Hættið að borga af lánum, það borgar sig ekki. - Reiknið dæmið til enda.

Ég sá hér á netinu ágæta grein um ástandið á húsnæðismarkaði í USA. Þar kemur fram að búist er við að fleiri en nokkru sinni muni skila húsnæði sínu til bankanna á árinu 2010. Verð hefur fallið á húsnæði á sama tíma og vextir eru háir. Algengt er að fólk geti lækkað húsnæðiskostnað sinn um helming eða meira með því að skila lyklunum, hætta að borga af lánunum og kaupa aftur eða fara á leigumarkað. Og það sem mest athygli vekur í USA nú er að fólk er að hætta að greiða af lánum og skila húslyklum í stórum stíl vegna þess að það er fjárhagslega skynsamlegt, hagkvæmt. Þetta snýst ekki lengur eingöngu um greiðslugetu, heldur skynsemi.

Þar sem ekkert er verið að gera hér á landi til að koma til móts við lántakendur verð ég að mæla með að fólk skoði þessa leið. Í USA fara menn auðvitað á svartan lista vegna vanskilanna og það fylgir því kostnaður að fara í þrot, en þegar dæmið er reiknað til enda marg borgar það sig samt. Það sama á auðvitað við hér á landi, en ef það sparar stórar fjárhæðir að fara þessa leið, þá ber það líka vott um að lántakendur velja skynsemi fram yfir kúgun og það er mikils virði.

Sá heiðarleiki sem okkur flestum hefur verið innrættur, að borga skuldir okkar, hefur um langt skeið verið misnotaður af fjármálafyrirtækjum til að kúga fé af okkur. Við tökum lán á tilteknum forsendum og flest eða öll sjáum við fram á að geta greitt lánin til baka og að við séum að eignast það húsnæði sem við erum að borga fyrir með láninu. En fjármálafyrirtækin taka af okkur verðtryggingu langt umfram það sem þau sjálf telja að þau þurfi í upphafi, auk þess taka þau af okkur breytilega vexti af verðtryggðu lánunum. Eða þá að lánin eru gengistryggð og vextir breytilegir. Með þessum hætti hafa bankarnir hirt allt eigið fé af fjölmörgum skuldurum, fé sem menn hafa greitt út við kaup á íbúðum eða vinnu sem menn hafa lagt í eigið húsnæði.

Það var í eina tíð talinn jafnmikilvægur heiðarleiki að standa við samninga eins og að borga skuldir sínar. Nú hafa bankarnir löngu hætt þeim heiðarleika að standa við samninga, það gerðu þeir þegar samningarnir voru gerðir teygjanlegir og sveigjanlegir þeim í hag. Það hefur sýnt sig vel undanfarið. Bankarnir hafa flestir farið á hausinn og skipt um kennitölur. Þrotabú þeirra borga sáralítið af skuldum sínum, gert er ráð fyrir að þeir komist þó langt með að greiða forgangskröfur. Ríkisstjórnin leggur blessun sína yfir þetta sukk og svindl og stendur með bönkunum í blíðu og stríðu.
Ríkisstjórnin setti neyðarlög til að bjarga innistæðum á venjulegum bankareikningum þegar allt bankakerfið hrundi 2008. Með þessu var verið að velta megninu af hruninu yfir á skuldara. Hver trúir því að skuldarar geti einir borið hrunið ef þeir sem áttu peninga geta lítið sem ekkert borið?
Á sama tíma er verið að höfða til heiðarleika skuldara til að plata þá til að láta féfletta sig áfram.

Ég vil skora á alla skuldara að skoða það vel og vandlega hvort ekki borgi sig að hætta að borga af bankalánum. Þrátt fyrir svarta lista og jafnvel gjaldþrot. Þrátt fyrir að menn verði að yfirgefa húseignir sem þeir eiga hvort eð er ekkert í og fara á leigumarkað eða kaupa ódýrara húsnæði.
Ég er þess fullviss að ef ekkert verður aðhafst varðandi leiðréttingu skulda af íbúðarhúsnæði umfram það málamyndafix sem aðeins hefur örlað á þá er skynsamlegt fyrir fólk að hætta að borga af lánunum og fara að koma sér fyrir annars staðar.

Siðferðilega tel ég að ekkert sé athugavert við þetta í ljósi þess hvernig bankarnir hafa snúið út úr heiðarleika í viðskiptum, þetta er bara ein hliðin á hinum frjálsa markaði og öfluga kapítalisma sem við höfum tileinkað okkur á undanförnum árum. Spilum bara þann leik til enda, þá fer allt vel að lokum.

Hér er svo tenging á greinina um þetta í USA.
http://finance.yahoo.com/news/Strategic-Defaults-and-the-usnews-2190373684.html?x=0&mod=loans

Athugasemdir

[Vilborg Eggertsdóttir, 21.1.2010 kl. 14:30]

" Ríkisstjórnin setti neyðarlög til að bjarga innistæðum á venjulegum bankareikningum þegar allt bankakerfið hrundi 2008. Með þessu var verið að velta megninu af hruninu yfir á skuldara. Hver trúir því að skuldarar geti einir borið hrunið ef þeir sem áttu peninga geta lítið sem ekkert borið?

Á sama tíma er verið að höfða til heiðarleika skuldara til að plata þá til að láta féfletta sig áfram. "

Sammála þér.

Það skipir ekki máli að vera á vanskilaskrá, - alltaf verið að reyna að hræða okkur á einn eða annan hátt.

Ef við hættum að taka þátt í þessari vitleysu þá fellur þetta kerfi allt um sjálft sig.

[Árni Þór Björnsson, 23.1.2010 kl. 19:13]

Athyglisvert .