að fjárfesta í Bjögga - eða Actavis sem sagt. - Hvað þarftu mikið, er nóg að byrja með 2-3 milljarða?

Wessman: - 2-3 milljarðar er nú ekki mikið, en það dugir kannski til að byrja með. Ég þarf að athuga hvað ég get keypt mikið af bréfum þarna. Það er svo mikill gróði framundan í þessu að menn eru nú ekkert spenntir fyrir að selja bréfin hvort sem er. Settu þetta þá bara á reikninginn hjá mér á eftir. Þarf ég einhvers staðar að kvitta?

Gekk þetta einhvern veginn svona fyrir sig?

Segir Björgólf fara með rangt mál

Vondar fréttir heima og heiman eru góðar fréttir fyrir íslensku bankana.

Útflutningsbann á korni frá Rússlandi eru góðar fréttir fyrir íslensku bankana því þetta ýtir enn frekar undir hækkun á kornverði á heimsmarkaði. Þar með þarf að hækka verð á brauði og kökum og þar með hækkar lánskjaravísitalan á Íslandi og bankarnir auka verðbólgutekjur sínar af útlánum.

Flóð í Pakistan og Póllandi og Þýskalandi og hvar sem er gera alveg sama gagn fyrir íslensku bankana því þau eyðileggja líka uppskeru og auka eftirspurn og hækka verð á matvælum almennt og þar með hækkar lánskjaravísitalan á Íslandi og bankarnir auka gróða sinn.

Frestun á olíuleit á Drekasvæðinu eru líka góðar fréttir fyrir íslensku bankana. Það að fresta olíuleitinni minnkar möguleikana á að á næstu árum verði tilkynnt um nýjar olíulindir og þar með heldur áfram verðhækkun á eldsneyti á heimsmarkaði sem kemur fram í verðlagi á Íslandi og fer inn í lánskjaravísitöluna sem eykur gróða bankanna.

Skógareldarnir í Rússlandi koma íslensku bönkunum ekki bara vel út af verðhækkunum á korni. Þeir hafa líka áhrif á timburmarkaði og ýta undir verðhækkanir á timbri. Það fer svo inn í verðlag á Íslandi og hækkar lánskjaravísitöluna sem eykur verðbólgugróða bankanna.

Og starfsmannaskírteinin sem á að byrja að innleiða á Íslandi í næstu viku stórauka verðbólgugróða bankanna ef þau virka eins og til er ætlast. Þessum skírteinum á að beita til að uppræta svarta vinnu. Svört vinna hefur lengi þrýst niður verðlagningu iðnaðarmanna svo dæmi sé tekið, því ekki nema um þriðjungur af því sem innheimt er fyrir vinnuna fer í vasa iðnaðarmannsins. Hitt fer til annarra aðila, aðallega ríkisins. Þeir sem eru með allt löglegt (hvítu mennirnir) þurfa að selja tímann á um 7-8.000 kr. til að geta greitt starfsmönnum út sambærilegt tímakaup við þann sem selur sig út á 2.000-2.500 kr. svart. Eins og margir vita er algengt útselt tímakaup með öllu á bilinu 3.500 - 5.000 kr, en ekki 7-8.000 kr hjá hvítu mönnunum sem enda eru flestir að berjast í bökkum í sínum rekstri. Ef vel gengur að uppræta svarta vinnu og koma þessari ódýru samkeppni út af borðinu ættu hvítu mennirnir að geta farið að selja sig út á réttu verði. En það fer auðvitað beint í lánskjaravísitöluna og eykur verðbólgugróða bankanna.

En það er alveg merkilegt að þrátt fyrir endalausar ófarir í heiminum sem hafa reiknast inn í lánskjaravísitöluna allar götur síðan hún var tekin upp þá fóru allir bankarnir á hausinn í sömu vikunni.

Og þrátt fyrir að bankarnir geti ekki þrifist með lánskjaravísitöluna sem hækju til að styðjast við og berja á skuldurum um leið, þá má samt ekki leggja niður þessa vitlausu aðferð við að framreikna verðmæti lána.

Útflutningsbann á korni tekur gildi

Ég er alveg sammála Moodys.

Auðvitað er það rökrétt mat hjá Moodys að lánshæfismat Íslands stefni enn niður á við. Við erum með ríkisstjórn sem hefur ekkert gagn gert síðan hún tók við völdum. Fjárlagahallinn er stjarnfræðilegur. Það kemur slynkur á efnahag heimilanna þegar farið verður í að rétta fjárlagahallann af. Opinberar skuldir aukast dag frá degi. Við erum að gefa frá okkur nýtingarrétt af sumum okkar mikilvægustu auðlindum. Fólki á atvinnuleysisskrá hefur lítið fækkað og að tala um fækkun á því sviði felur í sér mikla sjálfsblekkingu því hún er til komin vegna þess að fólk hefur verið duglegt að flytja úr landi. Landsmönnum fækkaði í fyrra í fyrsta sinn í 130 ár. Skattgreiðendum hefur fækkað verulega. Fjármálakerfið er endurreist í óbreyttri mynd með flestum sömu persónum og settu það síðast á hausinn. Allir helstu glæpamenn landsins ganga enn lausir og jafnvel verið að púkka sérstaklega undir þá svo þeir geti haft það náðugt áfram. Sérstakur saksóknari hefur engum árangri náð ennþá. Búinn að skrifa út kærur á nokkra einstaklinga vegna Byrs út af málum sem ekki eru stór í heildarmafíustarfsemi Íslensku útrásarinnar. Samkeppnisumhverfi á Íslandi er þannig að þeir sem skulda mest og kunna minnst í rekstri eru fjármagnaðir af gjaldþrota bönkum svo þeir sem kannski gætu spjarað sig hjálparlaust í eðlilegu samkeppnisumhverfi eiga sér ekki viðreisnar von í þessu niðurgreidda bankagjaldþrota umhverfi.

Svona má endalaust halda áfram. Vitleysan í efnahagsmálum landsins er takmarkalaus. Hvernig gæti nokkuð matsfyrirtæki fundið annað út við skoðun á þessu en að allt stefni enn á verri veg hjá okkur?

Og svo eru Seðlabankastjóri og Efnahagsmálaráðherrann á allt annarri skoðun. Þeim sýnist þetta ágætis fyrirkomulag hjá okkur og að við séum á réttri leið í þessari stöðu!! Þvilíkir vitleysingar.

Seðlabankastjóri bjartsýnn

Lókgískt hjá Eygló.

Ég er ekkert hissa á þessum vangaveltum Eyglóar út af orðanotkun aðstoðarmanns Iðnaðarráðherra. Sé alveg í anda þegar ráðherrann og aðstoðarmaðurinn hittast á morgunfundi í ráðuneytinu til að plana daginn og aðstoðarmaðurinn segir: Góðan daginn Katrín, þú ert bara tussufín í dag!. Katrín fer hjá sér af þessu hóli og roðnar dálítið um leið og hún segir takk, takk, hvað þurfum við nú að ræða í dag? Verðum við ekki að finna einhverja tussufína lausn á þessu Magma klúðri?

Og svona heldur umræðan áfram. Ég er ekki hissa þó Eygló telji þörf á að þvo einhverjum um tunguna og kenna ráðuneytismönnum þá lexíu að starf þeirra snýst um allt annað en klámfengna nýyrðasmíð í tölvupóstum.

Þetta er þess vegna alveg göndulgott framtak hjá henni Eygló að auglýsa eftir afstöðu kynsystra sinna til þessara starfshátta og orðavals.

Pósturinn sem innihélt ORÐIÐ

Mistök í tölfræði atvinnuleysisskrifstofu Bandaríkjanna?

Við lauslega skoðun á tölum um atvinnuleysi í Bandaríkjunum virðist það einfaldlega vera rangt að atvinnulausum hafi fækkað úr 9,7% í 9,5% í síðasta mánuði. Þarna virðist einhver feilreikningur hafa átt sér stað, nær lagi er að atvinnuleysið sé 9,9-10,0% ef rýnt er í tölurnar. Það er spurning hvað gerist á mörkuðum vestanhafs þegar menn þar átta sig á réttum tölum. Kannski voru villandi tölur birtar til að forða uppnámi á viðkvæmum fjármálamörkuðum.Það að menn túlka tölurnar á misjafnan hátt þykir mér benda til að einhverjir hafi áttað sig á að þær eru ekki alveg réttar.Skv. fréttatilkynningu frá atvinnuleysisskrifstofu Bandaríkjanna hefur t.d. vinnandi Bandaríkjamönnum fækkað úr 58,7% í 58,5% af fólksfjölda á milli mánaða. Fyrir ári síðan var þetta hlutfall um 59,4%Þessar tölur, ef réttar eru, sýna ótvírætt að atvinnuástand versnar jafnt og þétt í USA. Það er aftur örugg vísbending um viðvarandi lægð í efnahagslífinu.Tölfræðina má skoða hér.

http://www.bls.gov/news.release/empsit.a.htm 

Lækkun í New York

Allt að klárast, ekkert að hefjast í staðinn.

Það eru öll stærri verkefni fyrir verktaka að klárast á næstu mánuðum, t.d. háskólinn í Reykjavík og Harpa tónlistarhús auk ýmissa annarra ófrægari verkefna. En í staðinn fyrir þessi verkefni sem senn klárast eru engin að hefjast sem tekur því að tala um. Þar að auki er samdráttur í viðhaldsverkefnum ríkis og sveitarfélaga út af almennu aðhaldi á meðan peningum verður rakað saman til að færa fjármálafyrirtækjunum í verðlaun fyrir glórulausa starfsemi á undanförnum árum.

En á sama tíma og öll verkefni fyrir verktaka eru að klárast eru engin önnur að fara af stað. Það er búið að tala eitthvað um verkefni, þeim hefur öllum verið frestað eða dregist að koma þeim af stað, ef frá er skilið gagnaver Björgólfs Thors í Reykjanesbæ sem fékk sinn ríkisstuðning afgreiddan fyrir nokkrum vikum frá Alþingi eins og kunnugt er.

Í dag var tilkynnt um að fljótlega verði boðin út bygging á fangelsi sem ekki er vitað hvar á að vera. Svona er sýndarmennska stjórnvalda gagnvart verktökum. Það vita nú allir vakandi menn að það verður lítið gert í húsbyggingu sem enginn veit hvar á að vera. Kannski mætti setja þetta fangelsi í kjallarann í Hörpu, það væri þá tryggð einhver smá nýting á þessu húsi sem kostar um 30 milljarða og stefnir í rekstrarstöðvun áður en það kemst í rekstur.

Á meðan verkefnaframboð er ekki neitt þá er ekkert sem verktakar geta gert annað en segja upp fólki. Svona verður þetta því miður næstu áratugina á meðan allir tiltækir fjármunir verða notaðir til að borga fyrir Jón Ásgeir og Björgólf Thor og félaga þeirra.

Og það er ekkert að gerast hjá einkaaðilum í framkvæmdum. Almenningur flýr land og fyrirtækin draga saman starfsemi sína. Það er því nóg af auðu atvinnuhúsnæði og vaxandi framboð af yfirgefnu íbúðarhúsnæði þannig að ekki þarf að hefja neinar nýbyggingar af því tagi næstu árin heldur.

Iðnaðarmenn geta því flestir horft fram á rólega tíma framundan og lesið uppsagnarbréfin aftur og aftur.

76 sagt upp hjá verktakafyrirtækjum

Miklu fleiri á leiðinni til Noregs og fleiri landa.

Ég þekki orðið marga Íslendinga í Noregi og fleiri löndum sem ég umgekkst reglulega hér á höfuðborgarsvæðinu fyrir 1-2 árum.

Sá síðasti sem fór til Noregs af mínum kunningjum fór þangað í stutta kynnisferð í maí. Hann ætlaði að vera ca. 2 vikur og athuga með atvinnuhorfur og almennt hvernig honum litist á landið. Það næsta sem ég frétti af honum var að hann ákvað að kaupa ekki farmiða til baka til Íslands. Hringdi þess í stað í kærustuna og sagði henni að segja upp í vinnunni og kaupa sér miða út sem fyrst. Og hún er víst á leiðinni út til hans bráðum. Hitti frænda hans um daginn, sá var í óða önn að raða í gám fyrir þau og fleiri sem eru farnir út til Noregs úr fjölskyldunni.

En það fara ekki allir til Noregs. Ein fjölskylda úr kunningjahópnum fór í vikunni til Ameríku, one way ticket fyrir allan hópinn.

Nú á ég líka orðið svona kunningja í Svíþjóð, Grænlandi og á Spáni og kannski víðar.

Ástandið hér heima er þannig að það er eins og í gamla daga þegar börn fátæklinga voru send í fóstur á betur stæð heimili. Nú er það bara þannig að Íslendingar eru sjálfir að koma sér í fóstur í öðrum löndum þegar bananalýðveldið Ísland með Steingrím Mugabe og Jóhönnu Marcos við stjórn gerir fólki ókleyft að þrífast hér á sambærilegan hátt við það sem gerist í velferðarþjóðfélögum skandinavíu og Ameríku, landi tækifæranna.

Hér er stjórn Steingríms Mugabes að gera nákvæmlega það sama og Robert Mugabe gerði í landi sínu Zimbabve. Að reka hvíta menn af eignum sínum og úr landinu og keyra allt efnahags- og atvinnulífið til helvítis með verðtryggðri óðaverðbólgu og okurvöxtum. Reyndar er Steingrímur verri en Robert að því leyti að Steingrímur lemur á þjóðinni með verðtryggingunni. Robert Mugabe er hófsamari að því leytinu að hann hlífir mönnum þó við henni.

NRK: Íslendingar flykkjast til Noregs

Margt öfugsnúið í dag.

Nú er Hitler alveg bannaður í Þýskalandi, það er stjórnarskrárbrot að nota hluta úr ræðum hans sem hringitón í farsíma. Á sínum tíma var Hitler samt dáður og dýrkaður af þjóðverjum. Svo urðu þeir reyndar hræddir við hann og að lokum svo andsnúnir honum og skömmustulegir að nú er hann í eilífðar banni hjá þeim.

Þetta minnir á annað atvik í síðustu viku, þegar Tyrkir bönnuðu ísraelskri flugvél að fara um Tyrkneska lofthelgi á leið sinni til Auschwitz með Ísraelska fyrirmenn. Þeir urðu því að krækja fyrir Tyrkland og fara lengri leið. Á Hitlerstímanum var það nú ekki vinsælt hjá gyðingum að fara til Auschwitz, þá voru þeir neyddir til þess og drepnir þar í stórum stíl eftir þrældóm og harðræði, en nú gegnir öðru máli, þó þeim sé bannað að fara þangað stystu leið, fara þeir samt.

Og það er af sem áður var þegar Hitler níddist á gyðingum og lét drepa þá í milljónavís. Þó þeir hafi allra manna helst á síðari tímum fengið að kynnst óþverraskap af versta tagi þá hefur það ekki kennt þeim að standa sig betur þegar þeir hafa tækifæri til þess, þvert á móti hafa þeir tekið upp þráðinn þar sem Hitler var stöðvaður. Gyðingar eru nú meðal þeirra alduglegustu við að níðast á öðrum. Nú eru það palestínmenn sem eru staðsettir í goggunarröðinni sem sú þjóð sem er best til þess fallin að níðast á. Og það af þeim sem verst var farið með á síðustu öld.

Svona er margt öfugsnúið í dag.

Fangelsaður fyrir Hitlersræðu-hringitón

Ábending til Seðlabankans - Hér er tilboð um 1,99% vexti, óverðtryggt.

Ég kíkti að gamni mínu á húsnæðisvexti í Bretlandi. Þar er verið að bjóða vexti á bilinu ca. 2-4% vegna endurfjármögnunar á óhagstæðari húsnæðislánum. Gengisáhætta og verðbólga og lántökukostnaður innifalin í þeim tilboðum.

Fastir vextir eru gjarnan 3,5-4% þegar allur kostnaður vegna lánanna er tekinn með í reikninginn en þegar vextirnir eru 1,99-3% eru þeir breytilegir.

Ef við horfum bara á nafnvexti eru þeir í öllum tilvikum 1,99-2,89%.Þetta virðist vera það sem Bretar hafa um að velja varðandi húsnæðislán. Fáum við svona tilboð hér? Ég býst varla við því, hér eru húsnæðislánavextir miklu hærri og lánin verðbætt þar að auki. Af hverju er þetta svona? Við þurfum svör við því.  Er það af því að fjármálakerfið hér sé gáfulegra en það breska?

Það er hægt að sjá á þessari síðu samanburð á bílalánum fyrir Breta. Þar eru mun hærri vextir en af húsnæðislánunum. ca. 9-20% þegar allt er reiknað.En úr því Seðlabanki Íslands er að reyna að hafa vit fyrir landsmönnum þá ættu bankastjórarnir að hafa vit á að skoða hvernig lánamarkaðurinn er í stað þess að búa til eitthvað sérstakt lánamarkaðsviðrini fyrir Íslendinga.

http://www.moneysupermarket.com/mortgages/ 

Miða við lægstu vexti á hverjum tíma

Skrár tengdar þessari bloggfærslu:

• PDF moneysupermarket

Lygi og veruleikafirring yfirvalda alla daga - 8% skjaldborg um gengislán.

Það er ótrúlegt að fylgjast með viðbrögðum og tilmælum út af ólöglegum lánum bankanna. Í staðinn fyrir að ráðast inn í húsakynni þessara glæpafyrirtækja og innsigla þau og stinga öllum helstu forsvarsmönnum í varðhald, eins og oft er gert þegar um minni glæpi en þessa er að ræða, er nú keppst við að finna leiðir til að bæta glæpafélögunum "tjónið" af að komast ekki upp með glæpina lengur. Nú er sjálfsagt að reisa 8% skjaldborg um fjármálafyrirtækin í hvelli út af gengistryggðu lánunum. Það tók ekki marga daga.

Ráð dagsins frá yfirvöldum er að taka 8% vexti í staðinn fyrir umsamda vexti af þessum lánum. Það eru engar sérstakar forsendur fyrir þessum 8%, því síður nokkur lagaheimild. Eins og bent hefur verið á er þetta einfaldlega lögbrot. En þetta ráð sýnir að það er bara verið að féfletta fólk og reyna að komast eins langt í því og menn halda að hægt sé á hverjum tíma, eða degi. Viðskiptaráðherrann vitlausi sem hefur margsnúist í hringi á undanförnum árum og skipt um skoðanir svo oft að ef hann aflaði ríkissjóði einnar milljónar í hvert sinn sem hann skiptir um skoðun þá væri ríkissjóður orðinn vellauðugur, hefur þá skoðun á þessu að menn geti alveg ágætlega ráðið við að borga 8% og því sé það bara fín niðurstaða.

Viðskiptaráðherranum er sem sagt alveg sama um hvað hefur verið samið og hvaða lög hafa verið brotin. Það virðist engu skipta, menn eiga bara að borga það sem honum finnst þeir þola. Honum finnst sjálfsagt að vaða á skítugum skónum yfir almenning til að reyta peninga í glæpafyrirtækin.

Þeir sem standa nú vörð um þá sem vilja ræna almenning eru Seðlabankinn og ríkisstjórnin og skyldir aðilar. Sýn Steingríms J. og Jóhönnu Sig á málið er greinilega sú að þau vilja vera glæpaforingjar. Undir þeirra stjórn er nú unnið að því að styrkja glæpasamtökin svo þau geti haldið áfram að ræna almenning. Aldrei hefur það þótt gott siðferði að gera allt fyrir glæpasamtök svo þau geti starfað óhindrað og án nokkurra takmarkana. Það hefur oft verið talað um að hér sé réttarríki og siðað samfélag. Nú finnst mér þessi fullyrðing stefna í að eiga bara heima í sögubókum og kannski nýlegum fornbókmenntum. Ekki er að sjá að þetta sé raunin á Íslandi í dag.

Ég er nú farinn að sjá Marínó G. Njálsson talsmann hagsmunasamtaka heimilanna og þá aðila sem fóru með mál sín fyrir Hæstarétt sem nokkurs konar Hróa Hött Íslands og lið hans, þið getið þá áttað ykkur á í hvaða liði Steingrímur og Jóhanna og Seðlabankastjórinn eru. Þetta fólk sem herjar látlaust á almenning. En Marínó og félagar hafa unnið vel að því að koma á einhverju réttlæti í viðskiptum fjármálafyrirtæka við almenning. Það er meira en hægt er að segja um ríkisstjórnina og Seðlabankann.

Það þarf að fara að koma þessum vitlausu Seðlabankastjórum frá. Ef byggja á upp traust í fjármálum gengur ekki að Seðlabankinn hvetji til lögbrota. Sama á við um ríkisstjórnina og einstaka ráðherra í henni. Þetta lið er allt orðið kexruglað fyrir löngu síðan. Mesta hættan sem steðjar að efnahag Íslands er ríkisstjórn landsins. Með hverjum deginum sem líður sökkvum við dýpra í skuldir og hyldýpi fjármálakerfisins sem okkur er talin trú um að við verðum að efla hvað sem tautar og raular.

Það er logið að þjóðinni á hverjum degi af yfirvöldum. Stærsta lygi þessarar viku var þegar AGS, ríkisstjórnin apaði það auðvitað eftir þessu eftirlætisyfirvaldi sínu, sagði okkur að kreppan væri búin. Samt er Steingrímur varla byrjaður að skera niður hjá ríkinu eða hvað? Hann er búinn að boða tuga milljarða niðurskurð og einhverjar skattahækkanir að auki. Ef það er rétt að kreppan sé búin og allt að komast hratt í lag aftur eins og AGS menn fullyrtu, þá þarf Steingrímur varla að skera neitt niður. Hann getur þá bara farið að framkvæma aftur og haga sér eins og það sé uppgangur í þjóðfélaginu, en ekki kreppa. En kannski er þetta rugl í mér og AGS að segja satt. Kreppan er búin. En þá er það Steingrímur sem lýgur þegar hann segist næst þurfa að skera niður út af kreppunni.

Hvor aðilinn það er sem lýgur skiptir ekki öllu, örugglega eru þeir báðir að því. En ég hefði gaman af að sjá stutta greiningu á því af hverju AGS telur að kreppan sé búin. Ég vil ekki heyra, af því bara, heldur sjá það á blaði hvað það nákvæmlega er sem eflir nú hagkerfi Íslands svo mikið að það er komið á fleygiferð aftur upp úr kreppunni. Það hafa engar skýringar sést á þessari fullyrðingu. Á meðan þetta er ekki útskýrt er engin ástæða til að taka mark á þessu.

Segir hvatt til lögbrota

Skjaldborg um skipulagða glæpastarfsemi.

Það er ekki að sjá að það eigi að gera neitt í að taka á skipulagðri glæpastarfsemi bankanna og útrásarvíkinga. Það er sagt að forkólfarnir úr gömlu bönkunum og útrásinni séu nú margir í Suður Afríku að horfa á HM í fótbolta á besta stað í stúkusætum. Og svo er spilað golf og sukkað annað slagið til tilbreytingar frá boltanum. Þeir geta greinilega haft það náðugt þarna og slappað af því það eru engin mál í gangi frá skilanefndum bankanna. Engin mál eru farin frá sérstökum saksóknara heldur þó hann hafi boðið einhverjar ákærur fyrir lok apríl s.l. En skv. heimasíðu embættisins er ekkert þaðan að frétta síðan 25. maí s.l. þegar embættið auglýsti eftir fleira starfsfólki.

Það eina sem er verið að gera er það að ríkisstjórnin og seðlabankinn eru á leið í stríð við þjóðina. Nú er strax farið að ræða viðbrögð ríkisins við lögbrotum bankanna. Þau virðast í fljótu bragði verða á þá leið að slegið verði upp skjaldborg um lögbrotin og allra leiða leitað til að gera þau lögleg í hvelli og um leið að bæta bönkunum tjónið af að fá ekki að halda öllum ránsfengnum í þessum bankaránum sem þeir stunduðu á viðskiptavinum sínum.

Aldrei hefur það verið skýrara að það er búið að reisa öfluga skjaldborg í landinu. En hún er reist fyrir fjármálakerfið gegn almenningi. Hæstiréttur hjó skarð í þessa skjaldborg þegar hluti af glæpastarfseminni var dæmd ólögleg. Nú ættu flestir að fara að fatta að þessi ólánsríkisstjórn sem er þéttskipuð gjörspilltum óheillakrákum er ekki ríkisstjórn þjóðarinnar heldur fjármálakerfisins.

Þessi ríkisstjórn skirrist ekki við að standa vörð um skipulagða glæpastarfsemi og stendur þar keik ásamt Seðlabankanum og öðrum fjármálafyrirtækjum í fremstu röð þeirra sem ætla að ljúga að almenningi, svíkja hann og stela af honum með öllum tiltækum ráðum. Verkin sýna að í augum þessa fólks er almenningur bara þrælar fjármálakerfisins. Skjaldborgin snýst um að hafa þetta þannig áfram.

Ég hvet fólk til að taka til allra skynsamlegra ráða til að rísa upp gegn þessum órétti og ofríki. Það verður að ná tökum á þessari snarklikkuðu ríkisstjórn eða koma henni frá. Fyrr en hér tekur við völdum ríkisstjórn sem snýr baki við skipulagðri glæpastarfsemi og vill vinna fyrir þjóðina tekst aldrei að koma neinu jákvæðu og gagnlegu til leiðar við endurreisn Íslands.

Engu máli vísað til skattrannsóknarstjóra