Svo auðvelt að laga hlutina.

Ég skil ekki þessa ríkisstjórn. Ég skil ekki af hverju það er svo erfitt að leysa þetta vandamál.

Það sem þarf að byrja á að gera er þetta:

1. Festa allar skuldir einstaklinga á þeirri stöðu sem þær voru í við bankahrun. Þá varð forsendubrestur. Með því að festa skuldirnar, innlendar sem erlendar í þeirri stöðu sem þær voru við bankahrun, eru það bankarnir sem verða að taka á sig afleiðingar af því að forsendur þeirra brustu. Það er ekki verið að afskrifa neitt eða gefa almenningi neitt með þessu. Fólk fær bara að halda áfram að borga það sem það fékk lánað.

2. Framreikningur skuldanna frá bankahruni miðist ekki við gengisþróun, úr því það er ólöglegt, og heldur ekki við neysluvísitölu til verðtryggingar, forsendurbresturinn hefur kolruglað vísitöluna. Framreikningur skuldanna frá hruni verður að vera tengdur við launaþróun og þróun kaupmáttar. Fólk borgar ekki skuldir sínar með öðru en tekjum sínum og því sem eftir er af þeim eftir skatta og annað sem af laununum er dregið.

3. Setja þak á vexti. Þannig að fólk þurfi ekki sífellt að búast við að breytilegir vextir keyrir afborganir af lánum upp úr öllu valdi fyrirvaralaust.

4. Þar sem þetta dugir ekki til, t.d. vegna atvinnumissis, verður að bjóða fólki upp á sértækar aðgerðir, lánalengingar, frystingar lána og aðstoð við að minnka við sig húsnæði o.s.frv.

Með þessum aðgerðum er ekki verið að gefa fólki neitt eða afskrifa neitt. Það er bara verið að leyfa fólki að borga til baka það sem það hefur fengið lánað án þess að lánin hækki á stuttum tíma um 50% eða 150% eða eitthvað þar á milli. Það er um leið verið að setja bönkunum ramma um viðskiptasiðferði og viðskiptahætti. Það er verið að leysa fjölmörg vandamál með einföldum hætti. Það er verið að vinna í málunum.

Af hverju er þetta ekki gert?

Vilja ekki breyta um stefnu