Hárrétt afstaða hjá Bretum en þetta er að fara til fjandans engu að síður - lærum af Kínverjum..

Ég verð nú að vera Alister Darling alveg hjartanlega sammála þegar hann lýsir því yfir að Bretar ætli ekki að borga í sjóð til að styrkja Evruna. Þetta er skynsamleg afstaða, enda eru Bretar búnir að brenna sig talsvert á peningamálum og hafa greinilega lært eitthvað af því. Það er líka ánægulegt að hinn stóri flokkurinn í Bretlandi hefur það á stefnuskrá sinni að halda Bretlandi í hæfilegri fjarlægð frá fjárhagslegu svartholi ESB.

Það eru raunar ekki bara Bretar sem sjá hvert stefnir. Kjósendur í Þýskalandi lýstu óánægju sinni með fyrirhuguð framlög til að bjarga lánardrottnum Grikkja með því að kjósa gegn flokki Merkel í sambandsþingskosningum um helgina.

Allir sæmilega skynsamir menn, sama í hvaða landi þeir búa, sjá og skilja að mesti veikleiki sterks gjaldmiðils er að menn leggja allt í sölurnar til að halda honum sterkum. Það er auðvitað furðuleg afstaða, því gjaldmiðill getur því aðeins verið sterkur að hann geti veikst svo efnahagslífið á gjaldmiðilssvæðinu geti styrkts.

En þessi viðtekni kjánaskapur stjórnmálamanna virðist byggjast á því að fjármálaheimurinn ráði efnahagsmálunum. Ef einhvers staðar þarf að velja um hvort það eru lánardrottnar sem tapa fé á gáleysislegum lánveitingum og okri eða hvort skattgreiðendur eru látnir borga fyrir þá tapið, þá er alltaf valið að láta skattgreiðendur borga, amk. það sem hægt er að plokka af þeim. Meira að segja þó að fjármálastarfsemin sé að stórum hluta byggð á okri og bruðli annars vegar, og því að búa til peninga úr engu hins vegar (sem auðvitað er ekki hægt), þá er alltaf hlaupið upp til handa og fóta að bjarga þessum spilaborgum þegar þær hrynja.

Nú er vandinn hins vegar orðinn svo viðamikill að þetta getur ekki haldið áfram mikið lengur. Endalokin eru fyrirsjáanleg. Það er samt ekki hægt að tímsetja þau nákvæmlega, því enn er verið að reyna að draga fleiri þjóðir í svaðið með því að láta þær blæða fyrir hinar sem geta ekki meir. Það eru ennþá til einhverjir sjóðir sem á að reyna að tæma í dauðteygjum þessa fjármálakerfis sem stjórnar heiminum. En það er alveg ljóst að það dugir skammt. Efnaminni þjóðir heims hafa enga peninga sem máli skipta í þessa hít, og af efnameiri þjóðunum eru fáar eftir til að mjólka. Nú er fjármálasvartholið að ryksuga upp úr síðustu ríkiskössum Evrópu. Það stefnir í að innan skamms verði þeir tómir, rétt eins og Japan og USA og fleiri mikilsmetandi ríkissjóðir.

Þá er ekkert eftir nema sjóðir Kínaveldis, en þeir hafa ekki verið aðgengilegir þessu fjárþyrsta fjármálakerfi hins vestræna heims sökum "skringilegra" stjórnarhátta Kínverja sem greinilega eiga miklu betri hagfræðinga en vestrænar þjóðir. Þeim hefur meira að segja tekist að búa til sannkallað efnahagsundur í landi sínu með fárveikum og handónýtum gjaldmiðli, eins og vestrænir fræðingar skilgreina gjaldmiðil Kínverja.

Sennilega hafa Kínverjar ekki verið nógu duglegir að mennta hagfræðinga sína í háskólum sem haga kennslunni í samræmi við óskir styrktaraðila úr fjármálaheiminum eins og alsiða er á vesturlöndum. Það er líklega ástæðan fyrir því að þeir kunna að hagnýta sér ónýtan gjaldmiðil til góðs fyrir efnahag landsins.

Það stefnir því hratt og örugglega í að ónýtt og úrkynjað fjármálakerfi á vesturlöndum leggja efnahag þess heimshluta í rúst og Kína taki við sem aðal efnahagsstórveldi heimsins. Ég ætla ekkert að leggja mat á hvort það er gott eða ekki, en það stefnir óneitanlega þráðbeint í þessa átt.

Eitt ættu nú Íslendingar að gera sem tengist þessu, það er að ráða hingað Kínverskan fjármálaráðherra og Kínverskan efnahags- og viðskiptaráðherra. Þessir kallar sem við höfum í þessum embættum skilja ekkert hvað þeir eru að gera og valda tómu tjóni á hverju degi. Steingrímur með því að reka ríkissjóð með metfjárlagahalla, 275 milljónum á dag. Og Gylfi með því að taka lán og gera það sem hann getur til að styrkja krónuna svo efnahagslífið í landinu rétti helst aldrei úr kútnum.
Losum okkur við þessa kallaula og ráðum vel menntaða Kínverja í þessi embætti. Ég er að meina þetta í fullri alvöru.

Bretar styrkja ekki evruna

Athugasemdir

[Jóhann Elíasson, 9.5.2010 kl. 19:51]

ESB er farið að gliðna og að mínu mati er ekki langt í að það liðist í sundur, verði ekki gripið til róttækra aðgerða.

[Björn (IP-tala skráð) 10.5.2010 kl. 10:14]

Spurning hvort Kínverjarnir séu með hámenntaða hagfræðinga eða noti bara almenna skynsemi, taki ekkert of mikið af lánum og svo framleiða þeir mikið sem gefur þeim peninga, þannig græða þeir, þannig græða allir.

[Guðmundur Ásgeirsson, 10.5.2010 kl. 15:42]

Ég held að efnahagsleg velgengni Kína hafi ekkert með hagfræði að gera, þetta eru einfaldlega stærstu vinnubúðir í heimi og með svona ódýrt vinnuafl er lítið mál að græða peninga.

[Jón Pétur Líndal, 10.5.2010 kl. 19:02]

Sælir og takk fyrir athugasemdirnar. Þetta með Kínverjana og velgengni þeirra er auðvitað umhugsunarefni. Af því Guðmundur nefndi að ástæðan fyrir velgengni Kínverja væri kannski bara sú að þetta séu stærstu vinnubúðir í heimi, þá verður fróðlegt að sjá hvort velgengni okkar Íslendinga verður ekki óvenju mikil á næstu árum, nú þegar búið er að breyta landinu í vinnubúðir, þar sem 50% þjóðarinnar á ekki neitt, 48% lítið og um 2% eiga það litla sem eftir er.

Nei, ég held reyndar að breytingarnar í Kína hafi einmitt með hagfræði og hagstjórn að gera umfram allt annað. Þar hefur markvisst verið unnið að því að gera landið að stærstu verksmiðju heims. Og um leið hefur þess verið gætt að hafa þannig stjórn á gjaldmiðli landsins að verksmiðjan geti selt afurðir sínar á heimsmarkaði.

[Guðmundur Ásgeirsson, 14.5.2010 kl. 23:05]

Sú staða sem þú lýsir varðandi Ísland held ég að sé einmitt ástæðan fyrir því að við erum ekki komin í gjaldþrot nú þegar, og já ég hef fulla trú á velgengni landsins á komandi árum.