Hvaða aðstæður hafa breyst í aðgerðaleysinu??

Hvað er Jóhanna að fara með að tala um breyttar aðstæður sem forsendu fyrir viðræðum við AGS um skuldavanda heimilanna? Ég sé ekki að aðstæður þar hafi neitt breyst frá því fyrst var rætt við AGS. Allan þann tíma hafa þessi mál verið látin drasla í algjöru aðgerðaleysi.

Hins vegar hefur kannski verið búin til dálítil sögufölsun á meðan málið draslar. Það er látið sem heimilin séu í skuldavanda þegar í raun er um að ræða okurvanda og mismununarvanda.

Okurvandinn er sá að bönkunum er leyft að okra á skuldurum að vild og af algjöru ábyrgðarleysi, það er ekkert hömluleysi á því hvernig bankarnir fá að hirða af skuldurum þeirra eigið framlag til húsnæðiskaupa t.d. og halda svo áfram að heimta meira og meira eða taka að lokum eignirnar af fólkinu þegar búið er að hirða framlag þess til kaupanna.

Mismununarvandinn er sá að það er mismunandi hvort verðtrygging er í gildi á Íslandi eða ekki. Skuldir eru yfirleitt verðtryggðar, launin aldrei. Þetta er mismununarvandi vegna þess að menn þurfa að nota óverðtryggðu og ótryggu launin til að borga verðtryggðu og veðtryggðu skuldirnar.

Spurningin snýst um að taka upp heilbrigt viðskipta- og stjórnmálasiðferði á Íslandi. Það er skammarlegt af forsætisráðherra að niðurlægja skuldara með því að tala um skuldavanda þeirra þegar búið er að stela af þeim öllu eigin fé þeirra og oft á tíðum afrakstri mikillar vinnu og erfiðis og heimta svo í framhaldinu enn meira eða að menn missi eignir sínar ella. Hún á að tala um og taka á mismunun og vondu viðskiptasiðferði. Hún er í góðri aðstöðu til þess ef hún vill láta gott af sér leiða.

Vill einhver setja reglur um það í stjórnarskrá hve mikið má okra á fólki eða mismuna því með verðtryggðum útgjöldum og óverðtryggðum launum? Komið með hugmyndir á:

www.almannathing.is
www.austurvollur.is/lindal

Rætt við AGS um breyttar aðstæður

Eins með íslensku bankana.

Ég held að íslensku bankarnir hafi ekki heldur tekið hagnað fram yfir öryggi. Þeir sögðu allavega viðskiptavinum sínum fram á síðasta dag að þeir væru öruggir og að innistæðurnar væru öruggar og að það væri örugglega gott að eiga hlutabréf í þeim. Þeir voru ekkert að segja viðskiptavinum að það væri verið að plata þá í hagnaðarskyni. Svo fóru þeir örugglega á hausinn öruggir um að skattgreiðendur myndu taka skellinn en ekki eigendur og stjórnendur bankanna.

Þannig tóku þeir öryggi fram yfir hagnað þegar þeir voru búnir að greiða sér út hagnaðinn.

Tóku ekki hagnað fram yfir öryggi

Ísland í neðsta sæti, í samræmi við árangur í efnahagsmálum.

Er það tilviljun að Íslendingar verma botnsætið í Eystrasaltskeppni í stærðfræði?
Er það tilviljun að þjóðin sem hýsir banka og fjármálakerfi sem hrundi eins og spilaborg 2008 er sú lélegasta í stærðfræði í þessari keppni.

Maður veltir nú fyrir sér hvort ekki er samhengi þarna á milli. Ég er reyndar fullviss um að svo er því ég sé ríkisstjórnina og ýmsa fræðmenn reyna að reikna okkur út úr kreppunni með alls konar dæmum sem geta ekki gengið upp. Sömu menn eru líka að reikna heimilin út úr sínum vanda með því að láta þau borga meira en þau afla, hvernig sem fara á að því.

Það er enginn vafi á því að útreikningar okkar helstu sérfræðinga, ráðamanna og viðskiptajöfra fyrir og eftir kreppu hafa engan veginn staðist.

Eigum við að setja einhverja stefnu um menntun þjóðarinnar í stjórnarskrá?
Ef þið hafið tillögur um slíkt eru þær vel þegnar.
www.austurvollur.is
www.almannathing.is

Eystrasaltskeppninni í stærðfræði lokið

Jón er stórskrýtinn, samt er stundum glæta í honum.

Það verður að viðurkennast að annar eins borgarstjóri og Jón Gnarr hefur ekki sést í Reykjavík áður. Hann virðist yfirleitt ekki mjög upptekinn af borgarmálum, frekar ýmsum perónulegum pælingum og því hvernig hann á að haga sér sem borgarstjóri.

En það er samt tiltölulega mikil ró yfir borgarmálunum miðað við það sem oft hefur verið. Meira að segja eftir uppsagnirnar á OR hefur lítið gengið á í borgarstjórn. Hann virðist því hafa einhver róandi áhrif á borgarpólitíkina.

Og þó Jón Gnarr sé alls ekki að eyða miklu púðri í borgarmálin þá koma stundum ljósir punktar frá honum, eins og það að loka skíðasvæðinu í Bláfjöllum. Það er annað skíðasvæði sem borgin rekur í Skálafelli og í sjálfu sér ætti að vera nóg að reka eitt skíðasvæði fyrir Reykvíkinga þessa fáu daga eða vikur sem hægt er að renna sér á skíðum.

En vegna þess hve Jón Gnarr er sérstakur vaknar spurning um það hvort við ættum að setja í stjórnarskrá einhverjar sérstakar kröfur til Borgarstjóra, rétt eins og forseta. Er í lagi að menn eins og Jón Gnarr geti verið borgarstjóri eða er það ekki í lagi?

Þeir sem vilja koma með hugmyndir um þetta fyrir stjórnlagaþing mega senda þær inn á:
almannathing.is
austurvollur.is

Geimvera í íslenskum stjórnmálum

Hin endanlega lausn á öllum vandamálum innan seilingar?

Ég er aðallega feginn að þessi miklihvellur var svo lítill að hann sprengdi ekki jörðina í tætlur eða skapaði nýjan heim. Miklhvellurinn sem menn telja sig hafa verið að líkja eftir er talinn hafa skapað alheiminn eins og hann er þekktur í dag, hvað sem menn hafa nú fyrir sér í því annað en fræðilegar kenningar.

Þetta er því alls enginn miklihvellur, hvernig sem á málið er litið, hvorki minniháttar né annarskonar. En kannski væri hægt að kalla þetta einhverskonar plathvell, sem betur fer var þetta nú ekki meira en það.

Það er hins vegar umhugsunarefni hvort vísindin þróast nú svo hratt framávið að menn geti hugsanlega bráðum búið til alvöru miklahvell. Þá þarf í raun ekki að hafa neinar áhyggjur af offjölgun mannkyns eða gróðurhúsaáhrifum eða neinu öðru. Þegar allt er komið í tómt klúður er bara hægt að gera annan miklahvell og búa til nýjan heim, rétt eins og að endurræsa tölvuna þegar hún virkar ekki almennilega lengur. Kannski verður nýr manngerður miklihvellur endanleg lausn mannkynsins á öllum okkar mistökum hingað til.

Eigum við að setja í stjórnarskrá Íslands eitthvað um afstöðu okkar til vísindastarfs af þessu tagi?
Komið með tillögur á:
almannathing.is
austurvollur.is

Minniháttar miklihvellur

Það réði enginn neinu, það gerði enginn neitt, gerum þessi stjórnlausu fyrirtæki upptæk!!!

Útrásarvíkingar segjast allir vera saklausir. Þeir réðu engu sem skipti máli, þeir höfðu engin áhrif, þeir töluðu ekki við bankastjórana um eitt eða neitt, stjórnuðu ekki fyrirtækjunum sem er verið að skoða, þeir eru bara allir fórnarlömb eins og aðrir Íslendingar. Sumir bókstaflega halda þessu fram, aðrir gefa það í skyn.

Úr því þessir menn segjast vera saklaus fórnarlömb sem ekki áttu eða stjórnuðu neinum fyrirtækjum sem ollu þjóðinni tjóni þegar allt fór á hausinn, er þá ekki rétt að setja í stjórnarskrána ákvæði um að ríkið megi gera upptæk svona stjórnlaus fyrirtæki? Það vantar peninga í ríkiskassann vegna skulda sem enginn viðurkennir að bera ábyrgð á. Gerum upptæk fyrirtækin sem virðast hafa verið stjórnlaus og notum andvirði þeirra til að greiða þessar skuldir. Komum um leið einhverri stjórnun á þessi fyrirtækisreköld og leysum útrásargengið undan byrðinni af að tengjast þessum fyrirtækjum sem þeir segjast ekki hafa stjórnað eða haft nokkur áhrif á.

Nánari tillögur um þetta óskast sendar inn á:
almannathing.is
austurvollur.is

Vísar túlkun Glitnis á bug

Best fyrir þá að vera áfram á Íslandi.

Það er lang best fyrir þessa útrásarkappa að búa áfram á Íslandi. Hér munu stjórnvöld aldrei hrófla við þeim, það kostar svo lítið að fá frið hérna. En að vera að flýja fram og til baka um Evrópu endar bara með því að menn verða taugaveiklaðir og fara í steininn í einhverju af þessum löndum.

Er hægt að setja í stjórnarskrá einhverjar reglur til að koma böndum á menn sem setja heila þjóð á hausinn?
Tillögur um slíkt má senda inn á:
austurvollur.is
almannathing.is

Pálmi fluttur til Lúxemborgar

Loksins tók sveitarstjórnin eftir þessu.

Það er nú búið að vera í nokkra mánuði í umræðunni að sameina háskólana á Bifröst og í Reykjavík. En nú loksins virðist sveitarstjórnin vera að taka eftir þessum umræðum og áttar sig á að sveitarfélagið þarf líklega að bera verulegan kostnað af þessari sameiningu ef af henni verður.

Vonandi tekst sveitarstjórninni að finna betri lausn, enda varla til betur skólað sveitarfélag en Borgarbyggð með leikskóla, grunnskóla, menntaskóla og nokkra háskóla og eina helstu vöggu íslenskrar menningarsögu í Reykholti.

Í þessu sveitarfélagi hefur atvinnulífið sem sagt að verulegu leyti þróast í kringum menntun og hagræðing eða samdráttur í einni menntastofnun mun augljóslega bitna á öðrum, þannig að fyrir sveitarfélagið og atvinnulífið er þetta mjög viðkæmt mál.

Ég tel að skásta lausnin felist í að leita nýrra tækifæra til að nýta menntakerfi Borgarfjarðar, sbr. bloggfærslu hjá mér fyrr í dag. Þar ætti sveitarfélagið að taka höndum saman með skólunum um að reyna að efla þá í stað þess að skera þá niður. Það er fullt af fróðleiksfúsu fólki um allan heim sem gæti haft áhuga á að læra um jökla, jarðfræði, jeppabreytingar, veðurfræði, eldfjöll, fornsögur o.m.fl. Í Borgarfirði má læra þetta allt saman í miklu návígi við námsefnin.

Hugnast betur sameining innan Borgarfjarðar

Annað verra en að ímyndin sé í molum.

Það sem er enn verra en að ímyndin sé í molum er að stjórnarfarið, efnhagslífið, atvinnumálin er allt í molum. Spillingin er orðin augljós, vanhæfni stjórnvalda, undirlægjuháttur við glæpagengi. Mótspyrnuleysi við yfirgangi alþjóðastofnana. Þetta er Ísland í dag.

Ímynd Íslands í molum

Bara ein leið út úr kreppu - að nýta tækifærin sem felast í henni.

Það er bara ein leið út úr kreppu.
Hún er ekki sú að skrifa undir fullt af skuldabréfum frá IMF.
Hún er ekki sú að endurreisa gjaldþrota banka.
Hún er ekki sú að halda áfram að bugta sig fyrir gömlum glæpamönnum.
Hún er ekki sú að setja þjóðina á atvinnuleysisbætur.
Hún er ekki sú að láta lántakendur borga margfalt til baka það sem þeir fengu að láni.
Hún er ekki sú að skera niður fjárlögin.

Eina leiðin út úr kreppu er að búa til verðmæti. Fjölga störfum sem skila þjóðarbúinu raunverulegum tekjum. Að nýta tækifærin sem felast í kreppunni. Þetta er eina leiðin.

Í staðinn fyrir að skera niður og hagræða í heilbrigðiskerfinu á að markaðssetja vannýttar einingar þess. Flytja inn sjúklinga í lýtaaðgerðir, tannlækningar, augnaðgerðir, liðskiptaaðgerðir, psoriasis, sækja á hagkvæma markaði nær og fjær.

Í staðinn fyrir að skera niður í menntakerfinu á að nýta fólk og aðstöðu til að kenna útlendingum meira um hafið, orkuna, eldfjöll, jarðfræði, veður, jeppabreytingar o.s.frv á háskólastigi. Nýta allt það sem Íslendingar kunna eitthvað í til að sækja á erlenda markaði.

Í staðinn fyrir að skera niður í útgjöldum til landbúnaðar á að efla lífræna framleiðslu, kornrækt, eldsneytisframleiðslu, ferðaþjónustu o.s.frv. sem sparar gjaldeyri og skapar tekjur og störf.

Í staðinn fyrir að hamast við að styrkja krónuna á að nota þann styrk sem flest í veiku gengi til að efla framleiðslugreinar í ýmsum iðnaði, járnsmíði, trésmíði, hugbúnaði o.fl. til að skapa þar störf og verðmæta framleiðslu til bæði innanlandsnota og útflutnings.

Í kreppunni felst fullt af tækifærum. Við þurfum ríkisstjórn sem nýtir tækifærin í stað þess að draga landið niður í aumingjaskap og enn meiri spillingu.

Tekist á um atvinnumál í Silfri Egils

Íslendingar á flótta undan ríkisstjórninni hafna ESB.

Þessi óláns ríkisstjórn sem við höfum virðist láta reka á reiðanum, láta hlutina drasla hér heima fyrir í von um að ESB muni hreinsa upp eftir hana síðar meir þegar búið verður að troða Íslendingum inn í ESB.

Það er aumt að stjórnvöld, sem Íslendingar hafa kosið til að hugsa um hag landsins og landsmanna, skuli einbeita sér að því að koma landinu inn í fallandi efnahagsstórveldi eins og ESB. Á meðan versnar ástandið hér heima, fólk missir atvinnu og eignir og flýr land. Það er hlálegt að vinsælast er að flýja til lands sem stendur utan ESB og er ekkert á leið í þá blokk, Noregs.

Það er raunar merkilegt að skoða tölur Hagstofunnar um búferlaflutninga Íslendinga frá landinu síðustu árin fyrir kreppu og fyrsta heila árið í henni.

Allur flótti Íslendinga frá landinu er í raun til Noregs. Á sama tíma hefur dregið úr fólksflutningum til Danmerkur en aukist tilsvarandi til Svíþjóðar. Athygli vekur að íslenskir flóttamenn virðast hafa meiri áhuga á t.d. Bretlandi, þar sem ekki er ennþá komin Evra og Þýskalandi sem tvímælalaust er lang sterkasta ESB landið heldur en öðrum ESB löndum. Hin löndin fá í raun falleinkun hjá íslenskum flóttamönnum sem og ESB í heild þegar það er borið saman við Noreg.

Hér eru tölur sóttar á vef Hagstofunnar um brottflutning íslenskra ríkisborgara til nokkurra landa á árunum 2006 til 2009. Þetta eru þau lönd sem 100 Íslendingar eða fleiri hafa flutt til eitthvert þessara ára.

Bandaríkin
2006 208
2007 330
2008 219
2009 208

Bretland
2006 161
2007 170
2008 202
2009 217

Danmörk
2006 1.518
2007 1.681
2008 1.528
2009 1.427

Noregur
2006 225
2007 269
2008 278
2009 1.486

Svíþjóð
2006 383
2007 363
2008 452
2009 633

Þýskaland
2006 66
2007 59
2008 62
2009 131

Slóð á vef hagstofunnar er hér:
http://hagstofa.is/Hagtolur/Mannfjoldi/Buferlaflutningar

Meinum ekkert með þessu

Þarf þá að rífa blokkirnar á Bifröst og stækka bílastæðin við HR?

Verða þessir skólar sameinaðir eða ekki, það er spurningin. Og hún er borin upp vegna þess að þá vantar báða peninga í reksturinn. Þannig á að finna hagkvæmni og spara einhver útgjöld með sameiningu skólanna.

En ef meginkennslan úr báðum flyst inn í HR og einungis verða stutt námskeið á Bifröst þá er augljóst að það verður að stækka bílastæðin við HR verulega, því þau duga skólanum naumlega eins og nú er, þó nýbyggð séu og með allra stærstu bílastæðum landsins. Að sama skapi verður sjálfsagt ódýrast fyrir sameinaðan skóla að rífa nýlegar blokkir á Bifröst svo ekki þurfa að greiða rekstur á þeim áfram. Sennilega mun það spara stórfé að rífa blokkirnar jafnvel þó haldið verði áfram að borga af þeim lánin vegna byggingar þeirra. Svo verður hægt að loka leikskóla, skera niður grunnskóla o.fl. í Borgarfirði.

Annað kyndugt er að nemendur á Bifröst nota einkabíla líklega mun minna en þeir sem stunda nám í HR. Á Bifröst búa flestir á skólasvæðinu og labba í skólann. Á höfuðborgarsvæðinu búa flestir þeir sem nema við HR og keyra sinn bíl í skólann og heim aftur að kvöldi.

Þannig að helstu áhrif þess að sameina skólana verða líklega þessi:
- Meiri fjárfesting í bílastæðum og meiri umferð og mengun í Reykjavík.
- Óþarfar blokkir sem borgar sig að rífa á Bifröst.
- Betri nýting á nýbyggingu HR sem stendur að hluta ónotuð vegna peningaleysis.
- Samlegðaráhrifasparnaður í yfirstjórn skólanna.
- Efnahagskreppa í Borgarfirði.
- Þyngri umferð í Reykjavík.

Og þá er lokaspurningin bara sú hvort opinberir aðilar þurfa að bera kostnað af bílastæðum, umferðaraukningu, atvinnumissi og öðru tjóni vegna hagræðingarinnar. Og verður þá einhver hagræðing þegar upp er staðið?
Það verður fróðlegt að fylgjast með þessu.

Ósammála áformum um sameiningu

Hagar hagkerfið sér eftir markaðslögmálum eða því sem seðlabankastjórinn fyrirskipar?

Er hægt að setja fúlgur fjár inn í Bandaríska hagkerfið án þess að það valdi verðbólgu? Hingað til hefur því verið haldið fram af hagfræðingum að það sé eins öruggt og að sólin komi upp að morgni dags að aukið peningamagn í umferð valdi verðbólgu.

En nú telur seðlabankastjóri Bandaríkjanna að svo þurfi ekki að vera, vel sé hægt að auka peningamagnið án þess að það valdi verðbólgu. Þar sem lítið hefur gengið að ráða við verðbólgu á Íslandi áratugum saman væri það þarft verk að íslensk stjórnvöld og fjármálamenn færu á námskeið hjá seðlabankastjóra Bandaríkjanna til að læra hvernig hægt er að láta peninga flæða um hagkerfið án þess að tveggja stafa verðbólgutala fylgi með.

Kannski hefur bandaríski seðlabankastjórinn rétt fyrir sér, eða rangt, það kemur væntanlega í ljós bráðum. En bara það að hann telji þetta hægt fær mann til að velta því fyrir sér af hverju svona mikil verðbólga er á Íslandi. Er raunverulegur vilji hjá íslenskum stjórnvöldum og fjármálakerfinu til að halda niðri verðbólgu eða er kannski hagstætt fyrir einhverja að verðbólgan sé alltaf mikil?

Eru ekki að búa til verðbólgu

Það er líka fylgst með hér.

Bandaríkjamenn fylgjast líka með Íslendingum. Það er engin spurning um það, það er bara eftir að upplýsa með hverjum er fylgst og hvers vegna. Össur utanríkisráðherra ætti nú að drífa í að upplýsa þetta svo hann virki ekki eins og hann þurfi eitthvað að fela í málinu. Það er nú hans deild, utanríkismálin, og hvað annarra landa sendiráð hafast hér að. Á fætur nú Össur og segðu okkur hvaða Íslendinga Bandaríkjamenn eru að njósna um hér!!

Bandaríkjamenn einnig með eftirlit í Svíþjóð

Hvernig við knýjum yfirvöld til að virða stjórnarskrá.

Eitt af því sem ég vil breyta í stjórnarskránni, komist ég á stjórnlagaþing, er að setja í hana refsiákvæði við því að brjóta hana.
Því hefur verið haldið fram af málsmetandi mönnum að núverandi stjórnarskrá landsins sé nokkuð góð, aðeins þurfi að fara eftir henni. Og þá hef ég velt því fyrir mér af hverju ekki er farið eftir stjórnarskránni. Þegar hún er lesin þá er auðvelt að skilja að ekki sé farið eftir henni, það eru engin ákvæði í henni um hvað skuli gera við þá sem fara ekki eftir stjórnarskránni, brjóta þau lög. Við vitum öll að lítið er farið eftir lögum sem engar refsingar eru við brotum á. Hver hefði áhyggjur af að brjóta umferðarlögin ef engar sektir væru við því?

Stjórnarskráin er sérstök að því leyti að hún er fyrst og fremst lög fyrir löggjafann og stjórnvöld að fara eftir. Það er ekki stór hópur manna sem þarf að kunna þess lög til að fara eftir þeim, samt hefur það gengið brösulega eða allavega oft orkað tvímælis hvort farið sé eftir henni.

Ég vil því setja refsiákvæði í stjórnarskrána, burtséð frá innihaldi hennar að öðru leyti, til að tryggja það að á hverjum tíma sé farið eftir stjórnarskránni eins og hún er.

Þessi ákvæði gætu t.d. verið.

- Ævilangt bann við þingmennsku og opinberum störfum fyrir þá sem brjóta stjórnarskrána.
- Fangelsisvist eða fjársektir.
- Lög og ákvarðanir sem standast ekki stjórnarskrá sjálfkrafa ógilt þegar dómur hefur fallið um brot á stjórnarskrá.

Til að framfylgja stjórnarskránni þarf að vera auðvelt að kæra meint brot og skilvirkur dómstóll til að fjalla um þau. Ákvæði um slíkt þarf að setja í stjórnarskrána.

Fyrr en þessar breytingar verða gerðar á stjórnarskrá landsins verður hún hálf marklaust plagg, því það verður aðallega undir samvisku eða samviskuleysi stjórnmálamanna komið hvort farið er eftir henni á hverjum tíma eða ekki.

Góður andi á Þjóðfundinum