Gríðarleg framför í samskiptum?

Það að taka upp alþjóðleg rótarlén eins og það heitir á góðri íslensku skv. fréttinni sem fylgir hér með, er að mínu mati gríðarlega vafasöm framför í netmálum heimsins.

Einn aðalkosturinn við netið hefur fram að þessu verið sá að það hefur í grunninn notað frekar fá tungumál og enn færri leturgerðir. Þannig hefur það ýtt undir skilning milli notenda þess. Þeir hafa tileinkað sér það sem netið hefur boðið upp á. En nú fer þetta að breytast, nú er að koma að því með alþjóðlegu rótarlénunum að sérhæfing netsins verði meiri og menn fara aftur að híma hver í sínu horni letur- og tungumálalega séð eins og gert var fyrir daga netsins. Nú fer netið að verða svo fullkomið að menn þurfa ekkert að vera að tileinka sér það sem það hefur getað boðið í letri og tungumálum. Nú er netið að verða svo gott að það getur verið á öllum tungumálum og notað fleiri og fleiri leturgerðir. Þá geta menn farið að láta sér duga að nota þær vefsíður sem eru á þeirra tungumáli, með þeirra leturgerð, og þar með losnum við við einn kostinn við netið hingað til. Það hefur einfaldað svo marga hluti með fábreytileika sínum og neytt okkur til að nota færri leturgerðir og tungumál. Þetta hefur verið einn stóri kosturinn við netið. En nú á að takmarka þessa jákvæðu hlið tækninnar með því að gera hana fullkomnari.

Öll þessi tungumál og letur sem við jarðarbúar notum er okkar heimskulegasta og dýrasta sérviska. En svo sterk er þessi sérviskukennd í okkkur að frekar en að fækka tungumálum svo við getum talað betur saman þá leggjum við okkur í líma við að laga allt í kring um okkur að þessari óskiljanlegu sérvisku, að vilja ekki tala sama tungumál, eða nota sama ritmál.

Tímamót í sögu netsins

Athugasemdir

[Lesandi (IP-tala skráð) 15.5.2010 kl. 20:58]

Þetta er auðvitað alveg rétt hjá þér. Það er bæði rétt og lýðræðislegt að allir séu látnir nota það tungumál sem flestir tala. Í tilfelli okkar jarðarbúa er það væntanlega mandarínska eða kínverska því hana tala 800 milljónir manna. Við gætum haft spænsku með því þá bætast við 358 milljónir. Þú gerir líklega ekki ráð fyrir að við notum ensku þótt hún sé upphaflega mál netsins því það væri dýr sérviska. Auðvitað munum við nota þau tungumál og leturkerfi sem eru algengust til að spara [peninga] og gleymum því að hugbúnaður og tækni ætti að gera okkur mögulegt að ráða fram úr þessum mismunandi tungumálum á ódýran og haghvæman hátt.

 祝你今天愉快 eða tener un buen día

[Jón Pétur Líndal, 18.5.2010 kl. 21:44]

Sæll lesandi og takk fyrir athugasemdina. Það virðist vera voðaleg heitt umræðuefni að tala um að fækka tungumálum. Raunar svo heitt að flestir forðast að taka þátt í umræðunni, en þeir fáu sem leggja í það býsnast bara yfir því hvað það sé vitlaus hugmynd að fækka tungumálum eða einfalda ritmál. Á þessu sviði virðist þröngsýni fólks vera u.þ.b. takmarkalaus.

Það getur vel verið að tæknin eigi eftir að einfalda þýðingar og samskipti á mismunandi tungumálum. Þá má segja að tæknin verði á þessu sviði komin langt fram úr þróun mannsins sem verður þá ennþá frekar skilningslaus vegna meðvitaðrar ákvörðunar um að þróast ekki frekar á þessu sviði. En samt vill hann skilja hina sem tala önnur mál en ætlar að láta vélar um að annast það fyrir sig að skilja þeirra mál. Er þetta nú ekki dálítið mótsagakennt?

En þó þetta verði bráðlega mögulegt tæknilega er samt stór galli á þessu. Tæknin er ekkert að verða aðgengileg almenningi í stærstum hluta heimsins. Hún er alltof dýr fyrir stóran hluta mannkyns og hún krefst raforku sem víða skortir. Þess vegna kemur þessi tækni að takmörkuðu gagni.

Og í eðli sínu er þessi tækni einfaldlega vitlaus lausn sem sannar sjálf að hún er vitlaus lausn. Tæknin væri ekki þróuð ef á henni þyrfti ekki að halda. Það sannar að það þarf að hagræða í tungumálum heimsins, að vandinn er til staðar. Og tæknin er eins og ég nefndi óaðgengileg og dýr fyrir stóran hluta heimsins. Það sannar að hún er vitlaus lausn á vandanum. Þess vegna á að leysa þetta eins og ég er að leggja til, fækka tungumálum og einfalda ritmál.

Ég er hins vegar alveg sammála þér um að mandarín kæmi vel til greina sem alheimstungumál. Það er varla svo afleitt mál úr því það er móðurmál flestra jarðarbúa. Spænska kemur líka vel til greina og að mínu mati enska líka þó þú virðist ekki hrifinn af henni. Það eru nokkurn veginn jafn margir jarðarbúar ensku- og spænskumælandi að móðurmáli en um tvöfalt fleiri sem tala ensku en spænsku í það heila. Þar er enskan eina tungumálið sem stendur nokkurn veginn jafnfætis mandarín málinu í Kína.

Þetta eru auðvitað þau mál sem til greina koma ef tekið yrði upp eitt tungumál í heiminum. En kannski er ekki alveg komið að því ennþá. Óhagkvæmustu tungumálin eru auðvitað þau sem fæstir tala og þeim þarf að fækka sem fyrst.