Þjóðarskuldir Haíti svipaðar og íbúðaskuldir Jóns Ásgeirs.

Kostuðu ekki íbúðirnar hans Jóns Ásgeirs í New York eitthvað ca. 25 milljónir dollara. Svo er hann með eitthvað húsnæði í London, kannski á konan það, og einhvern skíðaskála einhvers staðar. Ég hugsa að skuldirnar vegna þessara eigna séu svipaðar og þjóðarskuldir Haíti við Alþjóðabankann, sem sagðar eru hafa verið um 36 milljónir dala skv. fréttinni.

Það að fella þessar skuldir niður er nú ekki stórt framlag í samanburði við þessara húsnæðisskuldir Jóns Ásgeirs sem ég tiltók hér. Svona geta sumir menn verið með persónulegar lántökur út af einkaneyslu, ekki rekstri, sem jafnast á við þjóðarskuldir milljónaþjóða. Svo er til fólk sem er að vorkenna þessu liði og verja það, segja að gagnrýni og lögsóknir séu bara ofsóknir. Þvílík veruleikafyrring. Það ætti að íhuga alvarlega að dæma Jón Ásgeir í útlegð til Haíti. Þar er það vel stæður maður sem getur keypt sér diet kók. Ég óttast bara að þó fátæktin á Haíti sé mikil og aðstaða almennings hörmuleg eftir jarðskjálfta og fellibylji ofan á almenna fátækt og stjórnleysi, þá muni menn eins og Jón Ásgeir gera almenningi þarna lífið enn verra. Og það er auðvitað ekki það sem ég vil. En hvað á að gera við þessa skúrka okkar??

Skuldir ei meir

X-Æ Jón Gnarr vonsvikinn með aðeins 7 menn vísa í borgarstjórn.

Ég sá í auglýsingablaði sem kom með póstinum í morgun að Jón Gnarr er svekktur ef Besti flokkurinn fær bara 7 menn í Reykjavík á morgun. Hann vonast þó til að kjósendur átti sig á lokasprettinum og tryggi áttunda mann Besta flokksins inn í Borgarstjórn. Ég heyrði kveðskap um þetta sem ég læt fylgja hér með.

Atkvæðin virðast heldur fá,
kosningu betri vill hann fá.
Meirihluti er markmiðið,
svo við fáum vinnufrið.

Áfram x,y,z,þ.æ,ö,
við þurfum fleiri menn en 7.
Svo höfuðborgin verði fín,
kjósum Besta flokkinn og meira grín.

X-Æ, X-Æ, hó og hæ,
gleðjumst út um allan bæ.
á laugardegi í ljúfum maí,
kjósum bara X-Æ, X-Æ.

Mun færri greiða atkvæði

X-Æ Danska lagið BEST í kvöld.

Mér fannst Danska lagið best í Eurovision í kvöld þannig að ég var ekki hissa þó það færi áfram. Þetta var eitthvað svo kunnuglegt lag og notalegt að hlusta á það. Kannski var það stolið eða stælt að einhverju leiti. Ég yrði ekki hissa þó það skoraði mjög hátt í lokakeppninni. Þetta var allavega miklu betra lag en sum lögin sem spáð er góðu gengi í keppninni og líka betra en þau sem ekki er spáð góðu gengi. En þetta er auðvitað smekksatriði og þjóðernispólitískt mál líka. Þess vegna er þetta svo spennandi keppni. Úrslitin ráðast af svo mörgu öðru en laginu sjálfu.

Alveg eins og í sveitarstjórnarkosningum á Íslandi sem bera upp á sama dag. Það er svo margt fleira sem ræður úrslitum í þeim en bara kosningastefnuskrá flokkanna. Líka spillingarstuðullinn og mútuþægni og almenn vanfærni frambjóðenda til pólitískra starfa, flokksóhollusta og undirlægjuháttur o.fl.

Nema auðvitað hjá Besta flokknum í Reykjavík. Þar eru færri þættir sem þarf að meta. Það er bara stefnuskráin og hvort það verði ekki aðeins skemmtilegra að hafa þann flokk og Jón Gnarr við stjórnvölinn.

Danir áfram en ekki Svíar

Ég hélt að þetta væri vegna væntinga um að draga muni úr spillingu á Íslandi?

Ég trúi ekki að hlutabréf í New York hækki bara af því að Kínverjar séu ekki svo blankir að þeir þurfi ekki að selja Evrur. Það er bara plat og engar nýjar fréttir í þeirri frétt. Svo er Evran svo sterkur gjaldmiðill að það á ekkert að valda sveiflum á hlutabréfamörkuðum þó Kínverjar selji nokkrar Evrur til að halda uppi nokkrum sendiráðum í ESB löndunum. Og hvenær fóru Bandaríkjamenn að spurja Kínverja hvernig þeir eigi að verðleggja hlutabréf sín frá degi til dags? Alvöru Kani mundi aldrei viðurkenna að einhverjir Kínverjar ráði verðinu á hlutabréfunum hans. Það eru allt aðrar ástæður fyrir þessum hækkunum í dag. Ástæðurnar má allar rekja til Íslands.

1. Gosið er hætt í Eyjafjallajökli, í bili allavega og þar af leiðandi stöðugar horfur hjá flugfélögum.
2. Steinunn Valdís sagði af sér þingmennsku fyrir samspillingarflokkinn.
3. Góðar horfur Besta flokksins í Reykjavík í kosningum á laugardaginn.
4. Nýjar upplýsingar um styrki til Gísla Marteins.
5. Klókindaleg stefna skilastjórnar Glitnis þegar þeir stefndu Glitnisgengi Jóns Ásgeirs í New York og London.
6. Hera komst í úrslitakeppnina í Evrovision.
7. Vikan sem er að líða er án markverðra skammarstrika íslensku ríkisstjórnarinnar fyrir heimsbyggðina ef frá er talið að Bláa lónið týndist einhvers staðar í Kanada eða Svíþjóð og finnst ekki aftur fyrr en eftir 60 ár.

Bandarísk hlutabréf hækka

Sennilega hafa þeir rétt fyrir sér - ýmis rök styðja það.

Það eru mjög sterkar vísbendingar um að Katla gjósi innan 2-3 ára. Sterkasta vísbendingin er sú að Eyjafjallajökull er í gosstöðu núna. Eftir því sem sagan segir okkur er eins líklegt að Katla gjósi á eftir Eyjafjallajökli eins og að nótt komi á eftir degi.

Önnur sterk vísbending um Kötlugos innan tíðar er sú staðreynd að Katla hefur ekki gosið neitt af viti síðan 1918. Það er því kominn tími á hana eins og sagt er m.v. tíðni þekktra Kötlugosa.

Þriðja sterka vísbendingin er það álit íslenskra jarðvísindamanna að nú sé hafið tímabil þar sem búast má við mikilli gosvirkni í eldstöðvum landsins næstu áratugina. Sé þetta rétt mat verða þessi eldgos sem þeir búast við einhvers staðar að finna sér farveg. Það er viðbúið að Katla verði einn farvegurinn.

Að mínu mati eru því allar líkur á að Katla fari að gjósa, kannski ekki í þessari viku eða næsta mánuði, en örugglega innan mjög fárra ára. Þetta er eitthvað sem við ættum frekar að búa okkur undir en að afneita. Það er svo mikið 2007 að þvertaka fyrir að eitthvað neikvætt geti gerst. En þó við höfum talið okkur trú um slíkt í peningamálum sem eru alfarið mannanna verk og sýnt þar fádæma heimsku þá er enn heimskulegra að stinga hausnum í sandinn þegar náttúruöflin eru annars vegar. Þar getur verið beinlínis stórhættulegt að afneita aðsteðjandi hættu þegar menn ættu að undirbúa viðbrögð við henni.

Telja líklegt að Katla gjósi bráðlega

X-Æ Héldu þeir að hann ætlaði að sitja á gólfinu? X-Æ

Auðvitað verður Jón Gnarr að fá borgarstjórastólinn ef hann verður borgarstjóri. Þó þetta sé grínframboð hefur varla nokkur maður búist við að hann ætlaði að sitja á gólfinu í skrifstofunni?

En hann var víst að lýsa því yfir einhvers staðar í kvöld að grínið sé búið hjá honum. Ég veit ekki hvort þetta var sagt í gríni eða hvort heldur hann átti við að grínið væri búið í framboðinu og alvaran að taka við þar eða hvort hann hann væri hættur að starfa sem grínisti og ætlaði að einbeita sér að gríni í pólitík.

En að slepptu öllu gríni þá ítreka ég fyrri bloggfærslur mínar og hvet Reykvíkinga til að kjósa Besta flokkinn á laugardaginn. Það er best fyrir borgina og fólkið í henni. Í versta falli er það svipað og að kjósa hina flokkana. Það er allavega allt að vinna og engu að tapa með X-Æ á laugardaginn.

Jón Gnarr vill stólinn

BESTI flokkurinn verður að ná hreinum meirihluta! Það eru BESTU úrslitin.

Það er bráðnauðsynlegt að Besti flokkurinn fái hreinan meirihluta í Reykjavík. 8 menn er algjört lágmark. Með 6 eða 7 menn verður bara til einhver samsteypustjórn sem ekkert vit verður í og kannski ekki einu sinni Besti flokkurinn með í þeim meirihluta. Þannig fær nýtt framboð alls ekki að njóta sín að fullu nema það fái hreinan meirihluta í kosningunum. Með hreinan meirihluta Besta flokksins verður hægt að taka upp nýtt og skemmtilegra stjórnarfar.

Þeir sem vilja sjá einhverjar breytingar í pólitíkinni verða að vera duglegir að mæta á kjörstaði á laugardaginn og kjósa X-Æ, Besta flokkinn í Borgarstjórn.

Þó sumir telji það vonlaust að kjósa grínframboð og finnist að nú sé tími til kominn að ljúka gríninu þá finnst mér það alls ekki. Ef þetta er í raun grínframboð, hvað gerir það þá til? Þetta er ekkert skemmdarverkaframboð, það er ekki eins og markmiðið sé að rústa borginni komist Besti flokkurinn til valda. Og með þykkt lag af embættismönnum hjá borginni verður heldur engu rústað af óvitaskap. Það eina sem getur gert þetta grín grátt, er ef framboðið er ekkert grín. Því þá gæti það í versta falli farið svo að Besti flokkurinn taki upp starfshætti og siðferði fjórflokkanna. En það er þá ekkert verra en núverandi ástand.

Það er því útilokað að kjósendur fari sér að voða eða tapi á því að kjósa Besta flokkinn. Þeir einu sem geta tapað á góðu gengi Besta flokksins eru hinir flokkarnir og frambjóðendur þeirra. Ef illa tekst til breytir það í versta falli engu frá því sem nú er, en ef vel tekst til gætum við séð nýjar leiðir og ferska vinda í ráðhúsi Reykjavíkur um næstu helgi.

Reykvíkingar hafa nú einstætt tækifæri til að umbylta stjórnmálum í landinu. Nú er hægt að sýna í verki að valdið sé hjá fólkinu, ekki flokkunum. Þið getið sýnt stjórnmálamönnum að þeir verði að sinna sínum störfum af ábyrgð, annars sé þeim skipt út, jafnvel öllum flokkum í einu!! Þið megið alls ekki láta þetta tækifæri fara forgörðum. Ef þið kjósið ekki Besta flokkinn verður árið 2010 ár hins glataða tækifæris í Reykjavík. Látið ekki hræðsluáróður hafa áhrif á ykkur. Nýtið tækifærið sem þið hafið nú til gagngerra breytinga og uppstokkunar. Takið til í Ráðhúsinu!!

Mikið forskot Besta flokksins

Yfirbyggðir hjólastígar Besta lausnin??

Ég hef nokkrum sinnum bloggað um að gera yfirbyggða hjólastíga um höfuðborgarsvæðið. Það er ekki nóg að opna einhverjar leiðir sem eru ófærar hálft árið eða meira vegna veðurs og annarra aðstæðna. Þannig verður hjólamennskan bara góðviðrissport fyrir flesta. Með því að byggja yfir hjólastígana er hægt að gera þetta að gagnlegum samgöngumáta sem nýtist allt árið. Þannig er hægt að spara í bílakaupum og eldsneyti svo um munar fyrir einstaklingana og þjóðfélagið. Umferðarálag minnkar þá sem og viðhald á gatnakerfinu.

Kannski maður ýti betur við þessu eftir kosningar þegar Besti flokkurinn er kominn til valda í borginni. Það væri spennandi að komast að hvaða framtíð þeir sjá í samgöngumálum borgarinnar. Verða yfirbyggðir hjólastígar hluti af Bestu lausninni?

Hljólaleiðir lengdar í Reykjavík

Kjölturakki Jóns Ásgeirs.

Pálmi í Fons virðist skv. þessari frétt og fleirum þar sem fjallað er um viðskipti hans og Jóns Ásgeirs Jóhannessonar, vera eins konar kjölturakki Jóns Ásgeirs sem sá síðarnefndi hefur getað sigað út og suður í alls konar viðskiptum og rétt honum einhverjar sporslur fyrir. Og hann virðist enn hafa einhver bein að naga frá húsbóndanum ennþá, því hann sýnir honum fullkomna hollustu og kjaftar ekki frá neinu sem þeim fór á milli. Nú þarf að taka af honum beinin sem hann nagar og kvelja hann dálítið svo saksóknari geti tamið hann og fengið til að upplýsa hvað hefur eiginlega verið í gangi í þessu samstarfi þeirra Jóns Ásgeirs.

Það er alveg ljóst að í þessum viðskiptafléttum þar sem báðir eiga hlut að máli virðist Jón Ásgeir hafa ráðið ferðinni og sigað hinum út og suður. Sama virðist hafa verið í málinu þar sem Jón Ásgeir fékk milljarð frá Pálma út af Sterlingbraskinu. Það hlýtur því að verða taktík sérstaks saksóknara að rétta Pálma fleiri bein að naga, t.d. bjóða litlar kærur og vægar refsingar gegn greinargóðum upplýsingum um samstarfið við húsbóndann. Kjölturakkinn hlýtur að sjá sína sæng útbreidda nú þegar ýmislegt vafasamt og ólöglegt er að rakna upp og koma í ljós í eltingaleiknum við aflandsfélögin og undanskotin.

En kannski er það sterkasta sem hægt er að tefla fram til að pressa á menn eins og Pálma það ef hægt er að koma í gang sakamálum erlendis, t.d. í Bandaríkjunum, þar sem áratuga fangelsisdómar kunna að liggja við brotum. Það getur verið betra að gjamma í sérstakan saksóknara en að taka áhættuna af málaferlum og saksóknum upp á slík býti. Þannig að nú er alþjóðleikinn í viðskiptafléttunum sem átti að slá ryki í augun á íslensku sveitamönnunum hugsanlega að verða sterkasta vopnið í baráttunni við endurheimt þýfisins og að upplýsa málin. Kýldu á þetta sérstakur saksóknari. Fáðu Bandaríkin og fleiri lönd í lið með þér. Því fleiri kærur á erlendri grund, því meiri sviti hjá þeim sem kærðir eru og þá ætti samstarfsviljinn að aukast.

RÚV: Þriggja milljarða leitað

Múslimskir ofsatrúarmenn í Sviss?

Þegar Kínverjar og Pakistanar vilja hemja tjáningarfrelsið á síðum eins og Google og Facebook og You Tube þá köllum við þá ofsatrúarmenn eða mannréttindabrjóta og frelsissviptandi ritskoðara. Í gær var í fréttum að Pakistönsk stjórnvöld ætli að loka einhverjum vefsíðum. Þetta kölluðu sumir alfrelsisunnendur ofsatrú og öfgar múslimaheimsins.

Ef við erum sjálfum okkur samkvæm þá eru Svisslendingar á leið í þennan ofsatrúarhóp m.v. þessa frétt af löngun yfirvalda þar til afskipta af starfsemi Google. Þó þetta sé í deiglunni í Sviss þá held ég að múslimar séu ekki við stjórnvölinn þar og ekki heldur Kínverjar.

En kannski er hugsun stjórnvalda í Sviss orðin gegnsýrð af múslimskum áhrifum.
Nema málið sé það að það þurfi í raun að hafa einhverjar hömlur á þessum síðum. Kannski eru til fleiri hagsmunir en bara tjáningarfrelsi sem þarf að hyggja að á netinu. Kannski þarf að hafa reglur og takmarkanir svo tjáningarfrelsið eyðileggi ekki einkalífið og ógni ekki öryggishagsmunum. Eins og vel hefur sannast á Íslandi er það augljóst mál að algjört frelsi á einu sviði getur haft ófyrirsjánlegar og slæmar afleiðingar á öðrum sviðum. Ég held ég styðja bara þau stjórnvöld sem vilja setja hóflegar og skynsamlegar reglur sem þessi netfyrirtæki verða að hlýta. Það er skynsamlegra en algjörlega óheft frelsi á þessu sviði.

Vilja koma böndum á Google

Auðvitað á að gera þetta svona.

Það er gaman að bera saman hvernig við Íslendingar annars vegar og Pakistanir hins vegar, fara að því að hafa vit fyrir sínum landsmönnum.

Við Íslendingar setjum alls konar lög sem eiga að banna eitt og annað eða ráða því hvernig gera má hlutina, en svo er okkur alveg sama þó farið sé í kringum allar reglur með blekkingum eins og að leppa allt ólöglegt með erlendum fyrirtækjum sem mega lúta erlendum lögum og reglum. Pakistanarnir hins vegar, þeir loka bara fyrir það sem þeir leyfa ekki, hvort sem ósóminn er leyfður skv. erlendum lögum eða ekki.

Svo erum við að vanda um og kalla þetta ofsatrú hjá Pakistönum og öðrum múslimum. Okkur finnst ofsatrú og þessi kúgun múslimaþjóðanna alveg ferleg mannréttindabrot. Það er miklu betra að sniðganga lög og reglur að okkar hætti og fara þannig fram hjá kúgun og stýringu á hlutunum. Við raunar eigum það meira að segja til að hneykslast á því ef einhver tekur upp á því að draga menn fyrir erlenda dómstóla skv. erlendum lögum vegna afbrota sem auðvelt er að sleppa frá hérlendis, sbr. þegar Glitnir stefndi Jóni í New York um daginn.

Mér finnst þetta bara gott hjá þeim þarna í Pakistan, við þurfum að líta í eigin barm og skoða hvort það er nú ekki hægt að taka þetta til fyrirmyndar að einhverju leiti.

Aðgangur takmarkaður vegna guðlasts

Heiðarleg svör hjá Jóni Gnarr - það er fátítt fyrir kosningar.

Þegar Jón Gnarr er spurður um fyrirætlanir Besta flokksins er í raun fátt um svör. Það þykir mér eðlilegt. Maðurinn og flokkurinn standa ennþá alveg utan við stjórnmálin, í þeim skilningi að hafa engar haldbærar upplýsingar eða innanhúss aðgang að borgarmálefnum þannig að þau geti gefið skýr svör. Og í staðinn fyrir að ljúga upp því sem fjölmiðlar og kjósendur vilja heyra, þá er bara svarað heiðarlega. Það er sjaldgæft í íslenskri pólitík og svoleiðis svör þykja auðvitað ekki merkileg m.v. gamalkunnugar skáldsögur fjórflokksins, svokallaðar kosningastefnuskrár.

Það vekur alltaf athygli mína hve svör Besta flokksins eru stutt og hve svör hinna eru oft löng. Það er eins og þeir sem segja satt séu fljótir að því en þeir sem ljúga að kjósendum eru gjarnir á að rökstyðja lygina vel svo hún verði trúverðug og hafa því svarið langt.

Ég tek eftir því að viðbrögðin við velgengni Besta flokksins í skoðankönnunum eru blendin. Sumir fagna heiðarlegu framboði, vilja kjósa allt annað en fjórflokkinn, eða vilja bara sjá ný andlit í borginni, eru búnir að fá nóg af spillingu og hagsmunatengslum stjórnmálamanna o.s.frv. Þetta eru allt góð og gild rök.

En rök andstæðinga framboðsins eru þó mun athyglisverðari en þeirra sem styðja það. Margir tala um að nú íhugi þeir alvarlega að flytja úr landi nái þetta framboð meirihluta í borginni. Það verður að minna fólk á að vegna núverandi stjórnarhátta í landinu og hjá borginni er fólk nú þegar að flytja úr landi í stórum stíl þannig að fólksflótti verður ekki fundinn upp út af þessu framboði.

Þá er talað um að það verði ekkert grín að hafa grínframboð í meirihluta í borginni nái Besti flokkurinn því fylgi sem kannanir benda til. Það er auðvitað alveg rétt en kostirnir eru ekki góðir. Kjósendur hafa um að velja spillta flokkstitti sem ljúga upp trúverðugum rökum til að láta kjósa sig eða grínista sem nálgast kjósendur af heiðarleika og mæta til kosninga með fátæklega en heiðarlega stefnuskrá. Hvorum skyldi nú verða betur treystandi til að standa sig eftir kosningar, þeim heiðarlegu en óhrjálegu Besta flokksmönnum eða uppdubbuðum spilltum tittum fjórflokksins með glansbæklingana?

Þegar menn rökræða um þetta mál þá má ekki gleyma því að það er á ábyrgð þeirra "skynsömu" manna sem hafa valið "ábyrga" (5)fjórflokkana til valda í borginni undanfarin ár að staða borgarinnar og fyrirtækja hennar er orðin hörmuleg. Það eru engin grínframboð sem valda því. Sama er í landsmálunum, hafa verið einhverjar grínríkisstjórnir á Íslandi? Væri landið verr sett en það er nú ef meira grín en minni alvara og spilling hefði verið í stjórnmálunum og atvinnulífinu? Það er nú alveg ljóst á landsstjórninni að það er engu verið að breyta innan fjórflokksins varðandi það að bæta stjórnarfarið og siðferðið í stjórnmálum. Eina leiðin til þess er því að setja fjórflokkinn út á gaddinn og hleypa nýjum framboðum að.

Ég veit að enginn veit hvernig Besti flokkurinn muni standa sig nái hann völdum í borginni. En m.v. aðra flokka og frambjóðendur verður enginn vandi fyrir þennan flokk að standa undir nafni. Hvort það er nóg er svo annað mál.

Jón Gnarr: „Ég er stoltur“

Vona að þetta gangi eftir - Kannski er nýr Davíð í Jóni Gnarr?

Ég vona svo sannarlega að Besti flokkurinn fái gott fylgi í kosningunum eins og skoðanakannanir benda til. Ég er ekki að vona þetta af ég eigi svo marga vini og kunningja í þeim flokki, eða vegna þess að frambjóðendur flokksins hafi komið með einhverjar snilldarlausnir fyrir gjaldþrota borgarfyrirtæki eða atvinnulausa borgarbúa. Nei, ég er að vona þetta vegna þess að það þarf að setja af þá sem hafa sannað að þeir valda ekki verkefnum sínum hjá borginni. Það eru þeir sem hafa verið þar við völd undanfarin ár. Það þarf að fara í pólitíska tiltekt í borginni.

Það eina sem getur verið meira grín í sveitarstjórnarkosningunum en að grínframboð Besta flokksins nái meirihluta í Reykjavík, er ef gömlu flokkarnir sem eru búnir að gera borgina gjaldþrota, yrðu kosnir áfram til valda í borginni.

Ég man að þegar Davíð Oddson lét af starfi borgarstjóra á sínum tíma voru heildarskuldir borgarinnar og borgarfyrirtækja taldar vera 3-4 milljarðar króna og hafði Davíð þó spanderað í bæði ráðhús og Perlu. Nú eru heildarskuldirnar orðnar um 300 milljarðar króna, nærri 100 sinnum hærri en þegar Davíð lét af starfi borgarstjóra. Þó hefur ekkert verið spanderað í óþarfa eins og Davíð gerði.

Það hefur verið mikil alvara í borgarpólitíkinni undanfarin ár, þessar miklu skuldir eru ekki tilkomnar út af neinu gríni. Þær eru vegna virkjana, risarækjueldis, alls konar fjarskiptatilrauna, skynsamlegrar lánastefnu, uppbyggingar nýrra borgarhverfa, framkvæmda í miðborginni, nýrra höfuðstöðva fyrir OR, útþenslu OR til annarra landshluta og ótal annarra bráðnauðsynlegra verkefna.

Svona uppbyggileg og alvarleg borgarpólitík er alltof dýr, það sanna skuldirnar, sem eru nú ca. fjórum sinnum meiri en tekjur samsteypunnar. Ég tel það alveg augljóst að borgarbúar hafi ekki efni á svona alvarlegri og dýrri borgarpólitík lengur. Nú blasir ekkert við annað en gjaldþrot eða verulegar hækkanir á sköttum og þjónustugjöldum samfara minni þjónustu eigi borgarsamsteypan að vera rekstrarfær áfram.

Það er fullreynt að þessi pólitík sem fjórflokkurinn stendur fyrir er ekki að virka. Og í Reykjavík verður að viðurkenna að enginn borgarstjóri hefur náð tökum á starfi sínu frá því Davíð hætti. Enda hefur hallað samfellt undan fæti hjá borginni og fyrirtækjum hennar síðan hann stóð upp úr stól borgarstjóra.

Núverandi "stjórnmálamenn" hafa komið fram alvarlegir á svip og haft áhyggjur af afleiðingum þess ef þetta grínframboð nái umtalsverðu fylgi. Þeir hafa talað til kjósenda í umvöndunartón út af þessu. Ég verð nú að viðurkenna að ég eygi frekar von fyrir Reykjavíkinga í hinum nýju Bestaflokks frambjóðendum en í þeim gamalreyndu fjórflokka frambjóðendum sem hafa fullsannað getuleysi sitt á undanförnum árum. Því ætti nokkur maður að kjósa þá sem hann veit að geta ekki staðið sig? Og því ætti ekki að gefa þeim tækifæri til að spreyta sig sem hafa ekki gefið neitt tilefni til vantrausts?

Raunar gæti leynst nýr Davíð í Jóni Gnarr. Þeir hafa nú báðir húmor og grínistabakgrunn. Og Davíð tók borgina með trompi á sínum tíma. Jón Gnarr virðist líka vera að því. Davið var að mestu óskrifað blað í pólitík þegar hann var kosinn í borgarstjórn og varð borgarstjóri. Samt stóð hann sig ljómandi vel. Allt þetta sama á við um Jón Gnarr, hingað til.

Áfram Besti flokkur, áfram Reykvíkingar!!

Besti flokkurinn með 8 fulltrúa?

Vísitölurnar ennþá alltof háar - leikritið á enda.

Það er skemmtilegt að fylgjast aðeins með þessum hlutabréfamörkuðum, því þeir eru svo mikið leikrit og glórulausar spekúlasjónir manna sem í örvæntingu sinni eru að reyna að halda áfram að græða á tímum þegar bréfin falla í verði.

En það er einmitt ljóst að hlutabréf eru í alltof háu verði ennþá. Það getur ekkert annað gerst í heiminum en að skuldir ríkja verði ekki greiddar í stórum stíl. Það getur gerst með tvennum hætti, afskriftum, sem þýða skyndilegt tap lánveitenda, eða með óðaverðbólgu sem rýrir skuldirnar fljótt þar til þær verða viðráðanlegar. Hvor leiðin sem farin verður mun verðfella hlutabréfamarkaði gríðarlega, sennilega um allavega 50%. Þó er spurning hvort á að tala um verðfellingu eða leiðréttingu. Leiðrétting er líklega réttara.

Annað í þessu skemmtilega leikriti er hve vel leikendum hefur tekist að sannfæra stjórnmálamenn um mikilvægi leikritsins, að það verði haldið áfram að leika þennan skrípaleik um ókomna daga í óbreyttri mynd. Kannski eru það samtvinnaðir hagsmunir og sameiginlegur leiklistaráhugi stjórnmálamanna og mannanna á hlutabréfamarkaði sem veldur þessu. En staðreyndin er sú að einhvern tíma þarf leiksýningunni að ljúka. Það gerist af sjálfu sér þegar áhorfendur ganga úr salnum og finna sér annað þarfara að gera en að taka mark á þessu bulli og stjórnmálamenn og markaðurinn leika fyrir tómu húsi.

Nú eru einmitt þessir tímar að renna upp. Leikritið er orðið þreytt og bæði í Evrópu og Ameríku er fólk búið að fá nóg. Suðan er að koma upp, fólk vill fá endurgreitt fyrir þessa lélegu leiksýningu. Þegar almenningur í hinum vestræna heimi er meira og minna að verða atvinnulaus og gjaldþrota út af þessum "markaði" og "stjórnmálamönnum" er augljóst að eitthvað mikið mun gerast. Fólk brýst alltaf undan kúgun að lokum. Nú fer það að gerast hvað þessa alþjóðlegu skuldakúgun varðar. Það getur ekki gengið lengur að flestir íbúar flestra þjóða séu orðnir kúgaðir af fjármálamarkaðnum eins og nú er raunin.

Bandarísk hlutabréf lækkuðu mikið

Þingsetarnir vilja feta í fótspor Helga Hóseassonar.

Ég er alveg sammála kirkjunni í þessu máli. Hjónaband hefur alla tíð verið skilgreint skv. kristnum viðhorfum og bakgrunni sem eitthvað sem á bara við um samband karls og konu. Það verður bara að virða það að svona er þetta og samkynhneigðir verða að sætta sig við eitthvað annað heiti á sinni sambúð. Ef hægt er að tala um hjónaband á milli samkynheigðra einstaklinga er alveg eins hægt að hætta að kalla þá samkynhneigða og rétt að kalla þá bara gagnkynhneigða eins og aðra sem ganga í hjónaband.

Það er af sem áður var þegar Helgi Hóseasson háði baráttu sína út af trúmálum og skírn sinni og vildi fá staðfestingu á afskírn sinni í bækur Hagstofunnar. Þá var það ekki hægt því málið var kirkjulegs eðlis og utan valdsviðs hinna veraldlegu yfirvalda. Nú vilja veraldlegu yfirvöldin fara að ráða trúarbrögðunum og segja kirkjunni fyrir um hvað er rétt og rangt í þeim efnum með því að skilgreina hjónabandið á sinn hátt og gefa skít í trúna.

Íslenskir þingsetar virðast því margir vera að feta í fótspor Helga heitins Hóseassonar og vilja taka hann sér til fyrirmyndar í því efni að fara sínu fram gagnvart ríkistrúnni. Það er af sem áður var.

Skiptar skoðanir um ein hjúskaparlög