Íslensk stjórnvöld að tapa tækifæri til friðsamlegra lausna.

Það kann að virðast sem breytingarnar í Túnis og Egyptalandi séu í okkar augum einungis uppreisn og róstur í fjarlægum löndum sem komi Íslendingum lítið við.

En nú ber svo við að undirrótin að þessum upphlaupum er pólitísk spilling og græðgi sem hefur kostað almenning atvinnu og örbirgð. Fólk er búið að tapa öllu og berst við að þrauka dag frá degi. Nú hafa svo margir í Egyptalandi og Túnis tapað svo miklu að upp úr hefur soðið. Æ oftar er minnt á að fátt hemur þann sem hefur engu meiru að tapa og að nú fjölgar slíkum hratt á Íslandi. Hættan á ofbeldi vegna úrræðaleysis stjórnvalda er því miður hratt vaxandi hér núna.

Þessar byltingar í norður Afríku eru okkur því þörf áminning um hvert stefnir á Íslandi. Hér stefnir nefnilega allt í sömu átt og í þessum löndum. Almenningur er reiður, það sýður og kraumar í fólki. Endalaus spillingar og þjófnaðarbylgja sem gengur yfir landið fyrir tilstuðlan stjórnmálamanna og fjármálastofnana getur ekki leitt til annars en norður afrískra aðgerða á Íslandi áður en langt um líður.

Það er þó enn tækifæri fyrir stjórnvöld að komast hjá þessu. Þjóðin hefur í 2 ár gefið stjórnvöldum tækifæri til að mæta eðlilegum kröfum almennings og til að láta þá bera hrunið sem stofnuðu til þess. Fólk er enn hófstillt í mótmælum og hagar sér eins og stjórnvöld fara fram á. Mótmælir að mestu þannig að það trufli engan! Vandinn er hins vegar sá að stjórnvöld eru ekki að nýta þessa þægð mótmælenda til að leysa hlutina. Það er eins og stjórnvöld bíði beinlínis eftir ófriði. Að farið verði að berja stjórnmálamenn eða taka þannig á þeim að þeir flýi land. Ég átta mig ekki á því hvort stjórnmálamenn landsins eru svo heimskir að þeir skilji þetta ekki eða hvort þeir eru svo spilltir að þeir ætli að sjá hvað þeir komast langt og hlaupa svo burt frá öllu saman þegar upp úr sýður.

En ef einhverjir heiðarlegir og skynsamir stjórnmálmenn eru enn til í landinu skora ég á þá að fara nú að leysa úr málunum af viti og koma viti fyrir hina, svo ekki hljótist illt af aumingjaskapnum sem sýndur hefur verið hingað til. Það væri leitt ef einhver illa hlunnfarinn frumbyggi þessa lands yrði sá ógæfumaður fyrir atbeina stjórnvalda að þurfa að fara að beita valdi til að vísa stjórnvöldum veginn í gerðum sínum eins og nú gerist á hverjum degi í norður Afríku.

Í guðanna bænum sýnið nú smá þroska landsfeður góðir og takið á vandanum áður en upp úr sýður. Það þarf að stöðva hér rányrkju bankanna og ríkisins á almenningi og leiðrétta það sem hefur verið oftekið, það vantar störf, það þarf að endurheimta það sem var stolið hér fyrir hrun. Það þarf að taka úr umferð glæpamennina sem stóðu fyrir þeim þjófnaði sem olli hruninu. Það þarf að taka í notkun þessa gegnsæju stjórnsýslu sem alltaf er verið að tala um. Það þarf að stoppa spillinguna sem alls staðar grasserar. Það þarf að breyta þjóðfélaginu svo fólk þurfi ekki að sæta endalausum árásum á fjárhag sinn og verjast svindli stórfyrirtækja alla daga. Það er varla orðið hægt að þrífast í þessu þjóðfélaqi nema hafa í vinnu lögfræðingaskara til að verjast alls kyns yfirgangi. Þetta er ekki heilbrigt og getur ekki gengið endalaust. Það þarf að vinna nýja stjórnarskrá sem tryggir að fólk sé frjálst hér en ekki nútíma þrælar alþjóðahyggju og stórglæpamanna. Vinnið nú vinnuna ykkar og lagið til. Það hafið fengið 2 ár sem hafa verið illa nýtt hingað til. Takið nú til hendinni áður en fólk tekur upp afrísku leiðina til umbóta.

Herinn mun ekki beita valdi

Höldum upp á afmælið með skrúðgöngu!!

Við skulum halda upp á afmæli ríkisstjórnarinnar um mánaðarmótin með skrúðgöngu. Það er vel við hæfi að við hyllum ástæla leiðtoga vora á viðeigandi hátt og þökkum þeim fyrir 2 frábær ár með þvi að fjölmenna í skrúðgöngu milli Alþingishússins og Stjórnarráðsins. Við skulum þramma þrjár ferðir fram og til baka og hrópa húrra allan tímann.

Ég legg til að þetta verði gert 1. feb. kl. 14.00 og byrjað við Alþingishúsið.

Látið mig vita um undirtektir. Ég skal leiða gönguna. Meðhjálparar að þessu framtaki vel þegnir.

Auglýsið þetta á Facebook og Twitter. Lágmarksmæting er 10 manns og aðgangur ókeypis!!

Stjórn Jóhönnu að verða tveggja ára

Ólafur búinn að setja í 2007 gírinn aftur, hann er vitlausari en mig grunaði.

Það er pirrandi að lesa nú um bullið í Ólafi Ragnari þar sem hann er nú staddur í Davos í Sviss á fundi helstu fjármálaafla heimsins.

Nú heldur hann því fram að Ísland sé komið á beinu brautina og bjartir tímar framundan. Hann er barnalegur og einfaldur ef hann trúir þessu bulli. En svikull og undirförull ef hann heldur þessu fram vitandi það að hér er allt á hraðri niðurleið ennþá og að bankarnir stefna í annað þrot innan fárra ára þrátt fyrir að pönkast á almenningi sem aldrei fyrr. Ólafur virðist ekki sjá eða skilja að hér er flest á niðurleið ennþá og áratuga þrautaganga framundan við að rétta úr kútnum, ef það hefst þá nokkurn tíma. Þetta kallar hann bjarta framtíð.

Ólafur virðist lítið fylgjast með á ráðstefnunni. Hann talar alla vega ekkert um það sem aðrir taka eftir að stjórnmálamenn og bankamenn á ráðstefnunni skiptast í andstæðar fylkingar. Bankamenn þykjast hafa lagað til í sínum ranni á meðan stjórnmálmenn eru enn ævareiðir yfir því að vera endalaust að borga fyrir þá án þess að sjá nokkrar breytingar til batnaðar í fjármálakerfinu.  Þá liggur fyrir í skýrslu sem aðstandendur ráðstefnunnar hafa látið gera að á árinu 2011 er mikil hætta á hækkandi eldsneytisverði, pólitískum óróa og mistökum, vandamálum vegna gróðurhúsaáhrifa, misskiptingu auðs, nýrri fjármálakreppu o.s.frv.

Á sama tíma eru fjármálaöflin að hóta því að verðfella skuldir Bandríkjanna og Japans (hækka þær sem sagt) með ófyrirsjáanlegum afleiðingum fari stjórnvöld ekki í það að laga fjárlagahallann. Það er sem sagt alveg ljóst að stjórnmálamenn ráða engu í dag. Þeir eru bara strengjabrúður sem fjármálaöflin hafa keypt sér. Enda er það svo að Bandaríkjadalur er gjaldmiðill í einkaeigu fjármálaaflanna. Það er ekki Bandaríkjastjórn sem stýrir þeim gjaldmiðli né prentar hann. Það er hlálegt að flest ríki heimsins skuli vera búin að einkavæða gjaldmiðla sína, gefa vexti frjálsa og leyfa fjármálamarkaðinum að búa til eins mikla peninga og hann vill og getur. Samt kvartar fjármálamarkaðurinn og er með hótanir sé ekki gert meira. Nú á að pressa öll ríki heimsins til að auka skatta og kreista meira fé út úr þegnunum til að færa fjármálaöflunum í gegn um afborganir og vexti af skuldum sem er búnar til úr engu. Á sama tíma er með heimsmarkaðsbraski með matvörur og aðrar lífsnauðsynar verið að soga fé í auknum mæli frá almenningi allra landa.

Nú er mikil ólga í norður Afríku. Bandaríkjamenn óttast nú að missa sinn helsta bandamann í þeim heimshluta, Egypta, í hendur stjórnar sem verði Bandaríkjunum andsnúin. Það er kaldhæðnislegt að þessi bylting eða órói í Egyptalandi er drifinn áfram í gegn um bandaríska tækni, Twitter og Facebook!

Á Íslandi hefur ekkert breyst frá hruni annað en að almenningur er atvinnulaus og skattpíndur. Bankarnir hamast á fólki og fyrirtækjum sem aldrei fyrr. Stórglæpamenn ganga lausir og stunda sína starfsemi áfram í ágætum friði og græða á tá og fingri með því að búa til félög sem gera ekki neitt! Sérstakur saksóknari er að vísu farinn að tala við suma þeirra en ennþá hafa þær viðræður engu skilað sem skiptir máli. Þó ég hafi stundum pönkast á sérstökum saksóknara hér á blogginu ætla ég ekki alveg að afskrifa að hann muni að lokum koma að gagni. En mikið óskaplega er þreytandi að bíða og bíða og bíða eftir að eitthvað komi út úr þessari vinnu hans.

Ríkisstjórnin klúðraði lagasetningunni fyrir stjórnlagaþingið þannig að það er búið spil í bili. Það var hlálegt að Hæstiréttur skyldi ógilda það eftir að fjórflokknum hafði tekist svo vel upp við að koma sínu fólki inn á þetta þing. Það voru ekki margir kosnir þar inn sem voru líklegir til að vinna fyrir almenning í landinu. Frekar virtust menn líklegir til að standa vörð um sína flokka enda margir kjörnir fulltrúar með vel litað og sterkt bakland í fjórflokknum. Að því leytinu gerði það kannski ekki svo mikið til þó Hæstiréttur flautaði þetta þing af. Það hefði sjálfsagt aldrei lagt til neinar breytingar sem máli skiptu hvort eð er miðað við bakgrunn margra fulltrúanna.

Á Íslandi er því allt í rugli og vitleysu í stjórnmálunum, fjármálakerfið stefnir í annað hrun og enn meira tjón en orðið er. Fjármálakerfi heimsins er þar að auki ein risastór svikamylla sem stefnir á að valta yfir heimsbyggðina alla og soga til sín allt fé í heiminum eins og svarthol. Þetta fjármálakerfi er nútíma þrælahald þar sem 99,8% jarðarbúa eiga að þræla fyrir 0,2% jarðarbúa. Að forseti Íslands skuli vera svona kokhraustur núna sýnir bara að hann er ferlega vitlaus. Ég viðurkenni að hann hitti á að gera rétt þegar hann vísaði Icesave til þjóðaratkvæðagreiðslu. En það var greinilega bara tilviljun að hann hitti þar á að gera rétt einu sinni. Allar hinar vitleysurnar á forsetaferlinum sanna það að þetta var bara "once in a lifetime happening" hjá honum.

Nú er Ólafur kominn aftur í 2007 gír og virðist halda að Ísland sé frábært fordæmi fyrir heimsbyggðina og eys úr sér þessu bulli þarna í Davos. Það er út af svona mönnum sem heimurinn er í þeirri stöðu sem hann er núna. Bullukollum og strengjabrúðum sem láta stöðugt plata sig og hafa að fíflum. Þegar menn eru kosnir til að gegna virðulegu embætti fyrir þjóð sína eiga þeir ekki að leyfa sér svona vitleysisgang og bull.

Efnahagsbatinn fram úr væntingum manna

Stjórnin lætur sig dreyma um ESB á meðan kommúnisminn sligar Ísland.

Það er ekkert slakað á vinnunni við að koma Íslandi inn í Evrópukommúnista ríkið ESB. Ríkisstjórnin lætur sér fátt um finnast þó íslenski kommúnisminn sé að gera út af við efnahagslífið og vill engu breyta nema fá enn meiri kommúnisma. Hér blómstrar spillinginn sem aldrei fyrr í skjóli ríkisstjórnarinnar. Það er ekki nóg með að markaðsvæddur kommúnismi hafi tröllriðið landinu til andskotans frá síðustu aldamótum undir stjórn hægri og miðjuflokka, heldur hafa vinstri flokkarnir á Íslandi ákveðið að breyta engu og gera ekkert sem máli skiptir. Þess vegna blómstrar þessi kommúnismi enn. Þess vegna getur Pálmi í Fons haldið áfram að byggja spilaborgir og græða hundruð milljóna á ári á að gera ekki neitt.

Ég tala um markaðsvæddan kommúnisma hér vegna þess að markaðskerfið býr við gott almannatryggingakerfi. Hér er öllum verstu fyrirtækjunum og rekstrarmönnunum bjargað. Þeir sem eru svo aumir að fara á hausinn í tuga og hundraða milljarða gjaldþrotum fá það vel bætt frá ríkissjóði og öðrum sem hér ráða einhverju, lífeyrissjóðum t.d. Hér er gefinn skítur í almenning. Hér er búið að taka það sem átti að vera jákvætt í kommúnismanum og nota það til að bjarga glæpafyrirtækjum sem fóru á hausinn. Nú er búið að koma þeim á forsjá almennings. Á sama tíma er dregið úr samhjálpinni til almennings. Svo er búið að hækka skatta til að ná fé af almenningi til að koma í svikamyllur bankanna og annarra gjaldþrota stórfyrirtækja sem stjórnvöld hafa ákveðið að styðja.

Með afstöðu sinni eru stjórnvöld að taka afstöðu með svindli og svínaríi og taka um leið afstöðu á móti skynsamlegum rekstri og lögmálum markaðarins. Í dag geta engin vel rekin fyrirtæki þrifist á Íslandi því stjórnvöld og glæpafélögin sem eru kölluð bankar drepa alla samkeppni með niðurgreiddum rekstri gjaldþrota fyrirtækja sem undirbjóða alla samkeppni með skattfé sem ríkisstjórnin hefur stolið handa þessum aðilum. Til viðbótar eru bankarnir að stela peningum af sumum til að láta aðra hafa í handónýtan rekstur.

Eins og allir vita þá töpuðu glæpamennirnir í gömlu bönkunum, sem nú starfa margir í nýju bönkunum, nánast öllu hlutafé og sparifé Íslendinga. Ekki nóg með það heldur voru enn fleiri útlendingar sem töpuðu fé á þessum svikamyllum. Íslendingum var komið til "bjargar" með því að alþingi setti neyðarlög sem tryggðu almennar bankainnistæður að fullu. Þannig tókst að koma því tapi yfir á almenning. Það eina sem hefði fengist upp í þetta annars var smávegis úr innistæðutryggingasjóði. Hann átti víst að standa í 80-90 milljörðum en svindlararnir sem rændu landið höfðu svikist um að borga slatta af iðgjöldunum þannig að sjóðurinn tapaðist í raun að einhverju leyti þannig. Restin af honum var víst geymd í Seðlabankanum en hann varð í raun gjaldþrota vegna björgunaraðgerða í þágu svikamyllunnar sem daglega er kölluð bankar. Þannig tapaðst þessi innistæðutryggingasjóður 100% eins og allt annað sem þessar bankasvikamyllur komu nálægt.

Nú standa mál þannig að sama blöðruhagkerfið, markaðsvæddi sósíalisminn, og hrundi hér 2008 er það hagkerfi sem enn er notast við. Það hefur ekkert breyst sem máli skiptir. Persónur og leikendur eru meira að segja enn að verulegu leiti þeir sömu og áður. Nú virðist helsta takmark bankanna vera að tapa aftur öllu því sparifé landsmanna sem ríkið ákvað að ábyrgjast eftir að það tapaðist í fyrra skiptið. Nú virðist reyndar svo að það verði fljótlegt að koma efnahagsmálunum í það horf að allt hrynji aftur. Enda er menn nú í æfingu og miklu fljótlegra að stela þessu nú en áður. Bankarnir dæla nú fé í ónýt fyrirtæki og drepa um leið þau sem annars gætu lifað. Þau verða því ónýt líka. Fasteignaverð mun lækka verulega, sérstaklega á atvinnuhúsnæði og það er óhjákvæmilegt að bankarnir fara allir með tölu á hausinn aftur innan 5 ára þegar þeir verða búnir að drepa öll sæmileg fyrirtæki sem þeir hafa í viðskiptum til að bjarga vonlausum svikamyllum sem þeir dæla endalaust peningum í.

Á meðan þetta gengur á er þessi vonlausa ríkisstjórn okkar upptekin af klúðri á öllum sviðum, sjálfsblekkingum og trúnni á að það að ljúga ESB kommúnismanum upp á þjóðina muni einhvern tíma koma Íslendingum til góða.

Sérstakar lausnir nauðsynlegar

Allt í plati hjá ríkisstjórninni eina ferðina enn, hlýtur að styttast í smá byltingu hér.

Ég ætla nú bara að vera jákvæður yfir því að Hæstiréttur ógilti stjórnlagaþingskosninguna. Það er að renna upp fyrir mér að þetta mál er bara enn eitt aprílgabbið hjá ríkisstjórninni. Hún er búin að vera dugleg að plata fólk þessi ríkisstjórn Jóhönnu og Steingríms. Það gerði hún strax eftir kosningar þegar það var svikið að taka hart á bankaránunum hér. Hún plataði fólk nokkrum sinnum með Icesave lygum og samningum. Hún plataði fólk með skjaldborginni svokölluðu. Hún plataði fólk með svokölluðum aðgerðum til bjargar heimilunum. Hún plataði fólk með tali um að breyta kvótakerfinu. Hún plataði fólk með því að tala um að koma fram með raunhæf tekjuviðmið fyrir síðustu áramót. Hún er að plata fólk með engri aðkomu að kjarasamningum. Hún plataði fólk með tali um lýðræðisumbætur og stjórnlagaþing sem nú er orðið ónýtt. Hún er stöðugt að plata fólk með því að þykjast vera velferðarstjórn. Hún platar fólk með því að hysja upp um glæpastarfsemi bankanna og passa að það sé ekki hróflað við neinu í rekstri þeirra. Steingrímur kemur reglulega fram í fjölmiðlum og platar fólk með því að allt sé að lagast og á réttri leið þó enginn finni það nema hann sjálfur.

Svona má endalaust telja. Þessi stjórn verður eflaust kölluð platstjórnin einhvern tíma síðar. Enda er plat það eina sem hún er góð í.

Íslendinga vegna vona ég að einhverjir góðir menn taki sér Túnis til fyrirmyndar og reki okkar gjörspillta og gagnslausa stjórnmálapakk úr landi sem fyrst og losi sig í leiðinni við bankamafíuna sem er að drepa landið ásamt spillingarliðinu í pólitíkinni.

Margrét Tryggvadóttir talaði um í dag að það stæði yfir orrusta um Ísland. Það er örugglega nærri lagi hjá henni. En það er ótrúlegt að þetta skuli vera að gerast. Það þarf enga orrustu um Ísland, Íslendingar geta lifað góðu lífi af gæðum þessa lands. En til þess þarf að losna við þetta pakk sem stal af landsmönnum öllu fémætu í skjóli spilltra stjórnmála. Sama pakkið er nú að reyna að stela öllu öðru sem gera má verðmæti úr. Ísland ræður ekki við allar afæturnar sem öllu vilja stela og öllu ráða hér. Þær þarf að reka úr landi. Þá er blómleg tíð í vændum fyrir venjulegt vinnusamt fólk ef það er hreinsað til í spillingunni og afætunum.

Stjórnlagaþingskosning ógild

Ströng viðurlög við að koma upp um glæpastarfsemi, en glæpamenn vel varðir.

Það er sameiginlegt í Sviss og á Íslandi að í báðum löndum er það litið alvarlegum augum að menn reyni að koma upp um glæpastarfsemi. Það að tala um glæpamenn og leggja fram sannanir fyrir máli sínu er refsivert athæfi. Í báðum löndum hafa menn verið dregnir fyrir dóm og dæmdir til refsingar fyrir slíka hluti. Síðasta dæmið er þessi Svisslendingur sem er að afhjúpa glæpastarfsemi banka þar í landi.

En að sama skapi er lítið gert í að taka á stórfelldri glæpastarfsemi þegar hún kemst upp. Ég verð þó að viðurkenna að sérstakur saksóknari er að sýnir nú smá lit í þeim efnum. Vonandi er það rétt að byrja sem hann er að gera, því þrátt fyrir smá hreyfingu á embættinu ganga allir glæponarnir lausir. Á Íslandi eru þeir ekki einu sinni settir í varðhald á meðan kannað er hvort þeir hafi brotið lög eins og gert er með þá sem reyna að afhjúpa glæpastarfsemi í Sviss.

Í ljósi þessa glæpavinsamlega þjóðfélags á Íslandi undir glæpavinastjórn Steingríms og Jóhönnu er það spennandi að bíða núna eftir því hvort hæstiréttur staðfestir nýja dóma héraðsdóms þar sem viðurkennt var að það sé glæpur að hafa af fólki fé með svikamyllu eins og átti sér stað með stofnfjáraukningu sparisjóðanna. Í dómunum var það niðurstaðan að þeim sem prettaðir voru beri ekki skylda til að greiða lán sem tekin voru á fölskum forsendum að tilstuðlan svikahrappanna. Þetta er stórt skref í afglæpavæðingu samfélagsins. En skrefið er þó ekki að fullu stigið nema Hæstiréttur staðfesti það.

Nú er bara að bíða og sjá hvort Hæstiréttur gerir skyldu sína og dæmir fjársvik ólögleg eins og héraðsdómur gerði, eða hvort Hæstiréttur snýr við dómi héraðsdóms, glæpastarfseminni í vil. Ég vona sannarlega að Hæstiréttur standi sig og staðfesti niðurstöðu héraðsdóms. Þá er ljóst að á Íslandi er eftir allt saman sem á undan er gengið, til einhvers konar réttarríki. Ef Hæstiréttur snýr dómnum á hinn veginn þá er Ísland óréttarríki þar sem skipulögð glæpastarfsemi er föst í sessi.

Uppljóstrari í gæsluvarðhald

Skemmtilega útfærð fjársvik Jóns Ásgeirs og félaga.

Sparisjóðakerfið var tekið mjög skemmtilega fyrir af einni öflugustu glæpamafíu Íslands þegar Jón Ásgeir og félagar fundu út hvernig þeir gætu nýtt sér félagsformið á bak við sparisjóðina til að svíkja út fé.

Með því að komast í lykilstöður í BYR og víðar í gegn um sameiningaráform sparisjóðanna fékk glæpamafían völd til að búa til peninga og stinga í eigin vasa með því að heimta stofnfjáraukningu í sparisjóðunum. Það var gert undir því yfirskini að styrkja þá sem lánastofnanir en raunverulegur tilgangur var að búa til peninga sem glæpamennirnir stungu síðan í eigin vasa með ýmsum kennitölum.

Stofnfjáreigendum var boðið að margfalda stofnféð, hundraðfalda það svona cirka. Aukninguna urðu stofnfjáreigendur að leggja fram í peningum sem glæpamafían sá um að lána þeim, ýmist frá sparisjóðunum sjálfum eða öðrum lánastofnunum, t.d. Glitni, sem þeir höfðu yfir að ráða í svikamyllunni. Á móti lánunum urðu stofnfjáreigendur að leggja fram tryggingar, ýmist veð eða undirskriftir sínar væri um stöndugt fólk að ræða. Til að pressa á fólk var því hótað með því að tæki það ekki þátt í stofnfjáraukningunni myndi eldri hlutur í sparisjóðnum verða lítils virði. Fólki var sýnt frá á að stofnfé sem það átti fyrir myndi einfaldlega tapast, en ef það hundraðfaldaði hlutinn myndi ágóðinn greiða aukningum jafn hratt og gjalddagar féllu á lánin vegna hennar. Svo var þetta allt saman matreitt á þann veg að stofnfjáraukningin færi í öruggar fjárfestingar til að styrkja rekstur viðkomandi sparisjóða. Það reyndist vera haugalygi eins og oft vill verða þegar menn eru að selja svik og pretti. Peningarnir sem fólk var þannig búið að viðurkenna að skulda vegna stofnfjáraukningar í nokkrum pínulitlum sparisjóðum, alls nokkrir milljarðar voru svo greiddir Jóni Ásgeiri og félögum sem eflaust gátu látið þessa aura duga sem vasapeninga í nokkra daga þangað til þeir snéru sér að næstu svikamyllu. Svona voru beinlínis búnir til peningar til að svíkja af fólki. Einfaldari og skýrari fjársvik er varla hægt að finna, þetta er borðleggjandi skólabókardæmi um hvernig stórfelld fjársvik eru framkvæmd.

Niðurstaðan af þessum fjársvikum er að ekkert sem talað var um gekk upp, frekar en búast má við þegar skipt er við svindlmafíu, annað en það að gjalddagarnir dúkkuðu upp vegna lánanna sem fólk tók.
Á hinn bóginn gekk fullkomlega upp fyrirætlun Jóns Ásgeirs og félaga, þeir sviku út marga milljarða af alls konar fólki, ungu sem gömlu og eru bara með gorgeir og Sigurð súperlögfræðing Jóns Ásgeirs til reyna að koma inn sektarkennd hjá fórnarlömbunum fyrir að hafa látið plata sig. Þessi Sigurður er víst einn vitlausasti maður Íslandssögunnar því hann talar eins og hann trúi því að Jón Ásgeir og fleiri íslenskir mafíósar séu blásaklausir og hafi aldrei svikið neinn um neitt þó aðalskjólstæðingurinn Jón Ásgeir sé dæmdur glæpamaður.

Vissulega lét fólk plata sig, allur þessi hópur hefði eftir á að hyggja átt að vita betur og stoppa þetta. En var það hægt? Eftir að Jón Ásgeir kom sínum útsendurum að stjórn BYRs var ekkert annað í stöðunni fyrir stofnfjáreigendur en að spila með, að öðrum kosti hefðu verið búnir til nýjir stofnfjáreigendur og allt haft af þeim gömlu sem þeir áttu fyrir. Og ekki var mönnum gefið færi á að finna neitt gruggugt fyrr en það var um seinan. Allt var vandlega undirbúið og látið líta vel út. Fjármálaeftirlitið og Seðlabankinn blikkuðu engum ljósum. Það eina sem hægt er að gera fyrir fórnarlömbin er það sem nú er gert. Að taka til varna þegar ljóst er að um stórfelld og skipulögð fjársvik var að ræða. Ég vona að þegar málin fara að fara fyrir dómara verði sú reisn yfir íslensku dómskerfi að menn fái ekki að afplána marga dóma samtímis, heldur verði menn látnir afplána dóma sína hvern á eftir öðrum. Það er eina leiðin til að ná lágmarksréttlæti fram vegna þessara glæpamanna sem nú er loksins farið að stugga eitthvað smávegis við.

Gríðarlegir hagsmunir undir

Þingmenn uppteknir af sjálfum sér, ætla bráðum á andnjósnanámskeið.

Það er nú meira bullið þetta njósnaofsóknaæði sem greip þingmenn í dag. Þeir virðst alveg hafa gleymt að þeir vinna störf sín í beinni útsendingu að stórum hluta. Þannig að ekki þarf að njósna um þingfundi til að vita hverjir sofa á þeim. Flest annað kemur fram í þingskjölum nema kannski matseðill mötuneytisins og hverjir skreppa út að reykja í hádeginu.

Þá er nú ekki mikið eftir til að njósna um þannig að ég veit ekki af hverju einhver ætti að vera að skilja tölvu eftir til að njósna á Alþingi. Og þó svo væri að einhver teldi eitthvað bitastætt vera til að njósna um á Alþingi hvað gerði það þá til þó njósnað væri um þau mál? Á að vera eitthvað leynimakk á Alþingi? Hvað eiga Alþingismenn að fela þar innandyra? Hingað til hefur verið talið gott og gilt að hitta þingmenn í skemmtilegum partíum og veislum til að vera upplýstur um gamanmál og önnur mál sem ekki fara í þingskjöl. Það liggur í augum uppi að hafi þessi tölva virst vera eitthvað njósnatæki, þá er þetta sennilega bara skemmtilegur hrekkur, það þarf ekki að hafa svona mikla fyrirhöfn til að nálgast einskisverðar upplýsingar.

Ég skil þess vegna ekki þetta uppistand á þinginu. Þingmenn eru ekkert sérstaklega góðir í feluleikjum, það kemst alltaf upp um þá og þarf engar sérstakar njósnatölvur til. Og ekki fundu þingmenn njósnatækið sjálfir og enginn hefur séð þann sem kom því fyrir. Kannski er upphlaupið í dag vegna þess að þessi njósnastarfsemi sem fór svo rækilega fram hjá þingmönnum sjálfum kemur upp um viðvarandi athyglisbrest þeirra gagnvart öllu í kring um sig, almenningi, njósnum, efnahagsmálum o.s.frv. Þetta mál og umfjöllun þingsins um það í dag staðfestir að þingmenn eru einungis uppteknir af sjálfum sér og sínum prívathagsmunum. Öðru taka þeir ekki eftir. Niðurstaðan af þessu verður líklega sú að þeir gera bráðum hlé á þingstörfum til að fara á andnjósnanámskeið til KGB eða CIA.

Birgitta flutti ljóð

Hu Jintao og Kína ráða mestu um þróun peningamála heimsins.

Bandaríkin eru komin í vörn í efnahags- og gjaldeyrismálum gagnvart Kína, sama er um Evrópu. Bandaríkjadollar er gengisfelldur með seðlaprentun til að keppa við miðstýrðan gjaldmiðil Kína, júanið. Það sýnir vel styrk og völd Kína að Bandaríkjamenn skuli í raun vera farnir að handstýra gengi dollarans að fordæmi Kínverja til þess að verja veika samkeppnisstöðu, í stað þess að láta markaðslögmálin ráða verðgildi hans.

Svipað er framundan í Evrópu. Nú hafa ráðamenn í ESB áhyggjur af því að kaup Kínverja á ríkisskuldabréfum skuldsettra Evrópuríkja muni styrkja gengi Evrunnar og auka samkeppnishæfni Kínverja í Evrópu. Þannig sé sáralítil áhætta fólgin í því fyrir Kínverja að kaupa evrópsk ríkisskuldabréf. Því um leið og þeir kaupa skuldabréfin og styrkja gengi Evrunnar fá þeir betri aðgang að Evrópskum mörkuðum fyrir framleiðslu sína. Og síðar meir, þegar kemur að skuldadögum og Evruríkin þurfa að hækka skatta og skerða kaupmátt þegnanna til að greiða skuldirnar batnar samkeppnisstaða Kína enn og aftur. Þá brýtur hagstætt verð á Kínverskum vörum niður hugarfarið sem fær fólk til að kaupa innlenda framleiðslu þó dýrari sé en innflutt.

Þannig er útlitið bjart fyrir Kínverja í efnahagsmálun. Þeir munu enn efla útflutning sinn og styrkja stöðu sína á fjármálamörkuðum heimsins. Þar eru þeir þó nú þegar orðnir valdamestir. Eflaust er takmarkið að þeir verði ekki bara valdamestir á fjármálamörkuðum heldur líka ríkastir. Eins og er stefna þeir hraðbyri að þessu marki.

Langt í að júanið verði alþjóðlegt

Sendi Tony Blair hryðjuverkamann til Íslands?

Skv. fréttum RÚV núna í hádeginu þá var Mark Stone, útsendari og æsingamaður bresku lögreglunnar, í beinum samskiptum við forsætisráðherra Bretlands varðandi njósnir sínar og hvatningu til ófriðar meðal friðsamlegra mótmælenda í Saving Iceland.

Ekki er með góðu móti hægt að álykta annað en að Tony Blair hafi sjálfur reynt að spilla friðsamlegum mótmælum á Íslandi með því að senda hingað mann sem átti að kynda undir ófriði í mótmælunum. Kynda undir hryðjuverkum eins og ófriðlegar aðgerðir eru stundum kallaðar. Og allt voru þetta leynilegar aðgerðir. Afleiðingunum átti svo að klína á friðsama mótmælendur. Sem betur fer tókst ekki að æsa mótmælendur svo mikið upp að illt hlytist af. Aðgerðin mistókst sem sagt.

Hvernig ætla íslensk stjórnvöld að bregðast við því að upp hafi komist að breski forsætisráðherrann hafi ekki bara tekið þátt í og hvatt til hryðjuverka í Írak, heldur einnig gert út mann til að hvetja til hryðjuverka á Íslandi?
Er það ekki kaldhæðni að Bretar hafi sett hryðjuverkalög á Ísland um tíma vegna nokkurra bankaræningja sem hvorki þeir né Íslendingar virðast þó vilja taka almennilega á?
Það eru greinilega að styrkjast rökin fyrir því að Bretar ákváðu að setja hryðjuverkalög á Ísland. Það sem þeir vissu en ekki við er að þeir voru sjálfir búnir að senda hingað hryðjuverkamann og unnu samviskusamlega að því að ýta undir hryðjuverkastarfsemi í landinu.

Væri nú ekki ráð að vekja Jóhönnu þyrnirós í íslenska forsætisráðuneytinu og athuga hvort henni finnst eðlilegt að á Íslandi séu starfrækt sendiráð ríkja sem senda flugumenn til að ýta undir hryðjuverkastarfsemi í landinu okkar?

Væri ekki ráð að stefna Tony Blair fyrir alþjóðadómstól vegna þessa prívatútsendara hans á Íslandi, eða er það ekkert mál þó erlendir þjóðhöfðingjar sendi hingað menn til að stunda njósnir og ýta undir hryðjuverkastarfsemi?

Keðjusöngur við stjórnarráðshúsið